ಕಾಸರಗೋಡು: ಆಟೋದಲ್ಲಿ ಕರೆದೊಯ್ದು ಬಾಲಕಿಗೆ ಕಿರುಕುಳ, ಆರೋಪಿಗೆ ನ್ಯಾಯಾಂಗ ಬಂಧನ

•   Thu, Sep 27 2018 07:12:42 PM



• ಕಾಸರಗೋಡು, ಸೆ 27(SM): ಅಪ್ರಾಪ್ತ ಬಾಲಕಿಯನ್ನು ಆಟೋ ರಿಕ್ಷಾದಲ್ಲಿ ಕರೆದೊಯ್ದು ಲೈಂಗಿಕ ಕಿರುಕುಳ ನೀಡಿದ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಆಟೋ ಚಾಲಕನನ್ನು ಕುಂಬಳೆ ಠಾಣಾ ಪೊಲೀಸರು ಬಂಧಿಸಿದ್ದಾರೆ.

  

  ಬಂಧಿತನನ್ನು ಬಂದ್ಯೋಡಿನ ಆಟೋ ಚಾಲಕ, ಮಳ್ಳಂಗೈಯ ಗಂಗಾಧರ ಎಂದು ಗುರುತಿಸಲಾಗಿದೆ. ಈತನ ವಿರುದ್ಧ ಪೋಕ್ಸೊ ಕಾಯ್ದೆಯಂತೆ ಕೇಸು ದಾಖಲಿಸಲಾಗಿದೆ. ಬಾಲಕಿ ಮನೆಯವರು ಚೈಲ್ಡ್ ಲೈನ್ ಗೆ ನೀಡಿದ ದೂರಿನಂತೆ ಆರೋಪಿಯನ್ನು ಬಂಧಿಸಲಾಗಿದೆ.
  ಸೆಪ್ಟೆಂಬರ್ 20ರ ಗುರುವಾರದಂದು ಆರೋಪಿ ಕೃತ್ಯ ಎಸಗಿದ್ದ. 13 ವರ್ಷದ ಬಾಲಕಿಯನ್ನು ಈತ ಕರೆದೊಯ್ದು ಕಿರುಕುಳ ನೀಡಿದ್ದು, ಬಾಲಕಿ ಮನೆಯವರಿಗೆ ಈ ವಿಷಯ ತಿಳಿಸಿದ್ದಳು. ಇದರಂತೆ ಮನೆಯವರು ಚೈಲ್ಡ್ ಲೈನ್ ಗೆ ದೂರು ನೀಡಿದ್ದರು. ಚೈಲ್ಡ್ ಲೈನ್ ಕಾರ್ಯಕರ್ತರು ಬಾಲಕಿಯಿಂದ ಮಾಹಿತಿ ಪಡೆದು ಬಳಿಕ ಕುಂಬಳೆ ಪೊಲೀಸರಿಗೆ ದೂರು ನೀಡಿದ್ದರು.
  ನಾಲ್ಕು ತಿಂಗಳ ಹಿಂದೆ ಹತ್ತು ವರ್ಷದ ಬಾಲಕಿಗೂ ಲೈಂಗಿಕ ಕಿರುಕುಳ ನೀಡಿದ್ದಾಗಿ ಚೈಲ್ಡ್ ಲೈನ್ ಕಾರ್ಯಕರ್ತರಿಗೆ ಇನ್ನೊಂದು ದೂರು ಲಭಿಸಿದೆ. ಆರೋಪಿಯನ್ನು ಬಂಧಿಸಿ ಕಾಸರಗೋಡು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಆತನಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.