ಬೆಳ್ತಂಗಡಿ : ವಾಮಚಾರ ನಡೆಸಿ ಖಾಸಗಿ ಜಾಗದಲ್ಲಿ ಅಪರಿಚಿತರಿಂದ ನಿಧಿಗಾಗಿ ಹುಡುಕಾಟ

•   Mon, Apr 18 2022 07:45:36 PM



• ಬೆಳ್ತಂಗಡಿ, ಏ 18 (DaijiworldNews/SM) : ಇಲ್ಲಿನ ಸವಣಾಲು ಕೆರೆಕೋಡಿ ಎಂಬಲ್ಲಿ ಯಾರೋ ವಾಮಚಾರ ನಡೆಸಿ, ಭೂಮಿಯನ್ನು ಅಗೆದು ನಿಧಿ ಹುಡುಕಾಟ ನಡೆಸಿರುವ ಘಟನೆ ಬೆಳಕಿಗೆ ಬಂದಿದೆ. ಸವಣಾಲು ನಿವಾಸಿ ರಾಜೇಶ್ ಎಂಬವರಿಗೆ ಸೇರಿದ್ದ ಜಾಗದಲ್ಲಿ ಈ ನಿಧಿ ಹುಡುಕಾಟ ಕೃತ್ಯ ನಡೆದಿದೆ.

  ಯಾರೋ ಅಪರಿಚಿತರು ಭೂಮಿಯನ್ನು ಅಗೆದಿರುವ ಜಾಗದಲ್ಲಿ ಕುಂಕುಮ, ಬಾಟಲ್ ಗಳು, ಲಿಂಬೆಹಣ್ಣು, ತೆಂಗಿನಕಾಯಿ ಹಾಗೂ ಇನ್ನಿತರ ವಸ್ತುಗಳು ಸೇರಿದಂತೆ ಸುಮಾರು ೫ ಅಡಿ ಆಳವಾದ ಗುಂಡಿಯನ್ನು ಅಗೆದು ಹುಡುಕಾಟ ನಡೆಸಿರುವ ಕುರುಹುಗಳು ಪತ್ತೆಯಾಗಿದೆ. ಸ್ಥಳೀಯ ವ್ಯಕ್ತಿಯೋರ್ವರು ಈ ಜಾಗವಾಗಿ ಹೋಗುತ್ತಿದ್ದ ಸಂದರ್ಭದಲ್ಲಿ ಗಮನಿಸಿ ರಾಜೇಶ್ ಎಂಬವರಿಗೆ ಮಾಹಿತಿ ನೀಡಿದ್ದಾರೆ. ಈ ಬಗ್ಗೆ ರಾಜೇಶ್ ಅವರೂ ಪರಿಶೀಲನೆ ನಡೆಸಿದಾಗಲೂ ನಿಧಿ ಹುಡುಕಾಟ ನಡೆಸಿದ ವಸ್ತುಗಳು ಪತ್ತೆಯಾಗಿದೆ.

  ಈ ಬಗ್ಗೆ ಬೆಳ್ತಂಗಡಿ ಪೊಲೀಸ್ ಠಾಣೆಯಲ್ಲಿ ಯಾರೋ ಅಪರಿಚಿತರು ನಿಧಿ ಇದೆ ಎಂದು ಶಂಕಿಸಿ ಈ ಕೃತ್ಯ ನಡೆದಿರುವ ಅನುಮಾನದ ಮೇರೆಗೆ ದೂರು ದಾಖಲಿಸಲಾಗಿದೆ.