ಕಾಸರಗೋಡು: ಹೊಂಡಕ್ಕೆ ಉರುಳಿ ಬಿದ್ದ ಕಾರು - ಓರ್ವ ಮೃತ್ಯು, ನಾಲ್ವರಿಗೆ ಗಾಯ

•   Tue, Apr 19 2022 03:25:13 PM



• ಕಾಸರಗೋಡು, ಏ 19 (DaijiworldNews/HR): ನಿಯಂತ್ರಣ ತಪ್ಪಿದ ಕಾರು ರಸ್ತೆ ಬದಿಯ ಹೊಂಡಕ್ಕೆ ಉರುಳಿ ಬಿದ್ದ ಪರಿಣಾಮ ಗಂಭೀರ ಗಾಯಗೊಂಡು ಆಸ್ಪತ್ರೆಗೆ ದಾಖಲಿಸಲಾಗಿದ್ದ ಯುವಕನೋರ್ವ ಮೃತಪಟ್ಟ ಘಟನೆ ಕುಂಬಳೆ ಠಾಣಾ ವ್ಯಾಪ್ತಿಯ ಶಿರಿಯ ಎಂಬಲ್ಲಿ ನಡೆದಿದೆ.

  ರಾವಣೇಶ್ವರ ವಾಣಿಯಂಪಾರದ ನಿತೇಶ್ (24) ಮೃತಪಟ್ಟ ಯುವಕ. ಕಾರಲ್ಲಿದ್ದ ನಿತೇಶ್ ನ ಸಹೋದರ ಶ್ರವಣ್ (14), ಸಂಬಂಧಿಕರಾದ ರಕ್ಷಿತ್ (25) ಅಭಿಷೇಕ್ (25) ಮತ್ತು ಲೋಕೇಶ್ (35) ಗಾಯಗೊಂಡಿದ್ದು, ಈ ಪೈಕಿ ಶ್ರವಣ್ ಮತ್ತು ರಕ್ಷಿತ್ ಗಂಭೀರ ಗಾಯಗೊಂಡಿದ್ದಾರೆ.

  ಸೋಮವಾರ ಮುಂಜಾನೆ ಅಪಘಾತ ನಡೆದಿತ್ತು. ಪುತ್ತೂರು ದೇವಸ್ಥಾನದ ಉತ್ಸವದಲ್ಲಿ ಪಾಲ್ಗೊಂಡು ಮರಳುತ್ತಿದ್ದಾಗ ನಿಯಂತ್ರಣ ತಪ್ಪಿದ ಕಾರು ರಸ್ತೆ ಬದಿಯ ಹೊಂಡಕ್ಕೆ ಬಿದ್ದು ಈ ಅಪಘಾತ ನಡೆದಿತ್ತು.

  ಇನ್ನು ವಾಹನವೊಂದಕ್ಕೆ ಡಿಕ್ಕಿ ಹೊಡೆಯುವುದನ್ನು ತಪ್ಪಿಸಲೆತ್ನಿಸಿದಾಗ ನಿಯಂತ್ರಣ ತಪ್ಪಿದ ಕಾರು ಅಪಘಾತಕ್ಕೀಡಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

  ಕುಂಬಳೆ ಠಾಣಾ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.