ಬಂಟ್ವಾಳ: ನಿರ್ಲಕ್ಷದ ಚಾಲನೆ, ಬೈಕ್ ಗಳ ನಡುವೆ ಅಪಘಾತ-ಓರ್ವ ಸವಾರ ಸಾವು

•   Sun, Dec 02 2018 11:30:37 PM



• ಬಂಟ್ವಾಳ, ನ 02(SM): ಬೈಕ್ ಗಳ ಮಧ್ಯೆ ಡಿಕ್ಕಿಯಾಗಿ ಸವಾರ ಮೃತಪಟ್ಟು ಇಬ್ಬರು ಗಾಯಗೊಂಡ ಘಟನೆ ಬಂಟ್ವಾಳದ ಇರಾಪದವು ಎಂಬಲ್ಲಿ ನಡೆದಿದೆ. ಯೋಗೀಶ್ ಮೃತಪಟ್ಟ ಬೈಕ್ ಸವಾರ.‌

  

  ಸಹಸವಾರ ರವೀಶ್ ಮತ್ತು ಇನ್ನೋರ್ವ ಬೈಕ್ ಸವಾರ ಗಣೇಶ್ ಗಾಯಗೊಂಡಿದ್ದು, ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗಿದೆ. ನಾಲ್ಕು ಮಂದಿ ಸ್ನೇಹಿತರು ಮುಡಿಪುವಿನಲ್ಲಿ ನಡೆಯುತ್ತಿದ್ದ ವಸ್ತು ಪ್ರದರ್ಶನವನ್ನು ನೋಡಿ ಹಿಂತಿರುಗುವ ವೇಳೆ ಯೋಗಿಶ್ ಅವರ ಅತೀ ವೇಗದ ಚಾಲನೆ ಮತ್ತು ನಿರ್ಲಕ್ಷ್ಯದ ಚಾಲನೆಯಿಂದ ಸ್ನೇಹಿತ ಗಣೇಶ್ ಅವರ ಬೈಕ್ ಡಿಕ್ಕಿಯಾಗಿ ಬಳಿಕ ಸ್ಕಿಡ್ ಆಗಿ ಬಿದ್ದಿದ್ದಾರೆ.

  ಗಂಭೀರ ಗಾಯಗೊಂಡ ಯೋಗೀಶ್ ಅವರನ್ನು ಮಂಗಳೂರು ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ‌

  ಬಂಟ್ವಾಳ ಟ್ರಾಫಿಕ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ‌