ಕುಂದಾಪುರ: ಕಂದಾವರದ 2ನೇ ವಾರ್ಡಿಗೆ ಉಡುಪಿ ಮಾಜಿ ಡಿಸಿ ಪ್ರಿಯಾಂಕ ಹೆಸರು

•   Fri, Sep 09 2022 05:29:44 PM



• ಕುಂದಾಪುರ, ಸೆ 09 (DaijiworldNews/DB): ಇಂದು 28 ಕುಟುಂಬಗಳಿಗೆ ನಿವೇಶನ, ಕುಡಿಯುವ ನೀರು, ರಸ್ತೆ ಸಿಕ್ಕಿದರೆ ಅದು ಉಡುಪಿ ಜಿಲ್ಲೆಯ ಮಾಜಿ ಜಿಲ್ಲಾಧಿಕಾರಿ ಪ್ರಿಯಾಂಕ ಮೇರಿ ಪ್ರಾನ್ಸಿಸ್ ಅವರ ಪ್ರಾಮಾಣಿಕತೆಗೆ ಸಂದ ಗೌರವ ಎಂದು ವಿಶೇಷ ಸರ್ಕಾರಿ ಅಯೋಜಕ ಸತೀಶ್ ಕಾಳಾವರ್ಕರ್ ಹೇಳಿದ್ದಾರೆ.

  
  ಕುಂದಾಪುರ ತಾಲೂಕಿನ ಕಂದಾವರ ಗ್ರಾ.ಪಂ. ವ್ಯಾಪ್ತಿಯಲ್ಲಿ ಬರುವ ಕಂದಾವರ - ಸಟ್ವಾಡಿಯ 2ನೇಯ ವಾರ್ಡಿನಲ್ಲಿ ನಿರ್ಮಾಣಗೊಂಡ ಪ್ರಿಯಾಂಕ ನಗರದ ನಾಮಕರಣ ಸಂದರ್ಭದಲ್ಲಿ ಸನ್ಮಾನ ಸ್ವೀಕರಿಸಿ ಅವರು ಮಾತನಾಡಿದರು.

  ಈ ಕಾಲೋನಿಗೆ ಪ್ರಿಯಾಂಕ ನಗರ ಎನ್ನುವ ಹೆಸರಿಟ್ಟಿರುವುದು ಚರಿತ್ರೆಯನ್ನು ನಿರ್ಮಿಸಿದೆ. ಪ್ರಿಯಾಂಕ ಮೇಡಂ ಅವರು ದಲಿತರ ಧ್ವನಿಯಾಗಿದ್ದಾರೆ ಎಂದವರು ಹೇಳಿದರು.

  ಪ್ರಿಯಾಂಕ ನಗರ ನಾಮಫಲಕವನ್ನು ಉಡುಪಿ ಜಿಲ್ಲಾಧಿಕಾರಿ ಕೂರ್ಮ ರಾವ್ ಎಂ. ಅನಾವರಣಗೊಳಿಸಿದರು. ಪ್ರಿಯಾಂಕ ನಗರದ ನೀರು ಮತ್ತು ಬೆಳಕು ಕಾರ್ಯಕ್ರಮವನ್ನು ಕಂದಾವರ ಗ್ರಾ.ಪಂ.ಅಧ್ಯಕ್ಷೆ ಬಾಬಿ ಉದ್ಘಾಟಿಸಿ ಶುಭ ಹಾರೈಸಿದರು. ಭೂ ರಹಿತ 28 ಕುಟುಂಬಗಳಿಗೆ ಭೂಮಿ ಕೊಡುವಲ್ಲಿ ಹೋರಾಟ ಮಾಡಿದ ಕೃಷ್ಣಾ ಸಟ್ವಾಡಿ ಅವರನ್ನುಈ ವೇಳೆ ಗೌರವಿಸಲಾಯಿತು.

  ತಹಶೀಲ್ದಾರ ಕಿರಣ್ ಗೌರಯ್ಯ, ಕಂದಾವರ ಗ್ರಾ.ಪಂ.ಉಪಾಧ್ಯಕ್ಷೆ ಶೋಭಾ, ಗ್ರಾ.ಪಂ.ಸದಸ್ಯ ಅಭಿಜಿತ್ ಕೊಠಾರಿ, ಶೀನಾ ಪೂಜಾರಿ, ಗ್ರಾ.ಪಂ.ಮಾಜಿ ಸದಸ್ಯ ಸಂತೋಷ್ ಪೂಜಾರಿ, ಮೋಹನ್ ಚಂದ್ರ ಕಾಳಾವರ್ಕರ್, ಮಂಜು ಸಟ್ವಾಡಿ, ಈಶ್ವರ್ ಸಟ್ವಾಡಿ, ಗ್ರಾ.ಪಂ.ಮಾಜಿ ಸದಸ್ಯೆ ರಾಮು ಮೊದಲಾದವರು ಉಪಸ್ಥಿತರಿದ್ದರು. ಚಂದ್ರ ಕೆ. ಸ್ವಾಗತಿಸಿದರು. ರವೀಂದ್ರ ಜಿ. ಬಳ್ಕೂರು ನಿರೂಪಿಸಿದರು.