ಉಡುಪಿ: ಬೋಟಿನಲ್ಲಿ ಮೀನುಗಾರನ ಶವ ಪತ್ತೆ - ಕೊಲೆ ಶಂಕೆ

•   Tue, Dec 18 2018 10:53:25 AM



• ಉಡುಪಿ, ಡಿ 18 (MSP): ಮೀನುಗಾರಿಕೆ ಮುಗಿಸಿ ಮಲ್ಪೆ ಬಾಪುತೋಟದ ದಕ್ಕೆಯಲ್ಲಿ ಲಂಗರು ಹಾಕಿದ್ದ ಬೋಟ್‌ನಲ್ಲಿ ತಂಗಿದ್ದ ಂಇನುಗಾರನ ಸವ ಸೋಮವಾರ ಮುಂಜಾನೆ ಬೋಟ್ನೊಳಗೆ ರಕ್ತದ ಮಡುವಿನಲ್ಲಿ ಪತ್ತೆಯಾಗಿದೆ. ಇದು ಕೊಲೆಯೋ ಅಥವಾ ಆಯತಪ್ಪಿ ಬಿದ್ದು ಆಗಿರುವ ಸಾವೋ ಎಂಬುವುದು ಖಚಿತವಾಗಿಲ್ಲ. ಆದರೆ ಜತೆಗಿದ್ದ ವ್ಯಕ್ತಿ ಪರಾರಿಯಾಗಿರುವುದರಿಂದ ಕೊಲೆಯ ಶಂಕೆ ಹೆಚ್ಚಾಗಿದೆ.

  

  ಮೃತಪಟ್ಟವರನ್ನು ಒಡಿಶಾ ಮೂಲದ ಪ್ರೀತಮ್‌ (24) ಎಂದು ಗುರುತಿಸಲಾಗಿದ್ದು, ಆರೋಪಿ ಕೊಪ್ಪಳ ಮೂಲದ ಮಾರುತಿ (40) ತಲೆಮರೆಸಿಕೊಂಡಿದ್ದಾನೆ.

  ಡಿ.10ರಂದು ರಾತ್ರಿ 11 ಗಂಟೆಗೆ ದತ್ತರಾಜ್‌ ಮಾಲೀಕತ್ವದ ಬೋಟ್‌ನಲ್ಲಿ ಕಟಪಾಡಿ ರಾಜೇಶ್‌ ತಾಂಡೇಲ ಹಾಗೂ ಕಾರ್ಮಿಕರಾದ ತೊಟ್ಟಂನ ಗಿರೀಶ್‌, ಒಡಿಶಾದ ಪ್ರೀತಮ್‌, ಬಿರೇಂದ್ರ ಹಾಗೂ ಕೊಪ್ಪಳದ ಮಾರುತಿ ಮೀನುಗಾರಿಕೆಗೆ ತೆರಳಿದ್ದರು. ಮೀನುಗಾರಿಕೆ ಮುಗಿಸಿ ಡಿ.16ರಂದು ಮಲ್ಪೆ ಬಂದರಿಗೆ ಬಂದಿದ್ದು, ಬೋಟ್‌ನಲ್ಲಿದ್ದ ಮೀನು ಖಾಲಿ ಮಾಡಿ ಬಂದರಿನ ಬಾಪುತೋಟದ ದಕ್ಕೆಯಲ್ಲಿ ಬೋಟ್‌ನ್ನು ಸಂಜೆ 5 ಗಂಟೆಗೆ ಲಂಗರು ಹಾಕಲಾಗಿತ್ತು.

  ರಾಜೇಶ್‌, ಗಿರೀಶ್‌ ರಾತ್ರಿ ಮನೆಗೆ ಹೋಗಿದ್ದು, ಬಿರೇಂದ್ರ ರಜೆಯಲ್ಲಿ ಒಡಿಶಾಕ್ಕೆ ಹೋಗಿದ್ದರು. ಬೋಟ್‌ನಲ್ಲಿ ಕೊಪ್ಪಳದ ಮಾರುತಿ ಹಾಗೂ ಒಡಿಶಾದ ಪ್ರೀತಮ್‌ ರಾತ್ರಿ ಮಲಗಿದ್ದರು ಎನ್ನಲಾಗಿದೆ.

  ಡಿ.17ರಂದು ಬೆಳಗ್ಗೆ 5.45ಕ್ಕೆ ದತ್ತರಾಜ್‌ ಹಾಗೂ ತಾಂಡೇಲರು ಬಂದು ನೋಡುವಾಗ ಮಾರುತಿ ಮಾತ್ರವೇ ಕಾಣಿಸಿಕೊಂಡಿದ್ದು, ಬೋಟ್‌ನ ಕ್ಯಾಬಿನ್‌ ಡೆಕ್‌ಗ್ಲಾಸ್‌ನಲ್ಲಿ ರಕ್ತದ ಕಲೆ ಇತ್ತು. ಎಂಜಿನ್‌ ರೂಂನಲ್ಲಿ ನೋಡಿದಾಗ 10 ಅಡಿ ಆಳದಲ್ಲಿ ಪ್ರೀತಮ್‌ನ ಮೃತದೇಹ ಪತ್ತೆಯಾಗಿದೆ. ಈ ಬಗ್ಗೆ ಮಲ್ಪೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.