ಉಡುಪಿ: 'ಕಾಂಗ್ರೆಸ್ ಚಿಂತೆ ಬಿಟ್ಟು ಕುಡಿಯುವ ನೀರು ವಿದ್ಯುತ್ ಪೂರೈಕೆಗೆ ಗಮನ ಹರಿಸಿ'-ಯುವ ಕಾಂಗ್ರೆಸ್

•   Fri, Mar 11 2022 05:55:07 PM



• ಉಡುಪಿ, ಮಾ 11 (DaijiworldNews/DB): ಇಂಧನ ಸಚಿವರ ಕ್ಷೇತ್ರದಲ್ಲಿಯೇ ದಿನ ನಿತ್ಯ ಕಣ್ಣಾಮುಚ್ಚಾಲೆಯಾಡುತ್ತಿರುವ ವಿದ್ಯುತ್, ಏರಿಕೆಯಾಗುತ್ತಿರುವ ಪೆಟ್ರೋಲ್, ಡೀಸೆಲ್ ಬೆಲೆ ಮುಂತಾದ ಜ್ವಲಂತ ಸಮಸ್ಯೆಗಳನ್ನು ಪರಿಹರಿಸುವುದು ಬಿಟ್ಟು ಕಾಂಗ್ರೆಸ್ ಪಕ್ಷದ ಬಗ್ಗೆ ಚಿಂತೆ ಮಾಡುವುದನ್ನು ಬಿಜೆಪಿ ನಿಲ್ಲಿಸಲಿ ಎಂದು ಕಾರ್ಕಳ ಬ್ಲಾಕ್ ಯುವ ಕಾಂಗ್ರೆಸ್ ಅಧ್ಯಕ್ಷ್ಯ ಯೋಗೀಶ್ ನಯನ್ ಇನ್ನಾ ಹೇಳಿದ್ದಾರೆ.

  ಸ್ವ ಕ್ಷೇತ್ರದ ಜನತೆ ಎದುರಿಸುತ್ತಿರುವ ಮೊಬೈಲ್ ನೆಟ್ವರ್ಕ್ ಸಮಸ್ಯೆ, ಕುಡಿಯುವ ನೀರಿನ ಸಮಸ್ಯೆ, ವ್ಯತ್ಯಯವಾಗುತ್ತಿರುವ ವಿದ್ಯುತ್ ಪೂರೈಕೆ ಇದರ ಬಗ್ಗೆ ಚಿಂತಿಸಿ ಜನತೆಯ ಋಣ ಸಂದಾಯ ಮಾಡುವುದು ಬಿಟ್ಟು ದಿನ ನಿತ್ಯ ಕಾಂಗ್ರೆಸ್ ಜಪ ಮಾಡುತ್ತಿರುವುದು ನಿಮಗೆ ಕಾಂಗ್ರೆಸ್ ಮೇಲೆ ಇರುವ ಭಯವನ್ನು ಸೂಚಿಸುತ್ತದೆ. ಧರ್ಮ ಧರ್ಮಗಳ ನಡುವೆ ಕಿಚ್ಚು ಹಬ್ಬಿಸಿ ಒಡೆದಾಳುವ ನೀತಿ ಆಡುತ್ತಿರುವ ಬಿಜೆಪಿ ಭೂತ ಕಾಲದಲ್ಲಿ ಲೀನವಾಗುವ ದಿನಗಳು ದೂರವಿಲ್ಲ. ಯಾಕೆಂದರೆ ದೇಶದ ಜನರು ಧರ್ಮ ಸಹಿಷ್ಣುಗಳು, ನಿಮ್ಮ ಪಕ್ಷದ ನಿಗೂಢ ಕಾರ್ಯಸೂಚಿಗಳನ್ನು ದೇಶದ ಜನ ಅರಿತ ದಿನವೇ ಬಿಜೆಪಿ ದೇಶದಿಂದ ಮಾಯವಾಗಲಿದೆ ಎಂದವರು ಪ್ರಕಟನೆ ಮೂಲಕ ತಿಳಿಸಿದ್ದಾರೆ.

  ಬಡವ- ಬಲ್ಲಿದನಿಗೆ, ದೌರ್ಜನ್ಯಕ್ಕೊಳಗಾದ ಅಸಹಾಯಕನಿಗೆ ಸ್ವಾಭಿಮಾನದ ಬಾಳು ಕೊಟ್ಟ ಕಾಂಗ್ರೆಸ್ ಪಕ್ಷ ಯಾವತ್ತೂ ನಾಶವಾಗದು ಎಂದು ಸಚಿವ ಸುನೀಲ್ ಕುಮಾರ್ ಅವರ ಕಾಂಗ್ರೆಸ್ ಮೇಲಿನ ಟೀಕೆಗೆ ಯೋಗೀಶ್ ನಯನ್ ಇನ್ನಾ ಪ್ರತಿಕ್ರಿಯಿಸಿದ್ದಾರೆ.