ಮಂಗಳೂರು, ಜೂ 29 (DaijiworldNews/MS): ಮಾದಕ ದ್ರವ್ಯ ಹೊಂದಿದ್ದ ಎರಡು ಪ್ರತ್ಯೇಕ ಪ್ರಕರಣಗಳಲ್ಲಿ ಜೂ.29 ರಂದು ಮಂಗಳೂರು ಸಿಸಿಬಿ ಪೊಲೀಸರು ಹತ್ತು ಜನರನ್ನು ಬಂಧಿಸಿದ್ದು ಅವರಿಂದ ಗಾಂಜಾ, ಎಂಡಿಎಂಎ ಮಾತ್ರೆ, ಬ್ರೌನ್ ಶುಗರ್ ವಶಕ್ಕೆ ಪಡೆಯಲಾಗಿದೆ.
ಮೊದಲ ಪ್ರಕರಣದಲ್ಲಿ 2.275 ಕೆಜಿ ಗಾಂಜಾ, ಹಾಗೂ ಕೃತ್ಯಕ್ಕೆ ಬಳಸಿದ್ದ ಹೋಂಡಾ ಆಕ್ಟಿವ್ ವಶಕ್ಕೆ ಪಡೆದಿದ್ದು ಈ ಸಂಬಂದ ಮಿಷನ್ ಸ್ಟ್ರೀಟ್ ನಲ್ಲಿ ಇಬ್ಬರು ವ್ಯಕ್ತಿಗಳನ್ನು ಬಂಧಿಸಲಾಗಿದೆ. ಬಂಧಿತರನ್ನು ಬೆಂಗ್ರೆ ಮೂಲದ ಅಬ್ದುಲ್ ರೆಹಮಾನ್ ಮತ್ತು ಸಾದಿಕ್ ಎಂದು ಗುರುತಿಸಲಾಗಿದೆ.
ಮತ್ತೊಂದು ಪ್ರಕರಣದಲ್ಲಿ ಎಂಟು ಜನರನ್ನು ಬಂಧಿಸಿ 2.168 ಕೆಜಿ ಗಾಂಜಾ, 9 ಎಂಡಿಎಂಎ ಮಾತ್ರೆಗಳು, 2 ಗ್ರಾಂ ಬ್ರೌನ್ ಶುಗರ್ ವಶಪಡಿಸಿಕೊಳ್ಳಲಾಗಿದೆ.
ಇನ್ನೋವಾ ಕಾರಿನಲ್ಲಿ ಗಾಂಜಾ, ಎಂಡಿಎಂಎ ಮತ್ತು ಬ್ರೌನ್ ಶುಗರ್ ಮಾರಾಟ ಮಾಡುವ ಸಂದರ್ಭದಲ್ಲಿ ದಾಳಿ ನಡೆಸಿ ಬಂದರಿನ ಮೊಹಮ್ಮದ್ ಅಫ್ವಾನ್ ,ಬಿಜೈ ಮೂಲದ ಮೊಹಮ್ಮದ್ ಅಮೀನ್, ಫಳ್ನೀರ್ ನ ರೋಶನ್ ಯೂಸುಫ್ ಬಂಧಿಸಲಾಗಿದೆ. ಇವರ ವಿಚಾರಣೆ ವೇಳೆ ದೊರೆತ ಮಾಹಿತಿಯಂತೆ ಪೊಲೀಸರು ಅತ್ತಾವರದ ಫ್ಲಾಟ್ವೊಂದರ ಮೇಲೆ ದಾಳಿ ನಡೆಸಿದ್ದು, ಈ ವೇಳೆ ಅಂತಿಮ ವರ್ಷದ ವೈದ್ಯಕೀಯ ಕಾಲೇಜು ವಿದ್ಯಾರ್ಥಿ ಸೇರಿ ನಾಲ್ವರನ್ನು ವಶಕ್ಕೆ ಪಡೆದಿದ್ದಾರೆ.
ಬೀದರ್ ನ ಪ್ರಜ್ವಲ್ , ಬೋಳಾರ್ ನ ತಮೀಮ್, ಬಂದರಿನ ಅಬ್ದುಲ್ ಅರ್ಮಾನ್, ಜೆಪ್ಪುವಿನ ಅಫ್ವಾನ್ ಮತ್ತು ಮೊಹಮ್ಮದ್ ರಯೀಸ್ ಬಂಧಿಸಿದ್ದು, 1 ಕೆಜಿ ಗಾಂಜಾ, 3 ದ್ವಿಚಕ್ರ ವಾಹನವನ್ನು ವಶಪಡಿಸಿಕೊಂಡಿದ್ದಾರೆ.
ಎರಡು ಪ್ರಕರಣಗಳಲ್ಲಿ ಒಟ್ಟು ಮೌಲ್ಯವು 2 ಲಕ್ಷ ಮೌಲ್ಯದ ಗಾಂಜಾ, 6 ಲಕ್ಷ ಮೌಲ್ಯದ ದ್ವಿಚಕ್ರ ಮತ್ತು ಮೊಬೈಲ್ ಫೋನ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ