ಕಾರ್ಕಳ: ಏಕಾಏಕಿ ಮುನ್ನುಗಿದ ಕಾಡುಕೋಣಕ್ಕೆ ಬೈಕ್ ಡಿಕ್ಕಿ-ಸವಾರ ರೋಹಿತ್ ಡಿಮೆಲ್ಲೋ ಸಾವು

•   Wed, Jun 01 2022 10:37:48 PM



• ಕಾರ್ಕಳ, ಜೂ 01 (DaijiworldNews/SM): ಕಾಡು ಕೋಣವೊಂದು ಏಕಾಏಕಿ ರಸ್ತೆಗೆ ಮುನ್ನುಗಿದ್ದ ಪರಿಣಾಮವಾಗಿ ಬೈಕ್ ಸವಾರ ರೋಹಿತ್ ಡಿಮೆಲ್ಲೋ(25) ಮೃತಪಟ್ಟ ಘಟನೆ ಮಾಳ ಹುಕ್ರಟ್ಟೆ-ಬಜಗೋಳಿ ಸಾರ್ವಜನಿಕ ಡಾಮಾರು ರಸ್ತೆಯಲ್ಲಿ ಸಂಭವಿಸಿದೆ.

  ಮೇ 31ರ ರಾತ್ರಿ 7.45ರ ವೇಳೆ ರೋಹಿತ್ ಡಿಮೆಲ್ಲೋ ಎಂಬವರು ಹುಕ್ರಟ್ಟೆ ಕಡೆಯಿಂದ ಬಜಗೋಳಿ ಕಡೆಗೆ ರೋಲ್ಸನ್ ಡಿಸೋಜಾ(23) ಎಂಬವರನ್ನು ಮೋಟಾರು ಸೈಕಲ್‌ನಲ್ಲಿ ಸಹಸವಾರರನ್ನಾಗಿ ಕುಳ್ಳಿರಿಸಿಕೊಂಡು ಅಜಾಗರೂಕತೆಯಿಂದ ಸವಾರಿ ಮಾಡಿಕೊಂಡು ಹೋಗುತ್ತಿದ್ದಾಗ ಈ ಘಟನೆ ಸಂಭವಿಸಿದೆ.

  ರಸ್ತೆಯಲ್ಲಿ ಏಕಾಏಕಿ ಕಾಡುಕೋಣಗಳ ಹಿಂಡು ಬಂದಿದ್ದು, ಅದರಲ್ಲಿದ್ದ ಒಂದು ಕಾಡು ಕೋಣಕ್ಕೆ ಬೈಕ್ ಡಿಕ್ಕಿ ಹೊಡೆದಿತ್ತು. ಪರಿಣಾಮವಾಗಿ ಬೈಕ್ ಸವಾರರಿಬ್ಬರು ಡಾಂಬರು ರಸ್ತೆ ಬಿದ್ದು ತೀವ್ರ ತರದಲ್ಲಿ ಗಾಯಗೊಂಡಿದ್ದರು. ಗಾಯಾಳುಗಳನ್ನು ಕಾರ್ಕಳದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅಲ್ಲಿನ ವೈದ್ಯರು ಚಿಕಿತ್ಸೆ ನೀಡಿ ರೋಲ್ಸನ್ ಡಿಸೋಜನಿಗೆ ಪ್ರಾಥಮಿಕ ಚಿಕಿತ್ಸೆ ನೀಡಿ ಹೆಚ್ಚಿನ ಚಿಕಿತ್ಸೆಯ ಬಗ್ಗೆ ಮಣಿಪಾಲ ಕೆ.ಎಂ.ಸಿ. ಆಸ್ಪತ್ರೆಗೆ ದಾಖಲಿಸುವಂತೆ ಹಾಗೂ ರೋಹಿತ್ ಡಿಮೆಲ್ಲೋನನ್ನು ಸಾರ್ವಜನಿಕ ಸರಕಾರಿ ಆಸ್ಪತ್ರೆ ಕಾರ್ಕಳ ಇಲ್ಲಿಗೆ ಕರೆದುಕೊಂಡು ಹೋಗುವಂತೆ ತಿಳಿಸಿದ್ದರು.

  ಗಾಯಾಳು ರೋಹಿತ್ ಡಿಮೆಲ್ಲೋ ಅದಾಗಲೇ ಮೃತಪಟ್ಟಿರುವುದನ್ನು ಅಲ್ಲಿನ ವೈದ್ಯರು ಖಚಿತ ಪಡಿಸಿದ್ದಾರೆ. ಈ ಬಗ್ಗೆ ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣದ ದಾಖಲಾಗಿದೆ.