ಮಂಗಳೂರು, ಜೂ.17 (DaijiworldNews/HR): ಕಳೆದ ಹಲವು ವರ್ಷಗಳ ಹಿಂದಷ್ಟೆ ಅಡ್ಡೂರಿನ ನಾಗರಿಕರಿಗಾಗಿ ಸರ್ಕಾರಿ ದಾಖಲೆ ಪತ್ರಗಳ ಕೆಲಸದ ಜೊತೆಗೆ ಪಾಸ್ಪೋರ್ಟ್, ಆಧಾರ್ ಕಾರ್ಡ್, ಪಾನ್ ಕಾರ್ಡ್ ಸೇರಿದಂತೆ ವಿದ್ಯಾರ್ಥಿಗಳ ಸ್ಕಾಲರ್ ಶಿಪ್ ಸೇವೆಗಳಿಗಾಗಿ ಪ್ರಿಯದರ್ಶಿನಿ ಎಂಬ ಸಂಸ್ಥೆಯನ್ನು ನಿರ್ಮಿಸಲಾಗಿದ್ದು, ಈ ಸಂಸ್ಥೆ ಸರ್ಕಾರಿ ದಾಖಲೆ ಪತ್ರಗಳನ್ನು ಒದಗಿಸೋ ಮೂಲಕ ಜನ ಸೇವೆಗೆ ಮುಂದಾಗಿತ್ತು. ಆದರೆ ಈ ಬಾರಿ ಸ್ಥಳೀಯ ವ್ಯಕ್ತಿಯೊಬ್ಬರು ಸೋಂಕು ತಗುಲಿ ಆಸ್ಪತ್ರೆಯಲ್ಲಿ ಆಕ್ಸಿಜನ್ ಸೇರಿದಂತೆ ಅನೇಕ ತೊಂದರೆಗೊಳಗಾಗಿದ್ದು, ಇದನ್ನು ಮನಗಂಡ ಸ್ಥಳೀಯ ಕಾಂಗ್ರೆಸ್ ಮುಖಂಡ ಯುಪಿ ಇಬ್ರಾಹಿಂ ನೇತೃತ್ವದ ತಂಡ ಪ್ರಿಯದರ್ಶಿನಿ ಸಂಸ್ಥೆ ಮೂಲಕ ಕೊರೊನಾ ರೋಗಿಗಳ ಆರೈಕೆ ಮಾಡಲು ಮುಂದಾಗಿದ್ದಾರೆ.
ಈ ಕುರಿತು ಪ್ರತಿಕ್ರಿಯಿಸಿದ ಯುಪಿ ಇಬ್ರಾಹಿಂ, ಕೊರೊನಾ ಸೋಂಕು ತಗುಲಿದ ಕುಟುಂಬದ ಮನೆಗೆ ಭೇಟಿ ನೀಡಿ ಅವರ ಆರೈಕೆ ಕಾರ್ಯಗಳನ್ನು ತಮ್ಮ ತಂಡದ ಸದಸ್ಯರೇ ನಡೆಸುತ್ತಿದ್ದು, ಆಕ್ಸಿಜನ್ ಸಮಸ್ಯೆ ಎದುರಾದರೆ ಆ ಕುಟುಂಬಗಳಿಗೆ ಸ್ವತಃ ಪ್ರಿಯದರ್ಶಿನಿ ಸಂಸ್ಥೆಯು 20 ಕ್ಕೂ ಅಧಿಕ ಆಕ್ಸಿಜನ್ ಸಿಲಿಂಡರ್ ಗಳನ್ನು ಹೊಂದಿಸಿ ನೂರಕ್ಕೂ ಅಧಿಕ ಕುಟುಂಬಗಳಿಗೆ ಉಚಿತ ಆಕ್ಸಿಜನ್ ಪೂರೈಸಿದ್ದು, 20 ಕ್ಕೂ ಅಧಿಕ ಅಡ್ಡೂರಿನ ಯುವಕರು ಆಕ್ಸಿಜನ್ ಪೂರೈಕೆ ಮತ್ತು ಅದರ ಚಿಕಿತ್ಸೆಯ ಬಗ್ಗೆ ವೈದ್ಯರಿಂದ ತರಬೇತಿ ಪಡೆದು ಕೊರೊನಾ ರೋಗಿಗಳ ಸೇವೆಗೆ ನಿಂತಿದ್ದು,ಈ ಸಂಸ್ಥೆಯು ಕೇವಲ ಅಡ್ಡೂರಿನ ಜನರ ಸೇವೆಗೆ ಮಾತ್ರ ನಿಲ್ಲದೇ ದಕ್ಷಿಣ ಕನ್ನಡ ಜಿಲ್ಲೆಯ ಹೆಚ್ಚಿನ ಗ್ರಾಮೀಣ ಭಾಗದ ಜನರ ಸೇವೆ ಮಾಡುತ್ತಿದೆ" ಎಂದರು.
ಇನ್ನು ಈ ಸಂಸ್ಥೆ ಮೂಲಕ ಅನೇಕ ಬಡ ಕುಟುಂಬಗಳಿಗೆ ಆಹಾರ ಕಿಟ್, ಆರೋಗ್ಯ ಸಂಬಂಧಿ ಸೇವೆ ಸೇರಿದಂತೆ ವಿದ್ಯಾರ್ಥಿಗಳಿಗೆ ಎಲ್ಲಾ ರೀತಿಯ ಉಚಿತ ಸೇವೆಯನ್ನು ಸಂಸ್ಥೆ ಒದಗಿಸುತ್ತಿದ್ದು, ಕೊರೊನಾದಂತಹ ಸಂಕಷ್ಟದ ಸಮಯದಲ್ಲಿ ರೋಗಿಗಳ ಆರೈಕೆ ಮಾಡುವ ಪ್ರಿಯದರ್ಶಿನಿ ಸಂಸ್ಥೆಯ ಸೇವೆ ಮೆಚ್ಚುಗೆಗೆ ಪಾತ್ರವಾಗಿದೆ" ಎಂದು ಹೇಳಿದ್ದಾರೆ.