ಉಡುಪಿ: 'ಕೃಷ್ಣಮಠದಲ್ಲಿ ಅಭಿನಂದನ್ ಗೆ ಗೌರವಾರ್ಪಣೆ ಮಾಡಬೇಕು ಕಳುಹಿಸಿಕೊಡಿ ' - ರಕ್ಷಣಾ ಸಚಿವೆ ಬಳಿ ಪಲಿಮಾರು ಶ್ರೀ ಮನವಿ

•   Tue, Mar 26 2019 10:59:58 AM



• ಉಡುಪಿ,ಮಾ 26(MSP): "ಪಾಕಿಸ್ತಾನದ ಅತ್ಯಾಧುನಿಕ ಯುದ್ಧ ವಿಮಾನ ಹೊಡೆದುರುಳಿಸಿದ್ದ ವಿಂಗ್ ಕಮಾಂಡರ್ ಅಭಿನಂದನ್ ಅವರ ಪರಾಕ್ರಮ ನಮಗೆಲ್ಲಾ ಬಹಳ ಮೆಚ್ಚುಗೆಯಾಗಿದೆ, ದಯವಿಟ್ಟು ಅಭಿನಂದನ್ ಅವರನ್ನು ಉಡುಪಿಗೆ ಕಳುಹಿಸಿಕೊಡಿ. ದೇಶವೇ ಹೆಮ್ಮೆ ಪಡುವಂತೆ ಶತ್ರು ದೇಶದ ವಿಮಾನ ಹೊಡೆದುರುಳಿಸಿದ ಅಭಿನಂದನ್ ಗೆ ಕೃಷ್ಣಮಠದಲ್ಲಿ ಗೌರವಾರ್ಪಣೆ ಮಾಡಬೇಕು " ಎಂದು ಪರ್ಯಾಯ, ಪಲಿಮಾರು ಶ್ರೀ ವಿದ್ಯಾಧೀಶತೀರ್ಥ ಶ್ರೀಪಾದರು ಹೀಗೊಂದು ಮನವಿಯನ್ನು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್ ಮಾಡಿದ್ದಾರೆ. 

  
  
  

  

  

  

  ಮಾ.26ರ ಮಂಗಳವಾರ ಶ್ರೀ ಕೃಷ್ಣ ಮಠಕ್ಕೆ ಕೇಂದ್ರ ಸರ್ಕಾರದ ರಕ್ಷಣಾ ಸಚಿವೆ  ನಿರ್ಮಲಾ ಸೀತಾರಾಮನ್ ಇವರು ಕೃಷ್ಣ ಮಠಕ್ಕೆ ಆಗಮಿಸಿ ದೇವರ ದರ್ಶನ ಮಾಡಿ ಪರ್ಯಾಯ ಶ್ರೀ ವಿದ್ಯಾಧೀಶತೀರ್ಥ ಶ್ರೀಪಾದರಿಂದ ಅನುಗ್ರಹ ಮಂತ್ರಾಕ್ಷತೆ ಪಡೆದ ಬಳಿಕ ಶ್ರಿಗಳು ಸಚಿವೆ ಬಳಿ,  ಮಾತುಕತೆಯ ಸಂದರ್ಭ ಈ ಬೇಡಿಕೆಯನ್ನು ಸಲ್ಲಿಸಿದರು.

  ಈ ಸಂದರ್ಭ ಸಕಾರಾತ್ಮಕವಾಗಿ ಸ್ಪಂದಿಸಿದ ರಕ್ಷಣಾ ಸಚಿವೆ, ಶ್ರಿಗಳ ಬಳಿ ಈ ಬಗ್ಗೆ ರಕ್ಷಣಾ ಇಲಾಖೆಗೆ ಮಠವು ಒಂದು ಪತ್ರ ಬರೆಯಲಿ, ಒಂದು ವೇಳೆ ಕಾನೂನಾತ್ಮಕ ಅಡೆ ತಡೆ ಇಲ್ಲದಿದ್ದರೆ ಕಳುಹಿಸಿಕೊಡುತ್ತೇವೆ ಎಂದು ಭರವಸೆ ನೀಡಿದರು.