ಕಾರು ಹಾಗೂ ಬೈಕಿನ ನಡುವೆ ಅಪಘಾತ: ಯುವಕ ದಾರುಣ ಸಾವು

•   Mon, Jan 21 2019 09:15:17 PM



• ಕುಂದಾಪುರ, ಜ 21(SM): ಬೈಕಿಗೆ ಕಾರೊಂದು ಮುಖಾಮುಖಿ ಡಿಕ್ಕಿಯಾದ ಪರಿಣಾಮ ಬೈಕ್ ಸವಾರ ಗಂಭೀರ ಗಾಯಗೊಂಡು ಆಸ್ಪತ್ರೆಗೆ ಸಾಗಿಸುವ ವೇಳೆ ಮೃತಪಟ್ಟ ಘಟನೆ ಬೈಂದೂರು ಪೊಲೀಸ್ ಠಾಣಾ ವ್ಯಾಪ್ತಿಯ ಗ್ರೀನ್ ವ್ಯಾಲೀ ಶಾಲೆ ಸಮೀಪದ ಭಾನುವಾರ ತಡ ರಾತ್ರಿ ನಡೆದಿದೆ. ಅಪಘಾತದಲ್ಲಿ ಸಾವನ್ನಪ್ಪಿದ ಬೈಕ್ ಸವಾರನನ್ನು ಶಿರೂರು ಬುಕಾರಿ ಕಾಲೋನಿ ನಿವಾಸಿ ರಾಶಿದ್ ಎಂದು ಗುರುತಿಸಲಾಗಿದೆ.

  

  ರಾಶಿದ್ ತನ್ನ ಬೈಕಿನಲ್ಲಿ ಭಾನುವಾರ ರಾತ್ರಿ ೧೧.೫೦ರ ಸುಮಾರಿಗೆ ಬೈಂದೂರು ಕಡೆಯಿಂದ ಶಿರೂರಿನ ತನ್ನ ಮನೆ ಕಡೆಗೆ ಪ್ರಯಾಣಿಸುತ್ತಿದ್ದರು. ಇದೇ ಸಂದರ್ಭ ಗ್ರೀನ್ ವ್ಯಾಲೀ ಶಾಲೆ ಸಮೀಪದ ರೈಲ್ವೇ ಟನೆಲ್ ಬಳಿ ಎದುರುಗಡೆಯಿಂದ ಬಂದ ಮಾರುತಿ ಸ್ವಿಪ್ಟ್ ಕಾರು ಡಿಕ್ಕಿ ಹೊಡೆದಿದೆ.

  ಅಪಘಾತದ ರಭಸಕ್ಕೆ ಬೈಕ್ ಸವಾರ ರಾಶಿದ್ ರಸ್ತೆಗೆಸೆಯಲ್ಪಟ್ಟಿದ್ದು, ತಲೆ, ಕೈಕಾಲುಗಳಿಗೆ ತೀವ್ರತರದ ಗಾಯಗಳಾಗಿದ್ದವು. ತಕ್ಷಣ ಬೈಂದೂರಿನ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಲಾಯಿತು. ಅಲ್ಲಿ ಪರೀಕ್ಷಿಸಿದ ವೈದ್ಯರು ರಾಶಿದ್ ಸಾವನ್ನಪ್ಪಿರುವುದಾಗಿ ತಿಳಿಸಿದ್ದಾರೆ.

  ಘಟನೆಯ ಕುರಿತಂತೆ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.