ಕಿನ್ನಿಗೋಳಿ: ಕಾಂಗ್ರೆಸ್ ಹಾಗೂ ಬಿಜೆಪಿಗೆ ಅಲ್ಪಸಂಖ್ಯಾತ ಸಮುದಾಯ ಬೇಡ-ಶಾಸಕ ಉಮಾನಾಥ್ ಕೋಟ್ಯಾನ್

•   Fri, Mar 10 2023 10:39:42 PM



• ಕಿನ್ನಿಗೋಳಿ, ಮಾ 10 (DaijiworldNews/SM): ಅಲ್ಪಸಂಖ್ಯಾತ ಸಮುದಾಯದ ಬಗ್ಗೆ ಕಾಂಗ್ರೆಸ್ ಮತ್ತು ಬಿಜೆಪಿ ಒಂದು ರೀತಿ ಅಹಂಕಾರ ಮನೋಭಾವ ಹೊಂದಿದೆ ಎಂದು ಮುಲ್ಕಿ-ಮೂಡುಬಿದಿರೆ ಶಾಸಕ ಉಮಾನಾಥ ಕೋಟ್ಯಾನ್ ನೇರಮಾತನಾಡಿದ್ದಾರೆ. ಕಿನ್ನಿಗೋಳಿಯ ಸಮುದಾಯ ಭವನವೊಂದರಲ್ಲಿ ಮುಸ್ಲಿಮ್ ಸಮುದಾಯದವರ ಜೊತೆಗಿನ ಸಭೆ ವೇಳೆ ಶಾಸಕರು ಖುದ್ದು ಸ್ವಪಕ್ಷದ ಬಗ್ಗೆಯೂ ಟೀಕಿಸಿ ಅಚ್ಚರಿ ಮೂಡಿಸಿದರು.

  “ಕಾಂಗ್ರೆಸ್ ಪಕ್ಷವು ಮುಸಲ್ಮಾನರು ಮತ್ತು ಕ್ರೈಸ್ತರು ನಮಗೆ ವೋಟ್ ನೀಡದೇ ಇನ್ಯಾರಿಗೆ ನೀಡ್ತಾರೆ? ಅನ್ನೋ ಅಹಂಕಾರ ಹೊಂದಿದೆ. ಆ ಪಕ್ಷವು ಅಲ್ಪಸಂಖ್ಯಾತರನ್ನು ಕೂಲಿಯಾಳುಗಳಂತೆ ನೋಡ್ತಿದೆ. ನಮ್ಮವರಿಗೆ (ಬಿಜೆಪಿ ಪಕ್ಷದವರಿಗೆ) ನಮಗೆ ವೋಟ್ ನೀಡದ ಮುಸಲ್ಮಾನರ ಕೆಲಸ ಯಾಕೆ ಮಾಡಬೇಕು ಅನ್ನೋ ಅಹಂಕಾರ ಇದೆ. ಹೀಗೆ ಎರಡೂ ಪಕ್ಷಗಳು ಕ್ರೈಸ್ತರು ಹಾಗೂ ಮುಸಲ್ಮಾನರ ಕುರಿತು ಇಂತಹ ಅಹಂಕಾರ ಭಾವ ಹೊಂದಿದೆ. ಈ ಎರಡಕ್ಕೂ ನಾನು ವಿರೋಧಿಯಾಗಿ ಕೆಲಸ ಮಾಡಿದ್ದೇನೆ ಎಂದರು.

  “ನೀವು ಯಾವುದೇ ಪಕ್ಷದಲ್ಲಿ ಬೇಕಿದ್ರೆ ಇರಿ, ಆದ್ರೆ ಕೆಲಸ ಮಾಡುವವರನ್ನು ಬೆಂಬಲಿಸಿ. ನನ್ನ ಐದು ವರ್ಷದ ಅವಧಿಯಲ್ಲಿ ನಾನು ಯಾವುದೇ ಕೋಮು ಗಲಭೆ, ಭಾಷಣ ಮಾಡಿದ್ರೆ ಹೇಳಿ. ನಾನು ಯಾವತ್ತೂ ಭೇದ ಮಾಡದೇ ಸಮಾನವಾಗಿ ಕೆಲಸ ಮಾಡಿದ್ದೇನೆ. ದುಡಿದವನಿಗೆ ಸಂಬಳ ಕೊಡುವುದು ನಮ್ಮ ಜವಾಬ್ದಾರಿ, ಹಾಗಾಗಿ ನನ್ನ ಐದು ವರ್ಷದ ದುಡಿಮೆಗೆ ಧೈರ್ಯದಿಂದ ಸಂಬಳ ಕೊಡಿ ಎಂದು ಕೇಳುತ್ತಿದ್ದೇನೆ”ಎಂದು ಮಾರ್ಮಿಕವಾಗಿ ನುಡಿದರು.