ಗಾಯಕಿ, ನಟಿ ವಸುಂಧರಾ ದಾಸ್ ಗೆ ಅವಾಚ್ಯವಾಗಿ ನಿಂದಿಸಿದ ಕ್ಯಾಬ್ ಚಾಲಕ - ಕೇಸ್ ದಾಖಲು

•   Fri, Nov 02 2018 12:37:56 PM



• ಬೆಂಗಳೂರು, ನ 02 (MSP): ಖ್ಯಾತ ಗಾಯಕಿ, ನಟಿ ವಸುಂಧರಾ ದಾಸ್‌ ಅವರ ಕಾರನ್ನು ಅಡ್ಡಗಟ್ಟಿ ಕ್ಯಾಬ್ ಚಾಲಕನೊಬ್ಬ ಕೆಟ್ಟ ಶಬ್ಧಗಳಿಂದ ನಿಂದಿಸಿದ ಘಟನೆ ನಡೆದಿದ್ದು, ವಸುಂಧರಾ ದಾಸ್‌ ಕ್ಯಾಬ್ ಚಾಲಕನ ವಿರುದ್ದ ದೂರು ದಾಖಲಿಸಿದ್ದಾರೆ. ಬೆಂಗಳೂರಿನ ಹೃದಯ ಭಾಗವಾದ ಮಲ್ಲೇಶ್ವರಂನ 18 ನೇ ಕ್ರಾಸ್‌ನಲ್ಲಿ ಅಕ್ಟೋಬರ್‌ 29 ರಂದು ಸಂಜೆ 4.30 ರ ವೇಳೆಗೆ ಈ ಘಟನೆ ನಡೆದಿದ್ದು, ಕ್ಯಾಬ್‌ ಚಾಲಕನೊಬ್ಬ ದಾರಿ ಬಿಟ್ಟುಕೊಡಲಿಲ್ಲ ಎಂಬ ಕಾರಣಕ್ಕೆ ವಸುಂಧರಾ ಅವರ ಕಾರನ್ನು ಬೆನ್ನಟ್ಟಿ ದ್ದು ಅಡ್ಡಗಟ್ಟಿ ಅವಾಚ್ಯ ಶಬ್ಧಗಳಿಂದ ನಿಂದಿಸಿದ್ದಾನೆ.

  

  
  ಮಲ್ಲೇಶ್ವರಂ ಭಾಷ್ಯಂ ಸರ್ಕಲ್ ನ ಸಿಗ್ನಲ್ ಬಳಿ ಕ್ಯಾಬ್ ಚಾಲಕ ಬಲಕ್ಕೆ ತಿರುಗಬೇಕಾಗಿತ್ತು. ಆದರೆ ವಸುಂಧರ ದಾಸ್ ಅವರು ಚಲಾಯಿಸುತ್ತಿದ್ದ ಕಾರು , ಕ್ಯಾಬ್ ಗೆ ತಡೆಯಾಗಿದೆ. ಇದರಿಂದ ಕೋಪಗೊಂಡ ಆ ಕ್ಯಾಬ್ ಚಾಲಕ ಮಲ್ಲೇಶ್ವರಂ ಮಾರ್ಗೋಸಾ ರಸ್ತೆವರೆಗೂ ಹಿಂಬಾಲಿಸಿಕೊಂಡು ಬಂದು ವಸುಂಧರ ದಾಸ್ ಗೆ ಅವಾಚ್ಯ ಶಬ್ದಗಳಿಂದ ಬೈದಿದ್ದಾನೆ.ವಸುಂಧರಾ ದಾಸ್‌ ಅವರೊಡನೆ ತೀವ್ರ ವಾಗ್ವಾದ ನಡೆಸಿದ್ದು, ಈ ವೇಳೆ ಸಾರ್ವಜನಿಕರು ಜಮಾವಣೆಗೊಂಡಿದ್ದಾರೆ. ಅಷ್ಟರಲ್ಲಾಗಲೇ ಕ್ಯಾಬ್‌ ಚಾಲಕ ಸ್ಥಳದಿಂದ ತೆರಳಿದ್ದಾನೆ ಎಂದು ಹೇಳಿದ್ದಾರೆ.

  ಘಟನೆಯಿಂದ ನೊಂದ ವಸುಂಧರ ದಾಸ್ ಮಲ್ಲೇಶ್ವರಂ ಠಾಣೆಗೆ ದೂರು ನೀಡಿದ್ದಾರೆ. ಸೆಕ್ಷನ್‌ 509 341,364 ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ಕ್ಯಾಬ್‌ ಚಾಲಕನಿಗಾಗಿ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.