ವರದಿ: ಜಸ್ಟಿನ್ ಡಿಸಿಲ್ವಾ ಉಡುಪಿ
ಉಡುಪಿ, ಜೂ 15( DaijiworldNews/MS): ಮಹಾಮಾರಿ ಕೊರೊನಾ ಬಡವರನ್ನು ಮತ್ತಷ್ಟು ಕಷ್ಟಕ್ಕೆ ಸಿಲುಕಿಸಿದೆ. ಸಂಕಷ್ಟದ ಕಾಲದಲ್ಲಿ ಉಡುಪಿಯ ಕೂಲಿ ಕಾರ್ಮಿಕರೊಬ್ಬರ ಹೃದಯ ಮಿಡಿದಿದೆ. ಹಸಿವೆಯ ಅನುಭವ ಒಬ್ಬ ಹಸಿದವನಿಗೆ ಮಾತ್ರ ತಿಳಿದಿರುತ್ತದೆ ಎನ್ನುವಂತೆ ತನಗಿಂತ ಹೀನ ಸ್ಥಿತಿಯಲ್ಲಿರುವ ಎಪ್ಪತ್ತು ಕುಟುಂಬಕ್ಕೆ ಹಸಿವೆ ನೀಗಿಸುವ ಮಹತ್ಕಾರ್ಯ ಮಾಡಿದ್ದಾರೆ ಇವರು.
ಸಾಂಕ್ರಾಮಿಕ ಕೊರೊನಾ ಎಲ್ಲರನ್ನು ಹಿಂಡಿ ಹಿಪ್ಪೆ ಮಾಡಿದೆ. ಕೂಲಿನಾಲಿ ಮಾಡಿ ಜೀವನ ಕಟ್ಟಿಕೊಂಡಿದ್ದ ಬಡವರನ್ನು ಮೇಲೇಳದಂತೆ ಪಾತಾಳಕ್ಕೆ ತಳ್ಳಿದಾಗ ಉಡುಪಿಯ ಬಡ ಕೂಲಿ ಕಾರ್ಮಿಕನಾಗಿರುವ ಅಂಬಲಪಾಡಿಯ ಕೃಷ್ಣ ಅವರ ಹೃದಯ ಮಿಡಿದಿದೆ.
ಕೃಷ್ಣ ಅವರೌ ಕೂಲಿಕೆಲಸವನ್ನು ನಂಬಿರುವವರು, ಮರ ಕಡಿಯುವುದು ಮರದ ಗೆಲ್ಲು ಜಾರಿಸುವುದು ಇವರ ನಿತ್ಯದ ಕಾಯಕ. ದಲಿತ ಸಮುದಾಯದಿಂದ ಬಂದಿರುವ ಕೃಷ್ಣ ಬೆವರು ಸುರಿಸಿ ಸಂಪಾದಿಸಿದ ಸುಮಾರು ೭೦ ಸಾವಿರ ರೂಪಾಯಿಯನ್ನು ದಾನ ಮಾಡಿದ್ದಾರೆ. ಅಕ್ಕಿ ಬೇಳೆ ಉಪ್ಪು ಸಕ್ಕರೆ ಚಹಾ ಹುಡಿ ಎಲೆ-ಅಡಿಕೆ ಮತ್ತಿತರ ಅಗತ್ಯ ವಸ್ತುಗಳನ್ನು ೭೦ ಕುಟುಂಬಗಳಿಗೆ ಕೊಟ್ಟಿದ್ದಾರೆ. "ನನ್ನ ಬಳಿ ಇದ್ದು ನಾನು ಇದನ್ನು ನೀಡಿಲ್ಲ. ವಿಶು ಶೆಟ್ಟಿ ಅವರ ಸಮಾಜಸೇವೆಯನ್ನು ನೋಡಿ ನಾನು ಕಲಿತದ್ದು. ೫೦ ಕಿಟ್ ನನ್ನ ವತಿಯಿಂದ ನೀಡಿದ್ದೇನೆ, ನನ್ನ ಸ್ನೇಹಿತ ರವಿ ಪಂಜಿಮಾರ್ ಕೂಡಾ ಇದಕ್ಕೆ ಸಹಾಯ ಮಾಡಿದ್ದಾರೆ. ಇದ್ದವರು ಇಲ್ಲದವರಿಗೆ ಸಹಾಯ ಮಾಡಿದರೆ ಉತ್ತಮವಾಗುತ್ತದೆ. ಕಷ್ಟ ಎಂದರೆ ಏನು ಎಂಬುವುದು ನನಗೆ ಗೊತ್ತು. ನನ್ನ ಸ್ನೇಹಿತರು ಕಟಪಾಡಿ, ಅಂಬಲಪಾಡಿ, ಕಪ್ಪೆಟ್ಟು ಈ ಮುಂತಾದ ಕಡೆಯ ಬಡವರನ್ನು ಗುರುತಿಸಿ ಕಿಟ್ ನೀಡಿದ್ದೇವೆ" ಎನ್ನುತ್ತಾರೆ.
ಕೃಷ್ಣ ಆರ್ಥಿಕವಾಗಿ ಶ್ರೀಮಂತನಲ್ಲ. ಹೆಚ್ಚಿನ ಶ್ರೀಮಂತರಿಗೆ ಇಲ್ಲದ ಹೃದಯ ಶ್ರೀಮಂತಿಕೆ ಕೃಷ್ಣನಿಗೆ ಇದೆ. ನಾನು ಚಿಕ್ಕಂದಿನಲ್ಲಿ ಅನುಭವಿಸಿದ ಕಷ್ಟ ಏನು ಎಂಬುದು ಮರೆಯದ ಅವರು, ಉಡುಪಿ ಸುತ್ತಲ ಐದಾರು ಗ್ರಾಮದ ಕಡುಬಡವರನ್ನು ಗುರುತಿಸಿ ಎಲ್ಲರಿಗೂ ದಿನಸಿ ಕಿಟ್ ಗಳನ್ನು ಕೊಟ್ಟಿದ್ದಾರೆ. ತಾನು ಒಂದೆರಡು ವರ್ಷ ಸಂಪಾದಿಸಿದ ಕೂಲಿ ಹಣದಲ್ಲಿ ಪ್ರತಿದಿನ ಪ್ರತ್ಯೇಕವಾಗಿ ಕೂಡಿಡುತ್ತಿದ್ದರು. ಸಮಸ್ಯೆಯ ಈ ಸಂದರ್ಭದಲ್ಲಿ ಎಲ್ಲವನ್ನೂ ದಾನ ಮಾಡಿದ್ದಾರೆ.
ಕೃಷ್ಣ ಅವರ ಸಮಾಜಸೇವೆಗೆ ಮತ್ತೊಬ್ಬ ಸಮಾಜಸೇವಕ ವಿಶು ಶೆಟ್ಟಿ ಅಂಬಲ್ಪಾಡಿ ಪ್ರೇರಕ. ವಿಶು ಅವರ ನಿರಂತರ ಜನಸೇವೆಯಿಂದ ಉತ್ತೇಜಿತರಾಗಿ ಕೃಷ್ಣ ಅವರು ಈ ಕೆಲಸ ಮಾಡಿದ್ದಾರೆ. ಇವರಂತೆ ಎಲ್ಲರೂ ಆಲೋಚನೆ ಮಾಡಿದರೆ ಪಕ್ಕದ ಮನೆ ಬಡವರು ಉಪವಾಸ ಇರಬೇಕಾಗಿಲ್ಲ.
ಇವರ ಈ ಕಾರ್ಯಕ್ಕೆ ಸಾಥ್ ನೀಡಿದ ವಿಶು ಶೆಟ್ಟಿ ಅವರು "ಲಾಕ್ ಡೌನ್ ನ ದುರಂತ ಸಮಯದಲ್ಲಿ ಅಂಬಲಪಾಡಿಯಲ್ಲಿ ಒಂದು ವಿಷೇಶ ಜನಮೆಚ್ಚುವ ಕರ್ಯ ಕೃಷ್ಣ ಇವರಿಂದ ನಡೆದಿದೆ. ಸಾಮಾಜಿಕ ಕರ್ಯಗಳಲ್ಲಿ ಇವರು ಸಕ್ರಿಯವಾಘಿ ತೊಡಗಿಸಿಕೊಂಡಿದ್ದಾರೆ. ತಾನು ಕಷ್ಟದಲ್ಲಿ ಇದ್ದರೂ ಕೂಡಾ ಇತರರ ಕಷ್ಟ ವನ್ನು ಅರಿತು ಇವರು ಸಹಾಯ ಮಾಡಿದ್ದಾರೆ. ಇದೊಂದು ಕಣ್ಣು ತೆರೆಸುವ ಕಾರ್ಯ. ಮಾನವೀಯ ಕಳಕಳಿ ಮುಖ್ಯ" ಎನ್ನುತ್ತಾರೆ ವಿಶು ಶೆಟ್ಟಿ.