ಮಂಗಳೂರು: ಗಾಂಜಾ ಸಾಗಾಟ ಮಾಡುತ್ತಿದ್ದ ಓರ್ವನ ಸೆರೆ - ನ್ಯಾಯಾಂಗ ಬಂಧನ

•   Mon, Mar 18 2019 04:35:12 PM



• ಮಂಗಳೂರು,ಮಾ 18 (MSP): ಗಾಂಜಾ ಮಾರಾಟ ಮಾಡಲೆಂದು ಸಾಗಾಟ ಮಾಡುತ್ತಿದ್ದ ಆರೋಪಿಯೋರ್ವನನ್ನು ರೌಡಿ ನಿಗ್ರಹ ದಳದ ಅಧಿಕಾರಿಗಳು ಬಂಧಿಸಿರುವ ಘಟನೆ ಉಳ್ಳಾಲ ಪೊಲೀಸ್ ಠಾಣಾ ವ್ಯಾಪ್ತಿಯ ತಲಪಾಡಿ ಎಂಬಲ್ಲಿ ಮಾ.17 ರ ಭಾನುವಾರ ನಡೆದಿದೆ.

  

  ಬಂಧಿತನನ್ನು ತಲಪಾಡಿಯ ಕೆ.ಸಿ.ರೋಡ್ ನ ಮುನಾವರ್ ( 32) ಎಂದು ಗುರುತಿಸಲಾಗಿದೆ. ಈತ ಸುಮಾರು 1 ಕೆ.ಜಿ 50 ಗ್ರಾಮ್ ತೂಕದ ಗಾಂಜಾವನ್ನು ಬೈಕ್ ನಲ್ಲಿ ಸಾಗಾಟ ಮಾಡುತ್ತಿದ್ದ. ಬಂಧಿತ ಆರೋಪಿಯನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಆರೋಪಿಗೆ 15 ದಿನಗಳ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.

  ಉಳ್ಳಾಲ ಠಾಣಾ ಹಾಗೂ ಮಂಗಳೂರು ದಕ್ಷಿಣ ಉಪ ವಿಭಾಗದ ರೌಡಿ ನಿಗ್ರಹ ದಳದ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ಆರೋಪಿ ಮುನವರ್ ನನ್ನು ಬಂಧಿಸಲಾಗಿದ್ದು, 1 ಕೆ.ಜಿ 50 ಗ್ರಾಮ್ ತೂಕದ ಗಾಂಜಾ, ಮೋಟಾರು ಸೈಕಲ್‌, ಮೊಬೈಲ್ ಒಟ್ಟಾರೆ 20,000 ರೂ. ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.

  ಆರೋಪಿ ಗಾಂಜಾವನ್ನು ಕೇರಳದಿಂದ ಖರೀದಿಸಿ, ಮಾರಾಟಕ್ಕಾಗಿ ಸಾಗಾಟ ಮಾಡುತ್ತಿದ್ದ ಎಂದು ವಿಚಾರಣೆ ವೇಳೆ ತಿಳಿದುಬಂದಿದ್ದು, ಘಟನೆ ಕುರಿತು ಉಳ್ಳಾಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.