ಬೆಳ್ತಂಗಡಿ: ದುಬೈನಲ್ಲಿ ಬೈಕ್ ಅಪಘಾತ - ಯುವಕ ಮೃತ್ಯು

•   Sat, Oct 15 2022 08:55:18 AM



• ಬೆಳ್ತಂಗಡಿ, ಅ 15 (DaijiworldNews/MS): ದುಬೈನಲ್ಲಿ ಅ. 11ರಂದು ನಡೆದ ಬೈಕ್ ಅಪಘಾತದಲ್ಲಿ ಕುವೆಟ್ಟು ಗ್ರಾಮದ ಸಬರಬೈಲ್‌ ಬಳಿಯ ನಿವಾಸಿ ಮೃತಪಟ್ಟ ಘಟನೆ ನಡೆದಿದೆ.

  ಮೃತರನ್ನು ಕುವೆಟ್ಟು ಗ್ರಾಮದ ಸಬರಬೈಲ್‌ ಬಳಿಯ ನಿವಾಸಿ ಸಿರಿಲ್‌ ರೋಡ್ರಿಗಸ್‌ ಅವರ ಪುತ್ರ ಕ್ಲೇವಿನ್‌ ಅವಿನ್‌ ರೋಡ್ರಿಗಸ್‌ (25) ಎಂದು ಗುರುತಿಸಲಾಗಿದೆ.

  ಉದ್ಯೋಗಕ್ಕಾಗಿ ವಿಸಿಟಿಂಗ್‌ ವೀಸಾದಲ್ಲಿ ಆರು ತಿಂಗಳ ಹಿಂದೆ ದುಬೈಗೆ ಹೋಗಿದ್ದರು. ಅಲ್ಲಿ ಅವರಿಗೆ ಪ್ರತಿಷ್ಠಿತ ಕಂಪೆನಿಯಲ್ಲಿ ಉದ್ಯೋಗವೂ ದೊರಕ್ಕಿತ್ತು. ಇನ್ನೊಂದು ವಾರದಲ್ಲಿ ಭಾರತಕ್ಕೆ ಹಿಂದಿರುಗಲಿದ್ದರು. ಅ. 11ರ ರಾತ್ರಿ ಸ್ನೇಹಿತನ ಜತೆಗೆ ಬೈಕ್‌ನಲ್ಲಿ ತೆರಳುತ್ತಿದ್ದಾಗ ಬೈಕ್‌ ರಸ್ತೆಯ ಡಿವೈಡರ್‌ಗೆ ಢಿಕ್ಕಿ ಹೊಡೆದಿತ್ತು. ಪರಿಣಾಮ ಬೈಕ್‌ ಹಿಂಬದಿ ಕುಳಿತಿದ್ದ ಕ್ಲೇವಿನ್‌ ಅವಿನ್‌ ಅವರ ರಸ್ತೆಗೆ ಎಸೆಯಲ್ಪಟ್ಟು ತೀವ್ರ ಸ್ವರೂಪದ ಪೆಟ್ಟಾಗಿ ಮೃತಪಟ್ಟರು.

  ದುಬೈ ಸರಕಾರದ ನಿಯಮಾವಳಿಯಂತೆ ಮೃತದೇಹ ವೈದ್ಯಕೀಯ ಪರೀಕ್ಷೆಗೆ ಒಳಪಡಿಟ್ಟಿದ್ದು, ಮೃತದೇಹ ಶನಿವಾರ ಬೆಳ್ತಂಗಡಿಗೆ ಬರಲಿದೆ ಎಂದು ಕುಟುಂಬದವರು ತಿಳಿಸಿದ್ದಾರೆ.

  ಅವಿವಾಹಿತರಾಗಿದ್ದ ಮೃತರು ತಂದೆ, ತಾಯಿ, ಸಹೋದರರನ್ನು ಅಗಲಿದ್ದಾರೆ. ಕ್ಲೀವಿನ್‌ ಮಡಂತ್ಯಾರು ಸೇಕ್ರೆಡ್‌ ಹಾರ್ಟ್‌ ಕಾಲೇಜಿನಲ್ಲಿ ಪದವಿ ಪೂರೈಸಿ ಬಳಿಕ ನಿಟ್ಟೆಯಲ್ಲಿ ಹೆಚ್ಚಿನ ವಿದ್ಯಾಭ್ಯಾಸ ಪಡೆದಿದ್ದರು.