ಮಂಗಳೂರು: ತೆಂಗಿನಕಾಯಿ ಕೀಳಲು ಬಂದು, ಅತ್ಯಾಚಾರಕ್ಕೆ ಯತ್ನ: ಆರೋಪಿ ಬಂಧನ

•   Mon, Feb 04 2019 10:52:00 AM



• ಮಂಗಳೂರು, ಫೆ 4(MSP): ತೆಂಗಿನ ಮರದಿಂದ ಕಾಯಿ ಕಿತ್ತುಕೊಡುವುದಾಗಿ ಬಂದು ಮಹಿಳೆಯ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿದ್ದ ಆರೋಪಿಯೊಬ್ಬನನ್ನು ಬಜ್ಪೆ ಠಾಣೆ ಪೊಲೀಸರು ಶನಿವಾರ ಬಂಧಿಸಿದ್ದಾರೆ.

  

  ಮರಕಡ ನಿವಾಸಿ ವೆಂಕಟೇಶ್‌ (28) ಬಂಧಿತ ವ್ಯಕ್ತಿ. ಈತ ಶನಿವಾರ ಬೆಳಿಗ್ಗೆ ಮಳವೂರಿನಲ್ಲಿ ಮಹಿಳೆಯೊಬ್ಬರ ಮೇಲೆ ಅತ್ಯಾಚಾರಕ್ಕೆ ಯತ್ನಿಸಿ ಪರಾರಿಯಾಗಿದ್ದ.

  ಬೆಳಿಗ್ಗೆ 7.45ರ ಸುಮಾರಿಗೆ ಸಂತ್ರಸ್ತ ಮಹಿಳೆ ಮನೆಯ ಕೆಲಸದಲ್ಲಿ ನಿರತರಾಗಿದ್ದರು. ಆಗ ಅಲ್ಲಿಗೆ ಬಂದ ವೆಂಕಟೇಶ್‌ ತಾನು ತೆಂಗಿನ ಮರ ಹತ್ತಿ ಕಾಯಿ ಕೀಳುವ ಕೆಲಸ ಮಾಡುವುದಾಗಿ ಹೇಳಿದ್ದ. ಸಂತ್ರಸ್ತೆಯ ಮನೆಯಲ್ಲಿನ ತೆಂಗಿನ ಮರಗಳಿಂದ ಕಾಯಿ ಕಿತ್ತುಕೊಡುವುದಾಗಿ ಹೇಳಿ, ಮರ ಏರಿದ್ದ.

  ಕಾಯಿ ಕಿತ್ತು ಕೆಳಕ್ಕೆ ಹಾಕಿದ್ದ. ಅವುಗಳನ್ನು ಮಹಿಳೆ ಗೋಣಿ ಚೀಲಕ್ಕೆ ತುಂಬಿಸಲು ಮುಂದಾಗಿದ್ದರು. ಅಷ್ಟರಲ್ಲಿ ಆತ ಮರದಿಂದ ಇಳಿದು ಬಂದು ಅತ್ಯಾಚಾರಕ್ಕೆ ಯತ್ನಿಸಿದ್ದ. ಸಂತ್ರಸ್ತೆಯು ಜೋರಾಗಿ ಕಿರುಚಿದಾಗ ಸ್ಥಳದಿಂದ ಪರಾರಿಯಾಗಿದ್ದ. ಈ ಕುರಿತು ಮಹಿಳೆ ಬಜ್ಪೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.