ಮಂಗಳೂರು:ನಾಪತ್ತೆಯಾಗಿದ್ದ ಬಾಲಕರಿಬ್ಬರು ಮಡ್ಗಾಂವ್ ನಲ್ಲಿ ಪತ್ತೆ

•   Thu, Mar 07 2019 09:41:36 AM



• ಮಂಗಳೂರು,ಮಾ 07 (MSP): ಮಂಗಳವಾರ ಸಂಜೆ ಟ್ಯೂಷನ್‌ಗೆಂದು ಹೋಗಿ ನಾಪತ್ತೆಯಾಗಿದ್ದ ಸುರತ್ಕಲ್‌ ಸಮೀಪದ ಕಾಟಿಪಳ್ಳ ಕೃಷ್ಣಾಪುರದ 6ನೇ ಬ್ಲಾಕ್ ನ ಇಬ್ಬರು ಬಾಲಕರು ಗೋವಾದಲ್ಲಿ ಪತ್ತೆಯಾಗಿದ್ದಾರೆ.

  

  ಕೃಷ್ಣಾಪುರ ನಿವಾಸಿಗಳಾದ ಅಬ್ದುರ್ರಹ್ಮಾನ್‌, ಜಮೀಲಾ ದಂಪತಿಯ ಮಗ ತನ್ವೀರ್‌ ಮತ್ತು ಆಬಿದ್‌, ಕಮರು ದಂಪತಿಯ ಮಗ ತನ್ವೀಝ್‌ ಪತ್ತೆಯಾದ ಬಾಲಕರು.

  ಇಬ್ಬರೂ ನಿತ್ಯ ಸಂಜೆ ಒಟ್ಟಾಗಿ ಟ್ಯೂಷನ್‌ಗೆ ಹೋಗುತ್ತಿದ್ದರು. ಅಲ್ಲಿಂದ ಮದರಸಕ್ಕೆ ಹೋಗಿ ತರಗತಿ ಮುಗಿಸಿಕೊಂಡು ರಾತ್ರಿ 9 ಗಂಟೆಗೆ ಮನೆಗೆ ಮರಳುತ್ತಿದ್ದರು. ಮಂಗಳವಾರ ಮದರಸ ತರಗತಿ ಇರಲಿಲ್ಲ. ಇಬ್ಬರೂ ರಾತ್ರಿಯಾದರೂ ಮನೆಗೆ ಮರಳಿರಲಿಲ್ಲ. ಸುರತ್ಕಲ್‌ ರೈಲು ನಿಲ್ದಾಣದಲ್ಲಿ ಇಬ್ಬರೂ ಇರುವ ದೃಶ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು.

  ಸಾಮಾಜಿಕ ಜಾಲತಾಣದಲ್ಲೂ ನಾಪತ್ತೆ ವಿಷಯ ಹರಿದಾಡುತ್ತಿತ್ತು. ಪೋಷಕರ ದೂರು ಆಧರಿಸಿ ಸುರತ್ಕಲ್ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮಕ್ಕಳ ತನಿಖೆಗೆ ಕಾರ್ಯಾಚರಣೆ ಆರಂಭಿಸಿದ್ದರು. ಬಾಲಕರಿಬ್ಬರು ಗೋವಾದ ಮಡಗಾಂವ್‌ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ಬುಧವಾರ ಪತ್ತೆಯಾಗಿದ್ದಾರೆ. ಬಾಲಕರನ್ನು ಕರೆತರುವ ಪ್ರಯತ್ನ ನಡೆದಿದ್ದು ಸುರತ್ಕಲ್‌ ಠಾಣೆಯ ಪೊಲೀಸರು ಮಕ್ಕಳನ್ನು ಕರೆತರಲು ಮಡಗಾಂವ್‌ಗೆ ತೆರಳಿದ್ದಾರೆ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ.