ವಿಮಾನದಿಂದ ಕೆಳಗೆಬಿದ್ದ ಏರ್ ಇಂಡಿಯಾ ಗಗನಸಖಿ - ಮುಂಬೈ ನಿಲ್ಡಾಣದಲ್ಲಿ ಘಟನೆ

•   Mon, Oct 15 2018 09:52:47 AM



• ಮುಂಬೈ, ಅ 15 (MSP): ಏರ್ ಇಂಡಿಯಾ ವಿಮಾನದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ 53 ವರ್ಷದ ಗಗನಸಖಿ ವಿಮಾನದಿಂದ ಕೆಳಗೆ ಬಿದ್ದು ತೀವ್ರ ಗಾಯಗೊಂಡಿರುವ ಘಟನೆ ಸೋಮವಾರ ಬೆಳಗ್ಗೆ ಮುಂಬೈನಲ್ಲಿ ನಡೆದಿದೆ.

  

  ಮುಂಬೈನ ಛತ್ರಪತಿ ಶಿವಾಜಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ನವದೆಹಲಿಗೆ ಹೊರಡಲು ತಯಾರಾಗಿದ್ದ ಏರ್‌ ಇಂಡಿಯಾ ಎಐ 864 ವಿಮಾನದಿಂದ ಗಗನಸಖಿ ಕೆಳಗೆ ಬಿದ್ದಿದ್ದಾರೆ. ಅವರನ್ನು ಇಲ್ಲಿನ ನಾನಾವತಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ವಿಮಾನದ ಪುಷ್‌ ಬ್ಯಾಕ್‌ ಬಾಗಿಲು ಮುಚ್ಚುವ ಸಂದರ್ಭದಲ್ಲಿ ಈ ಘಟನೆ ನಡೆದಿರುವುದಾಗಿ ವರದಿಯಾಗಿದೆ. ಘಟನೆಯಿಂದ ಗಗನಸಖಿ ಹರ್ಷ ಲೋಬೋ ಅವರ ಕಾಲಿಗೆ ತೀವ್ರ ಸ್ವರೂಪದ ಗಾಯಗಳಾಗಿದೆ ಎಂದು ತಿಳಿದುಬಂದಿದೆ.

  ಮುಂಬೈ ವಿಮಾನ ನಿಲ್ಡಾಣದಿಂದ ಏರ್‌ ಇಂಡಿಯಾ ಎಐ 864 ವಿಮಾನವು ನಿಗದಿಯಂತೆ ಬೆಳಗ್ಗೆ 7ಗಂಟೆಗೆ ಹಾರಾಟ ನಡೆಸಬೇಕಾಗಿದ್ದು ,ಈ ಸಂದರ್ಭ ಘಟನೆ ನಡೆದಿದೆ. ಹೀಗಾಗಿ ವಿಮಾನವೂ 90 ನಿಮಿಷ ತಡವಾಗಿ ಅಂದರೆ ಸುಮಾರು 8.30 ಕ್ಕೆ ಹಾರಾಟ ನಡೆಸಿತು. ಈ ಬಗ್ಗೆ ಏರ್ ಇಂಡಿಯಾ ವಕ್ತಾರರೂ ಮಾಹಿತಿಗೆ ಲಭ್ಯವಾಗಿಲ್ಲ.