ಮಂಗಳೂರು: ಹಲವು ಪ್ರಕರಣದ ಆರೋಪಿ, ಗಾಂಜಾ ಮಾರಾಟದ ಕಿಂಗ್ ಪಿನ್ ’ಗೂಡ್ಸ್‌ ರಹೀಂ ’ ಬಂಧನ

•   Thu, Jan 31 2019 10:29:21 AM



• ಮಂಗಳೂರು, ಜ 31(MSP): ಯುವಕರಿಗೆ ಹಾಗೂ ಕಾಲೇಜು ವಿದ್ಯಾರ್ಥಿಗಳಿಗೆ ಗಾಂಜಾ ಮಾರುತ್ತಿದ್ದ ಪ್ರಮುಖ ಆರೋಪಿ ಬಂದರ್‌ ಅನ್ಸಾರಿ ಕ್ರಾಸ್‌ ರಸ್ತೆಯ ಅಬ್ದುಲ್‌ ರಹೀಂ ಯಾನೆ ಗೂಡ್ಸ್‌ ರಹೀಂ ಯಾನೆ ಕಂಡಿ ರಹೀಂ(40)ನನ್ನು ಮಂಗಳೂರು ಸಿಸಿಬಿ ಪೊಲೀಸರು ಹಳೆ ಬಂದರಿನ ಪೋರ್ಟ್‌ ರಸ್ತೆಯಲ್ಲಿ ಬಂಧಿಸಿ 44,000 ರೂ. ಮೌಲ್ಯದ 1.100 ಕೆಜಿ ಗಾಂಜಾ, ಎರಡು ಮೊಬೈಲ್‌ ಫೋನ್‌ಗಳು ಹಾಗೂ 2,250 ರೂ. ಸಹಿತ ಒಟ್ಟು 47,750 ರೂ. ಮೌಲ್ಯದ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಆರೋಪಿ ಹಾಗೂ ಸೊತ್ತುಗಳನ್ನು ಬಂದರು ಪೊಲೀಸರಿಗೆ ಹಸ್ತಾಂತರಿಸಲಾಗಿದೆ.

  

  
  ವಿವಿಧ ಪ್ರಕರಣ

  ರಹೀಂ ವಿರುದ್ಧ ಈ ಹಿಂದೆ ಬಂದರು ಠಾಣೆಯಲ್ಲಿ ಗಾಂಜಾ ಮಾರಾಟಕ್ಕೆ ಸಂಬಂಧಪಟ್ಟಂತೆ 7 ಪ್ರಕರಣಗಳು ದಾಖಲಾಗಿವೆ. ಪೊಲೀಸರ ಕರ್ತವ್ಯಕ್ಕೆ ಅಡ್ಡಿಪಡಿಸಿದ ಪ್ರಕರಣ, ಪಣಂಬೂರು, ಬರ್ಕೆ, ಮಂಗಳೂರು ದಕ್ಷಿಣ ಪೊಲೀಸ್‌ ಠಾಣೆಯಲ್ಲಿ ಗಾಂಜಾ ಮಾರಾಟಕ್ಕೆ ಸಂಬಂಧಪಟ್ಟಂತೆ ತಲಾ ಒಂದು ಪ್ರಕರಣ ಸಹಿತ ಒಟ್ಟು 11 ಪ್ರಕರಣ ಆತನ ಮೇಲೆ ಇವೆ. ಅಲ್ಲದೆ ಗೂಂಡಾ ಕಾಯ್ದೆಯಡಿಯಲ್ಲಿ ಸುಮಾರು ಒಂದು ವರ್ಷ ನ್ಯಾಯಾಂಗ ಬಂಧನದಲ್ಲಿದ್ದ.