ಮಂಗಳೂರು, ಜು.03 (DaijiworldNews/HR): ಪಚ್ಚನಾಡಿಯಲ್ಲಿರುವ ಒಳಚರಂಡಿ ನೀರಿನ ಶುದ್ದೀಕರಣ ಘಟಕಕ್ಕೆ ಅಕ್ಷಿ ಶ್ರೀಧರ್, ಮನಪಾ ಆಯುಕ್ತರು ಇಂದು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಮಹಾನಗರಪಾಲಿಕೆ ವ್ಯಾಪ್ತಿಯೊಳಗಿನ ಪಚ್ಚನಾಡಿ ಮೂಡುಶೆಡ್ಡೆ ಭಾಗದಲ್ಲಿ ಪಾಲಿಕೆ ಅಧೀನದ ಒಳಚರಂಡಿ ನೀರಿನ ಶುದ್ದೀಕರಣ ಘಟಕ ಕಾರ್ಯಾಚರಿಸುತ್ತಿದ್ದು,ಪ್ರಸ್ತುತ ಶುದ್ದೀಕರಣ ಘಟಕದಿಂದ ಸಂಸ್ಕರಿಸದ ನೀರು ಪಡುಶೆಡ್ಡೆ ಪ್ರದೇಶದ ಫಲ್ಗುಣಿ ನದಿಪಾತ್ರಕ್ಕೆ ಹರಿಯುವ ಮೂಲಕ ಮರವೂರು ಅಣೆಕಟ್ಟಿಗೆ ಸೇರುತ್ತಿದ್ದು, ಇದರಿಂದಾಗಿ ಸುತ್ತಮುತ್ತಲ ನಿವಾಸಿಗಳಿಗೆ ಕುಡಿಯುವ ನೀರಿನ ಸಮಸ್ಯೆಯುಂಟಾಗುತ್ತಿರುವ ಬಗ್ಗೆ ವಿವಿಧ ಮಾದ್ಯಮಗಳು ವರದಿ ಮಾಡಿದ್ದು, ವಿವಿಧ ಸಂಘಟನೆಗಳು ದೂರುಗಳನ್ನು ಸಲ್ಲಿಸಿವೆ. ಇವುಗಳನ್ನು ಗಂಭೀರವಾಗಿ ಪರಿಗಣಿಸಿದ ಅಕ್ಷಿ ಶ್ರೀಧರ್, ಮನಪಾ ಆಯುಕ್ತರು, ದೂರುದಾರರೊಂದಿಗೆ ಪಚ್ಚನಾಡಿಯಲ್ಲಿರುವ ಒಳಚರಂಡಿ ನೀರಿನ ಶುದ್ದೀಕರಣ ಘಟಕಕ್ಕೆ ಇಂದು ಭೇಟಿ ನೀಡಿ ಒಳಚರಂಡಿ ನೀರಿನ ಶುದ್ದೀಕರಣ ಪ್ರಕ್ರಿಯೆಯನ್ನು ಹಾಗೂ ಫಲ್ಗುಣಿ ನದಿಪಾತ್ರದ ನೀರಿನ ಮಾದರಿಯನ್ನು ಪರಿಶೀಲಿಸಿದ್ದಾರೆ.
ಈ ಸಮಯದಲ್ಲಿ ಘಟಕದ ಗುತ್ತಿಗೆ ವಹಿಸಿಕೊಂಡವರು ಸಮರ್ಪಕವಾಗಿ ಒಳಚರಂಡಿ ನೀರನ್ನು ಶುದ್ದೀಕರಿಸದೆ ಚರಂಡಿಗೆ ಬಿಟ್ಟಿರುವ ಕುರಿತು ಸ್ವೀಕರಿಸಲಾದ ವೀಡಿಯೋ ಮಾದರಿಯ ದೂರಿನ ಆದಾರದ ಮೇಲೆ, 24 ಗಂಟೆಯೊಳಗೆ ಗುತ್ತಿಗೆದಾರರಿಗೆ ಜಲಮಾಲಿನ್ಯ ನಿಯಂತ್ರಣ ಕಾಯಿದೆಯಡಿ ಯಾಕೆ ಕ್ರಿಮಿನಲ್ ಪ್ರಕರಣ ದಾಖಲು ಮಾಡಬಾರದು ಎಂಬ ಬಗ್ಗೆ ಕಾರಣ ಕೇಳಿ ನೋಟಿಸು (ಶೋ-ಕಾಸ್ ನೋಟಿಸ್) ನೀಡಲು ಸಂಬಂಧಪಟ್ಟ ಅಧೀಕ್ಷಕ ಅಭಿಯಂತರರಿಗೆ ನಿರ್ದೇಶನ ನೀಡಲಾಯಿತು.
ಈ ಸಮಸ್ಯೆಗೆ ತಕ್ಷಣ ಪರಿಹಾರ ಕಂಡುಕೊಳ್ಳುವ ಸಲುವಾಗಿ ಅಗತ್ಯ ಸಂಖ್ಯೆಯ ಸಿ.ಸಿ. ಕ್ಯಾಮೆರಾ ಅಳವಡಿಸಲಾಗುವುದು. ಜೊತೆಗೆ, ಅಧಿಕಾರಿಗಳು ಈ ಘಟಕಕ್ಕೆ ನಿರಂತರವಾಗಿ ಭೇಟಿ ನೀಡಿ ಗುತ್ತಿಗೆದಾರರ ಕಾರ್ಯ ನಿರ್ವಹಣೆಯ ಮೇಲೆ ನಿಗಾವಹಿಸಿಸಲಿದ್ದಾರೆ.
ಶಾಶ್ವತ ಪರಿಹಾರಕ್ಕಾಗಿ ಈಗಾಗಲೇ ಎನ್ಟಿಕೆ ಸುರತ್ಕಲ್ ತಜ್ಞರಿಂದ ತಾಂತ್ರಿಕ ವರದಿ ಪಡೆಯಲಾಗಿದ್ದು, ಅದರ ಸ್ಥಾಪನೆಗಾಗಿ ರೂ. 247.00 ಲಕ್ಷ ಮೊತ್ತದ ಅಂದಾಜುಪಟ್ಟಿಯ ಮಂಜೂರಾತಿ ಕೋರಿ ಸರ್ಕಾರಕ್ಕೆ ಪ್ರಸ್ತಾವನೆಯನ್ನು ಸಲ್ಲಿಸಲಾಗಿದೆ.