ಕಾಸರಗೋಡು: ರೈಲಿಗೆ ಕಿಡಿಗೇಡಿಗಳಿಂದ ಕಲ್ಲೆಸೆತ-ಇಬ್ಬರಿಗೆ ಗಾಯ

•   Sun, Jul 31 2022 08:54:46 AM



• ಕಾಸರಗೋಡು, ಜು 31 (DaijiworldNews/DB): ಮಂಗಳೂರು-ಕಣ್ಣೂರು ಮತ್ತು ಮಂಗಳೂರು-ತಿರುವನಂತಪುರಂ ರೈಲುಗಳಿಗೆ ಕಾಸರಗೋಡಿನ ಎರಿಯಾಲ್ ಮತ್ತು ಚೇರಂಗೈಯಲ್ಲಿ ಕಿಡಿಗೇಡಿಗಳು ಕಲ್ಲು ತೂರಾಟ ನಡೆಸಿದ ಘಟನೆ ಶುಕ್ರವಾರ ಸಂಜೆ ನಡೆದಿದೆ. ಘಟನೆಯಲ್ಲಿ ಇಬ್ಬರು ಪ್ರಯಾಣಿಕರು ಗಾಯಗೊಂಡಿದ್ದಾರೆ.

  ಕಲ್ಲೆಸೆದವರು ಐವರು ಬಾಲಕರು ಎಂದು ಪ್ರಯಾಣಿಕರು ರೈಲ್ವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಆದರೆ ಈ ಬಾಲಕರು ಯಾರು ಎಂಬುದು ಪತ್ತೆಯಾಗಿಲ್ಲ. ಘಟನೆಯಲ್ಲಿ ಇಬ್ಬರು ಪ್ರಯಾಣಿಕರು ಗಾಯಗೊಂಡಿದ್ದಾರೆ.

  ಕೆಲ ದಿನಗಳ ಹಿಂದೆ ರೈಲು ಹಳಿಗಳ ಮೇಲೆ ಕಗ್ಗಲ್ಲಿನ ತುಂಡುಗಳನ್ನಿರಿಸಿ ಅಪಾಯ ಉಂಟು ಮಾಡುವ ಕೃತ್ಯ ನಡೆದಿತ್ತು. ಕಾಸರಗೋಡು ಜಿಲ್ಲೆಯ ಬಂದ್ಯೋಡು ಮುಟ್ಟಂ, ಬೇಕಲ ಬಳಿಯ ಕೋಟಿ ಕುಳಂ, ಕಣ್ಣೂರು ಜಿಲ್ಲೆಯ ಪಾಪ್ಪಿನಶೇರಿ ಸೇರಿದಂತೆ ಏಳು ಕಡೆಗಳಲ್ಲಿ ಕಗ್ಗಲ್ಲಿನ ತುಂಡುಗಳನ್ನು ರೈಲು ಹಳಿಗಳ ಮೇಲಿಡಲಾಗಿತ್ತು. ಕಿಡಿಗೇಡಿಗಳ ಈ ಕೃತ್ಯದ ಬಗ್ಗೆ ಮಾಹಿತಿ ಪಡೆದ ಇಲಾಖೆ ಉದ್ಯೋಗಿಗಳು ಕೂಡಲೇ ಕಲ್ಲು ತೆರವುಗೊಳಿಸಿ ಸಂಭಾವ್ಯ ಅಪಾಯವನ್ನು ತಪ್ಪಿಸಿದ್ದರು.