ಜನಪ್ರಿಯ ತುಳು ಟಿವಿ ಕಾರ್ಯಕ್ರಮ 'ಪ್ರೈವೇಟ್‌ ಚಾಲೆಂಜ್‌' 60 ನೇ ಸಂಚಿಕೆಯೊಂದಿಗೆ ಮುಕ್ತಾಯ

•   Sat, Jul 10 2021 05:22:40 PM



• ಮಂಗಳೂರು, ಜು 10 (DaijiworldNews): "ಪ್ರೈವೇಟ್‌ ಚಾಲೆಂಜ್‌" ತುಳುನಾಡಿನಲ್ಲಿ ಮನೆ ಮಾತಾಗಿರುವ ಕಾಮಿಡಿ ಕಾರ್ಯಕ್ರಮ. ಕೊರೊನಾ ಲಾಕ್‌ಡೌನ್‌ ಮೊದಲ ಹಂತದ ಸಂದರ್ಭ ಜನರ ಮನೋಸ್ಥೈರ್ಯ ಹೆಚ್ಚಿಸಲು ಹಾಗೂ ಜನತೆಗೆ ಮನೋರಂಜನೆ ನೀಡುವ ನಿಟ್ಟಿನಲ್ಲಿ ದಾಯ್ಜಿವಲ್ಡ್‌ ಟಿವಿಯಲ್ಲಿ ಪ್ರಾರಂಭಗೊಂಡಿದ್ದ ಹಾಸ್ಯಮಯ ಕಾರ್ಯಕ್ರಮ. ಇದರ 59 ಸಂಚಿಕೆಗಳನ್ನು ಯಶಸ್ವಿಯಾಗಿ ಪ್ರದರ್ಶನಗೊಂಡಿದ್ದು, ಇದರ ಕೊನೆಯ ಹಾಗೂ 60 ನೇ ಸಂಚಿಕೆ ಜುಲೈ 11ರಂದು ರಾತ್ರಿ 9 ಗಂಟೆಗೆ ಪ್ರಸಾರವಾಗಲಿದೆ.

   

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  ಕೊರೊನಾ ಲಾಕ್‌‌ಡೌನ್‌ನಲ್ಲಿ ಸಿನಿಮಾ, ನಾಟಕ ಮತ್ತು ಯಕ್ಷಗಾನ ಮುಂತಾದ ಪ್ರದರ್ಶನ ಸಂಪೂರ್ಣ ಸ್ಥಗಿತಗೊಂಡಿತ್ತು. ಈ ಸಂದರ್ಭ ತುಳುನಾಡಿನ ಹಾಸ್ಯ ಕಲಾವಿದರಾದ ಅರವಿಂದ ಬೋಳಾರ್ ಹಾಗೂ ದಾಯ್ಜಿವಲ್ಡ್‌ ಸಂಸ್ಥೆಯ ಪ್ರಧಾನ ಸಂಪಾದಕರಾದ ವಾಲ್ಟರ್‌ ನಂದಳಿಕೆ ಇವರಿಬ್ಬರ ಜೋಡಿಯಾಗಿ ಮೂಡಿಬಂದ ಪ್ರೈವೇಟ್ ಚಾಲೆಂಜ್ ಎಲ್ಲ ವರ್ಗದ ಕಲಾಪ್ರಿಯರನ್ನು, ಪ್ರೇಕ್ಷಕರನ್ನು ಗಮನಸೆಳೆಯುವಲ್ಲಿ ಯಶಸ್ವಿಯಾಯಿತು. ತುಳುನಾಡಿನ ಮಾಣಿಕ್ಯ ಅರವಿಂದ ಬೋಳಾರ್ ಮತ್ತು ವಾಲ್ಟರ್ ನಂದಳಿಕೆ ಅವರ ಕೆಮೆಸ್ಟ್ರಿ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿತು. ಮಾತ್ರವಲ್ಲದೆ ಸದಾ ವಿಭಿನ್ನವಾದ ಆಲೋಚನೆ, ನೂತನ ಕಥಾ ಹಂದರ, ವಿವಿಧ ಪಾತ್ರಗಳ ಮೂಲಕ ಪ್ರಸಾರವಾಗುವ ಕಾರ್ಯಕ್ರಮ ಪ್ರೈವೇಟ್‌ ಚಾಲೆಂಜ್‌ ಪ್ರೇಕ್ಷಕರಿಗೆ ಪ್ರತಿವಾರ ಕುತೂಹಲದೊಂದಿಗೆ ಕಾಯುವಂತಾಯಿತು.

  ಕೊರೊನಾದ ಆತಂಕದ ವೇಳೆ ಈ ಕಾರ್ಯಕ್ರಮ ಕರಾವಳಿಗರಿಗೆ ಮನೋರಂಜನೆಯ ಜೊತೆಗೆ ಹೊಸ ಹುರುಪು ನೀಡಿದ್ದು, ವಿಶೇಷ ಎಂದರೆ ಜನರನ್ನು ಹಾಸ್ಯದ ಹೊನಲಲ್ಲೇ ತೇಲಾಡಿಸುವ ತುಳುನಾಡ ಮಾಣಿಕ್ಯ, ತುಳುನಾಡಿನ ಹಾಸ್ಯ ಕಲಾವಿದ ಈ ಕಾರ್ಯಕ್ರಮದ ಮೂಲಕ ಅರವಿಂದ್‌‌ ಬೋಳಾರ್‌ ಅವರು 60 ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಮೀನು ಮಾರಾಟಗಾರ, ಬೀಡಿ ಕಟ್ಟುವ ಮಹಿಳೆ, ಗೃಹಿಣಿ, ಪುಸ್ಕಾಂ ಅಧ್ಯಕ್ಷ, ಭೂಗತ ಜಗತ್ತಿನ ಡಾನ್‌, ಭಿಕ್ಷುಕ, ಶಾಲಾ ವಿದ್ಯಾರ್ಥಿನಿ, ಪಾನ್‌ವಾಲಾ, ರೌಡಿ ರಾಧಕ್ಕ ಮುಂತಾದ ಪಾತ್ರಗಳ ಮೂಲಕ ಪ್ರೇಕ್ಷಕರಿಗೆ ರಸದೌತಣ ಬಡಿಸಿದ್ದಾರೆ. ಪ್ರೈವೇಟ್‌ ಚಾಲೆಂಜ್‌ನ ಎರಡು ಸಂಚಿಕೆಯಲ್ಲಿ ಅರವಿಂದ್‌ ಬೋಳಾರ್‌ ಅವರು ಡಬಲ್ ಆಕ್ಟಿಂಗ್ ಮಾಡಿದ್ದು, ಇದು ತುಳು ದೂರದರ್ಶನದಲ್ಲಿ ಮಾಡಿದ ಪ್ರಥಮ ಹಾಗೂ ಯಶಸ್ವಿ ಪ್ರಯೋಗವಾಗಿದೆ. ಈ ಕಾರ್ಯಕ್ರಮದಲ್ಲಿ ಮೂಡಿಬಂದ ಪ್ರತಿ ಪಾತ್ರವೂ ನಮ್ಮ ಸಮಾಜದಲ್ಲಿ ಸುತ್ತಮುತ್ತ ಕಂಡುಬರುವ ವ್ಯಕ್ತಿಗಳನ್ನು ಪ್ರತಿನಿಧಿಸುವ ಪಾತ್ರವಾಗಿದ್ದು, ಹಾಸ್ಯದೊಂದಿಗೆ ಸಂದೇಶವೂ ನೀಡುತ್ತಿತ್ತು. ಈ ಕಾರ್ಯಕ್ರಮವನ್ನು ಅಷ್ಟೇ ನವಿರಾಗಿ ರೂಪಿಸಿದವರು ದಾಯ್ಜಿವಲ್ಡ್‌ ಸಂಸ್ಥೆಯ ಪ್ರಧಾನ ಸಂಪಾದಕರಾದ ವಾಲ್ಟರ್‌ ನಂದಳಿಕೆ. ಬೋಳಾರ್ ಅವರಂತೆಯೇ ನಂದಳಿಕೆಯವರು ಅಪಾರ ಅಭಿಮಾನಿಗಳನ್ನು ಸಂಪಾದಿಸಿದ್ದು ಈ ಕಾರ್ಯಕ್ರಮದ ಯಶಸ್ವಿನ ಗುಟ್ಟು ಎಂದರೆ ತಪ್ಪಾಗಲಾರದು.

  ಕರಾವಳಿ ಟೆಲಿವಿಷನ್ ಕ್ಷೇತ್ರದಲ್ಲಿ ಹೊಸ ದಾಖಲೆಯನ್ನು ನಿರ್ಮಿಸಿದ ಪ್ರೈವೇಟ್‌ ಚಾಲೆಂಜ್, ಇದೀಗ ತಾನೇ ಅಭಿನಯ ಕ್ಷೇತ್ರಕ್ಕೆ ಕಾಲಿಟ್ಟಿರುವ ಕಲಾವಿದರಿಗೂ ಹಾಗೂ ಸಹ-ಕಲಾವಿದರಿಗೂ ತಮ್ಮ ಕಲೆಯನ್ನು ಪ್ರದರ್ಶಿಸುವ ವೇದಿಕೆಯಾಯಿತು ಎಂದರೆ ತಪ್ಪಾಗಲಾರದು. ಇನ್ನು ಈ ಕಾರ್ಯಕ್ರಮಕ್ಕೆ ಸಾಮಾಜಿಕ ಜಾಲತಾಣದಲ್ಲೂ ಉತ್ತಮ ಶ್ಲಾಘನೆ ವ್ಯಕ್ತವಾಗಿದ್ದು, ಪ್ರೈವೇಟ್‌ಚಾಲೆಂಜ್ ನ ಹಲವು ಕಿರು ವೀಡಿಯೊ ತುಣುಕುಗಳು, ಟ್ರೋಲ್ ಪುಟಗಳಲ್ಲಿ ಕಾಣಿಸಿಕೊಂಡು ಸಾಮಾಜಿಕ ಮಾದ್ಯಮದಲ್ಲಿ ವೈರಲ್ ಆಗಿವೆ.

  ಈ ಕಾರ್ಯಕ್ರಮದ ಯಶಸ್ವಿನ ಹಿಂದೆ ದುಡಿದಿರುವ ವ್ಯಕ್ತಿಗಳನ್ನು ನಿಜಕ್ಕೂ ಪರಿಚಯಿಸಲೇಬೇಕು. ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ಮೂಡಿಬರಬೇಕಾದರೆ ಅನುಪಯುಕ್ತ ದೃಶ್ಯಗಳಿಗೆ ಕತ್ತರಿ ಪ್ರಯೋಗ ಆಗಲೇಬೇಕು ಇದರ ಜವಾಬ್ದಾರಿ ವಿಡಿಯೋ ಎಡಿಟರ್ ನೋಯೆಲ್‌ ಪುತ್ತೂರು ವಹಿಸಿದ್ದು, ಕಿರಣ್‌ ಕೇಪು, ದುರ್ಗಪ್ರಸಾದ್‌ ಕಕ್ಕೆಪದವು ಹಾಗೂ ದಯಾನಂದ ಕುಕ್ಕಾಜೆ ಅವರ ಛಾಯಾಗ್ರಹಣ ಬೋಳಾರ್-ನಂದಳಿಕೆ ಅವರ ಕಾರ್ಯಕ್ರಮದವನ್ನು ಸೆರೆಹಿಡಿದ ಛಾಯಾಗ್ರಾಹಕರಾಗಿದ್ದಾರೆ. ವಿಭಿನ್ನ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವ ಬೋಳಾರ್ ಅವರ ಹಲವು ಲುಕ್ ಕ್ರಿಯೇಟ್ ಮಾಡಿ ಮೇಕಪ್ ಮಾಡಿದ ಕೀರ್ತಿ ರಂಗಭೂಮಿಯ ಖ್ಯಾತ ಕಲಾವಿದ ದಿನೇಶ್‌ ಅತ್ತಾವರ್‌ ಅವರಿಗೆ ಸಲ್ಲಬೇಕು.

  ಕಾರ್ಯಕ್ರಮದ ಪ್ರೊಡಕ್ಷನ್‌‌ ಡೈರೆಕ್ಟರ್‌ ಆಶಿತ್‌ ಪಿಂಟೊ ಅವರು ಸಂಗೀತ ನೀಡಿದ್ದಾರೆ. ಇನ್ನು "ಎಲೆಕ್ಟ್ರಿಕ್‌ ಪಾಯಿಂಟ್‌" ಈ ಕಾರ್ಯಕ್ರಮದ ಮುಖ್ಯ ಪ್ರಾಯೋಜಕರಾಗಿದ್ದಾರೆ.

  "ಪ್ರೈವೇಟ್‌ ಚಾಲೆಂಜ್" ಕಾರ್ಯಕ್ರಮದ ಯಶಸ್ವಿಗೆ ದುಡಿದ ತೆರೆಮರೆಯಲ್ಲಿನ ಮತ್ತೊಬ್ಬ ಪ್ರಮುಖ ವ್ಯಕ್ತಿ ಎಂದರೆ ಸ್ಕ್ರಿಪ್ಟ್ ಬರೆದು ಎಲ್ಲಾ ಸಂಚಿಕೆಗಳನ್ನು ನಿರ್ದೇಶಿಸಿ ನಿರ್ದೇಶಕ 'ಸ್ಟ್ಯಾನಿ ಬೆಳಾ'. "ಪ್ರೈವೇಟ್‌ ಚಾಲೆಂಜ್‌ ಎನ್ನುವುದು ಒಂದು ಸಾಮಾನ್ಯ ಹಾಸ್ಯ ಕಾರ್ಯಕ್ರಮವಲ್ಲ. ಸಮಾಜದ ವ್ಯವಸ್ಥೆಯಲ್ಲಿರುವ ಸಾಕಷ್ಟು ಹುಳುಕುಗಳನ್ನು ಕಾರ್ಯಕ್ರಮದಲ್ಲಿ ವಿಡಂಬನಾತ್ಮಕವಾಗಿ ಪ್ರಸ್ತುತಪಡಿಸಿದ್ದೇವೆ. ವಿಶೇಷವೆಂದರೆ ಈ ಕಾರ್ಯಕ್ರಮದ ಮೊದಲ ಸಂಚಿಕೆಯಿಂದಲೇ ಜನರು ವೀಕ್ಷಿಸಿ ಖುಷಿಪಟ್ಟಿದ್ದಾರೆ. ನಾವು ಯಾವ ಸಂದೇಶವನ್ನು ಜನರಿಗೆ ನೀಡಬೇಕು ಎಂದುಕೊಂಡಿದ್ದೇವೋ ಆ ಸಂದೇಶ ಜನರಿಗೆ ತಲುಪಿದೆ ಎಂಬ ತೃಪ್ತಿ ನಮಗಿದೆ.

  ಆರಂಭದಲ್ಲಿ ನಾವು 25 ಸಂಚಿಕೆಗಳ ಬಳಿಕ ಪ್ರದರ್ಶನವನ್ನು ನಿಲ್ಲಿಸಬೇಕು ಎಂದು ಯೋಜಿಸಿದ್ದೆವು. ಆದರೆ, ವೀಕ್ಷಕರ ಪ್ರತಿಕ್ರಿಯೆ ಹಾಗೂ ಬೇಡಿಕೆಯ ಬಳಿಕ 50ನೇ ಸಂಚಿಕೆಗೆ ಮುಕ್ತಯಗೊಳಿಸಿಲು ತೀರ್ಮಾನಿಸಿದೆವು. ಆದರೆ ಕಾರ್ಯಕ್ರಮ ಯಶಸ್ಸು ಇನ್ನೂ ಹೆಚ್ಚಿನ ಹತ್ತು ಸಂಚಿಕೆ ಪ್ರದರ್ಶಿಸುವಂತೆ ಮಾಡಿತು. ಪ್ರಸ್ತುತ ನಾವು ಪ್ರೈವೇಟ್‌ ಚಾಲೆಂಜ್‌‌ ಕಾರ್ಯಕ್ರಮವನ್ನು 60ನೇ ಸಂಚಿಕೆಯಲ್ಲಿ ಮುಕ್ತಾಯಗೊಳಿಸಲಿದ್ದೇವೆ. ಹಾಗೆಂದು ಪ್ರೇಕ್ಷಕರು ನಿರಾಶರಾಗಬೇಕಿಲ್ಲ. ಯಾಕೆಂದರೆ ಶೀಘ್ರವೇ ನಾವು "ಪ್ರೈವೇಟ್‌ ಚಾಲೆಂಜ್‌‌ -2" ರ ಶೂಟಿಂಗ್‌ ಪ್ರಾರಂಭಿಸಲಿದ್ದೇವೆ. ಸೀಸನ್ -2ರಲ್ಲಿ ಪ್ರೇಕ್ಷಕರು ಹೆಚ್ಚಿನ ವೈವಿಧ್ಯತೆಯನ್ನು ನಿರೀಕ್ಷಿಸಬಹುದಾಗಿದೆ. ಇದರಲ್ಲೂ ಅರವಿಂದ್‌ ಬೋಳಾರ್‌ ಹಾಗೂ ವಾಲ್ಟರ್‌ ನಂದಳಿಕೆ ಅವರು ಪ್ರಮುಖ ಪಾತ್ರ ನಿರ್ವಹಿಸಲಿದ್ದು ಹೆಚ್ಚಿನ ಮನೋರಂಜನೆ ನಿರೀಕ್ಷಿಸಬಹುದು" ಎಂದು ಕಾರ್ಯಕ್ರಮದ ನಿರ್ದೇಶಕ ಸ್ಟ್ಯಾನಿ ಬೆಳಾ ತಿಳಿಸಿದ್ದಾರೆ.