ದಸರಾದಲ್ಲಿ ಭಾಗವಹಿಸಬೇಕಾಗಿದ್ದ 'ರೌಡಿ ರಂಗ' ಆನೆಗೆ ಬಸ್ ಢಿಕ್ಕಿಯಾಗಿ ಸಾವು

•   Mon, Oct 08 2018 11:52:42 AM



• ಮಡಿಕೇರಿ,ಅ 8 (MSP): ದಸರಾದಲ್ಲಿ ಭಾಗಿಯಾಗಬೇಕಾಗಿದ್ದ ಸಾಕಾನೆ ೩೮ ವರ್ಷದ ರಂಗ ಆನೆಗೆ ಖಾಸಗಿ ಬಸ್ಸೊಂದು ಢಿಕ್ಕಿ ಹೊಡೆದಿದ್ದು, ಗಂಭೀರವಾಗಿ ಗಾಯಗೊಂಡಿದ್ದ ಆನೆ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದೆ.ಇನ್ನೇನು ಮೈಸೂರು ದಸರಾದಲ್ಲಿ ಸಹಾಯಕನಾಗಿ ಕಾರ್ಯನಿರ್ವಹಿಸಲು ಹೋಗಬೇಕಾಗಿದ್ದ ಆನೆ ಹಾಗೂ ಜನರಿಂದ ರೌಡಿ ರಂಗ ಎಂದು ಕರೆಯಿಸಿಕೊಳ್ಳುತ್ತಿದ್ದ ಆನೆಗೆ ಕೊಡಗಿನ ಮತ್ತಿಗೋಡು ಆನೆಕ್ಯಾಂಪ್‍ ರಸ್ತೆ ಬಳಿ ಖಾಸಗಿ ಬಸ್ಸೊಂದು ಡಿಕ್ಕಿ ಹೊಡೆದಿತ್ತು. ಇದರ ಪರಿಣಾಮ ರಂಗ ಆನೆಯ ಸೊಂಟಕ್ಕೆ ಹಾಗೂ ಕಾಲಿಗೆ ಗಂಭೀರವಾದ ಏಟು ಬಿದ್ದಿತ್ತು. 

  

  ಕೇರಳದ ಕಡೆಯಿಂದ ರಾಜಧಾನಿ ಬೆಂಗಳೂರಿಗೆ ಸೋಮವಾರ ಮುಂಜಾನೆ ತೆರಳುತ್ತಿದ್ದ ಸಂದರ್ಭ ಕಲ್ಪಕ ಹೆಸರಿನ ಬಸ್‍ ಢಿಕ್ಕಿ ಹೊಡೆದಿದೆ. ಈ ಘಟನೆಯೂ ಮತ್ತಿಕಾಡು ಆನೆ ಕ್ಯಾಂಪ್‍ನ ಮುಖ್ಯರಸ್ತೆಯಲ್ಲಿ ಮುಂಜಾನೆ ಸುಮಾರು 2 ಗಂಟೆಗೆ ನಡೆದಿದೆ. ರಂಗನನ್ನು ಎಂದಿನಂತೆ ರಾತ್ರಿ ತಿರುಗಾಡಲು ಬಿಡುವುದು ವಾಡಿಕೆಯಾಗಿತ್ತು. ಆದರೆ ಕತ್ತಲಲ್ಲಿ ರಸ್ತೆ ಬದಿಯಲ್ಲಿ ನಿಂತಿದ್ದ ಆನೆಯನ್ನು ಗುರುತಿಸದೆ ಬಸ್ ಚಾಲಕ ಡಿಕ್ಕಿ ಹೊಡೆದಿದ್ದಾನೆ.ಪರಿಣಾಮ ಆನೆಯ ಸೊಂಟ ಮುರಿದಿದ್ದು, ವೈದ್ಯಾಧಿಕಾರಿ ಡಾ. ಮುಜೀಬ್‍ ಅವರು ಚಿಕಿತ್ಸೆ ಆರಂಭಿಸಿದ್ದರು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ರೌಡಿ ರಂಗ ಸಾವನ್ನಪ್ಪಿದ್ದಾನೆ.