ಸ್ಕೂಟರ್ ಗೆ ಲಾರಿ ಡಿಕ್ಕಿ, ಲಾರಿಯಡಿ ಸಿಲುಕಿ ಮಹಿಳೆ ದಾರುಣ ಸಾವು

•   Thu, Jan 17 2019 08:55:41 PM



• ಕುಂದಾಪುರ, ಜ 17(SM): ಸರಕು ತುಂಬಿದ್ದ ಲಾರಿಯೊಂದು ಸ್ಕೂಟರಿಗೆ ಹಿಂಬದಿಯಿಂದ ಡಿಕ್ಕಿ ಹೊಡೆದ ಪರಿಣಾಮ ರಸ್ತೆಗೆಸೆಯಲ್ಪಟ್ಟ ಮಹಿಳೆಯ ಮೇಲೆ ಲಾರಿಯ ಹಿಂಬದಿ ಚಕ್ರ ಚಲಿಸಿದ ಪರಿಣಾಮ ಮಹಿಳೆ ಸ್ಥಳದಲ್ಲಿಯೇ ಸಾವನ್ನಪ್ಪಿದ ಧಾರುಣ ಘಟನೆ ಗುರುವಾರ ಸಂಜೆ ಬಸ್ರೂರು ಸಮೀಪದ ಮಾರ್ಗೋಳಿ ಎಂಬಲ್ಲಿ ನಡೆದಿದೆ. ಮೃತ ಮಹಿಳೆಯನ್ನು ಕೋಡಿ ನಿವಾಸಿ ಮೈಮೂನ(೫೦) ಎಂದು ಗುರುತಿಸಲಾಗಿದೆ.

  

  ಗುರುವಾರ ಮೈಮೂನ ಅವರು ತನ್ನ ಪತಿ ಹಾಜಿ ಅವರ ಜೊತೆಗೆ ಸ್ಕೂಟರಿನಲ್ಲಿ ತನ್ನ ತವರು ಮನೆ ಗುಲ್ವಾಡಿಯಿಂದ ಮಾರ್ಗೋಳಿಯ ದರ್ಗಾಕ್ಕೆ ತೆರಳಿ ಪ್ರಾರ್ಥನೆ ಸಲ್ಲಿಸಿ ಕೋಡಿಯ ಮನೆಗೆ ತರಳುತ್ತಿದ್ದ ವೇಳೆ ಅಪಘಾತ ಸಂಭವಿಸಿದೆ.

  ಮಾರ್ಗೋಳಿಯ ದರ್ಗಾದಿಂದ ರಾಜ್ಯ ಹೆದ್ದಾರಿಗೆ ತಿರುಗಿ ಕುಂದಾಪುರದ ಕಡೆಗೆ ಬರುತ್ತಿದ್ದ ವೇಳೆ ಶಿವಮೊಗ್ಗ ಕಡೆಯಿಂದ ಕುಂದಾಪುರದ ಕಡೆಗೆ ಸರಕು ತುಂಬಿಸಿಕೊಂಡು ಬರುತ್ತಿದ್ದ ೧೦ ಚಕ್ರದ ಲಾರಿ ಡಿಕ್ಕಿ ಹೊಡೆದಿದೆ. ಅಪಘಾತದಿಂದ ನಿಯಂತ್ರಣ ಕಳೆದುಕೊಂಡ ಹಿಂಬದಿ ಸವಾರೆ ಮೈಮೂನ ರಸ್ತೆಯ ನಡುವಿಗೆ ಎಸೆಯಲ್ಪಟ್ಟಿದ್ದಾರೆ. ಈ ವೇಳೆ ಹಿಂಬದಿಯಿಂದ ಬರುತ್ತಿದ್ದ ಲಾರಿಯ ಹಿಂಬದಿ ಚಕ್ರ ಮಹಿಳೆಯ ಮೇಲೆ ಚಲಿಸಿದೆ.

  ಘಟನೆಯಿಂದ ಮಹಿಳೆಯ ದೇಹ ಸಂಪೂರ್ಣ ಛಿದ್ರವಾಗಿದ್ದು, ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದಾರೆ. ಸ್ಕೂಟರ್ ಸವಾರ ಮೈಮೂನ ಅವರ ಪತಿ ಹಾಜಿ ಸಣ್ಣ ಪುಟ್ಟ ಗಾಯಗಳಿಂದ ಪಾರಾಗಿದ್ದಾರೆ.

  ಘಟನಾ ಸ್ಥಳಕ್ಕೆ ಡಿವೈಎಸ್ಪಿ ದಿನೇಶ್ ಕುಮಾರ್, ವೃತ್ತ ನಿರೀಕ್ಷಕ ಮಂಜಪ್ಪ, ಕುಂದಾಪುರ ಎಸೈ ಹರೀಶ್, ಕಂಡ್ಲೂರು ಎಸೈ ಶ್ರೀಧರ ನಾಯ್ಕ್ ಧಾವಿಸಿದ್ದು, ಅಸ್ತವ್ಯಸ್ತಗೊಂಡಿದ್ದ ಸಂಚಾರವನ್ನು ಸರಿಪಡಿಸಿದ್ದಾರೆ.

  ಕುಂದಾಪುರ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.