ಮೂಡುಬಿದಿರೆ: 'ಮಿಥುನ್ ರೈ ಎಂಬ ಅಶ್ವಮೇಧ ಕುದುರೆ ಬಿಟ್ಟಿದ್ದೇವೆ, ತಾಕತ್ತಿದ್ರೆ ಕಟ್ಟಿ ಹಾಕಿ' - ಅಭಯಚಂದ್ರ ಜೈನ್ ಸವಾಲು

•   Thu, Apr 04 2019 10:35:46 AM



• ಮೂಡುಬಿದಿರೆ,ಏ 04(MSP):  'ದಕ್ಷಿಣ ಕನ್ನಡ ಕಾಂಗ್ರೆಸ್ ಅಭ್ಯರ್ಥಿ ಮಿಥುನ್ ರೈ ಎಂಬ ಅಶ್ವಮೇಧ ಕುದುರೆಯನ್ನು ನಾವು ಬಿಟ್ಟಿದ್ದೇವೆ. ಯಾರಿಗಾದರೂ ತಾಕತ್ತಿದ್ರೆ ಕಟ್ಟಿ ಹಾಕಲಿ, ನಾವು ನೋಡುತ್ತೇವೆ ' ಎಂದು ಶಾಸಕ ಅಭಯಚಂದ್ರ ಜೈನ್ ಸವಾಲು ಹಾಕಿದ್ದಾರೆ.

  

  ಅವರು ಏ.03 ರ ಬುಧವಾರ ಮೂಡುಬಿದಿರೆ ಸಮಾಜ ಮಂದಿರದಲ್ಲಿ ನಡೆದ ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿ ಪರೋಕ್ಷವಾಗಿ ಬಿಜೆಪಿಗೆ ಚಾಲೆಂಜ್ ಹಾಕಿದರು. ಕಾಂಗ್ರೆಸ್ ಪಕ್ಷವು 34 ವರ್ಷದ ಯುವ ನಾಯಕನನ್ನು ಲೋಕಸಭಾ ಚುನಾವಣೆ ಅಭ್ಯರ್ಥಿಯಾಗಿ ಅಖಾಡಕ್ಕೆ ಇಳಿಸಿದೆ. ಕಾಂಗ್ರೆಸ್ ನ ಇತಿಹಾಸದಲ್ಲೇ ಹೊಸ ಪ್ರಯೋಗ ಇದಾಗಿದೆ.  ಕರಾವಳಿಯ ಸಿಂಹವೊಂದು ದೆಹಲಿಯ ಲೋಕಸಭೆಯಲ್ಲಿ ಘರ್ಜಿಸಲಿದೆ ಎಂದರು. ಇದೇ ವೇಳೆ ಬಿಜೆಪಿ ವಿರುದ್ದ ವಾಗ್ದಾಳಿ ನಡೆಸಿ ಗೋಮಾತೆ ಹೆಸರು ಹೇಳಿಕೊಂಡು ಬದುಕುವ ಬಿಜೆಪಿಗರಿಂದ ಸಂಸ್ಕೃತಿ, ಸಂಸ್ಕಾರ ನಮಗೆ ಅಗತ್ಯವಿಲ್ಲ . ಈ ಬಾರಿ ಕಾಂಗ್ರೆಸ್ ಗೆ ಗೆಲುವು ಖಚಿತ ಎಂದರು.

  ಇದೇ ವೇಳೇ ಅಭ್ಯರ್ಥಿ ಮಿಥುನ್ ರೈ ಮಾತನಾಡಿ ನಾನು ಈಜಿ ದಡ ಸೇರಬೇಕೆಂದು ಚುನಾವಣಾ ಅಖಾಡಕ್ಕಿಳಿದಿದ್ದೇನೆ. ನೀವೆಲ್ಲಾರೂ ನನ್ನನ್ನು ಮುಳುಗಲು ಬಿಡಲ್ಲ ಎಂಬ ವಿಶ್ವಾಸ ನನಗಿದೆ. ನಾನು ಗೆದ್ದರೆ ಜನರ ಋಣ ಸಂದಾಯ ಮಾಡಲು ಸದಾ ಸೇವೆಗೆ ಸಿದ್ಧನಿದ್ದೇನೆ. ಬಿಜೆಪಿ ಭದ್ರ ಕೋಟೆ ಒಡೆದು ಹೊಸ ಇತಿಹಾಸ ಸೃಷ್ಟಿಸುತ್ತೇನೆ' ಎಂದರು.

  ಜೆಡಿಎಸ್ ಮುಖಂಡ ಮುಹಮ್ಮದ್ ಕುಂಜಿ, ಎಂಬಿ. ಸದಾಶಿವ, ಸುಮತಿ ಹೆಗ್ಡೆ, ಕಾಂಗ್ರೆಸ್ ಮುಖಂಡರಾದ ವಿಜಯನಾಥ ವಿಠಲ ಶೆಟ್ಟಿ, ಸಂಪತ್ ಕುಮಾರ್, ವಸಂತ್ ಬರ್ನಾರ್ಡ್, ಧನಂಜಯ್ ಮಟ್ಟು, ಶಾಲೆಟ್ ಪಿಂಟೊ, ಸುಪ್ರಿಯಾ ಶೆಟ್ಟಿ, ರತ್ನಾಕರ ಸಿ. ಮೊಯಿಲಿ, ಸುರೇಶ್ ಕೋಟ್ಯಾನ್ ಮುಂತಾದವರು ಉಪಸ್ಥಿತರಿದ್ದರು.