ಮಂಗಳೂರು: ಸ್ಮಾರ್ಟ್ ಸಿಟಿಯ ಐಸಿಸಿ ಕೇಂದ್ರ ಇನ್ಮುಂದೆ ಕೋವಿಡ್‌ ವಾರ್‌ ರೂಮ್‌

•   Mon, May 10 2021 02:56:38 PM



• ಮಂಗಳೂರು, ಮೇ 10 (DaijiworldNews/MB) : ರಾಜ್ಯದ ಇತರ ಸ್ಮಾರ್ಟ್ ಸಿಟಿ ಯೋಜನೆಗಳಿಗಿಂತ ಮಂಗಳೂರು ಸ್ಮಾರ್ಟ್ ಸಿಟಿ ಯೋಜನೆಯು ಮುಂದೆ ಇದೆ. ಈಗ ಕೊರೊನಾ ಸೋಂಕನ್ನು ನಿರ್ವಹಿಸುವಲ್ಲಿ ಜಿಲ್ಲಾಡಳಿತವನ್ನು ಬೆಂಬಲಿಸಲು ಮುಂದಾಗಿರುವ ಸ್ಮಾರ್ಟ್ ಸಿಟಿ ಯೋಜನೆ ನಿರ್ವಾಹಕರು, ಅದರ 'ಇಂಟಿಗ್ರೇಟೆಡ್ ಕಮಾಂಡ್ ಅಂಡ್ ಕಂಟ್ರೋಲ್ ಸೆಂಟರ್' (ಐಸಿಸಿ) ಅನ್ನು ಈಗ ಕೋವಿಡ್‌ ವಾರ್‌ ರೂಮ್‌ ಆಗಿ ಮಾರ್ಪಡಿಸಿದೆ.

  

  ಕೋವಿಡ್ ವಾರ್ ರೂಮ್ ದೂರವಾಣಿ ಸಂಖ್ಯೆ 1077 ಆಗಿದೆ. ಈ ಕೇಂದ್ರವು ವಿವಿಧ ಸೇವೆಗಳನ್ನು ಪೂರೈಸುವ ಡಿಜಿಟಲ್-ಇಂಟರ್ನೆಟ್ ಫೋರಂ ಆಗಿ ಕಾರ್ಯನಿರ್ವಹಿಸುತ್ತದೆ. ಹಾಗೆಯೇ ಇದು ಬಹುಹಂತದ ನಿಯಂತ್ರಣ ಕ್ರಮಗಳ ನಿರ್ವಹಣೆಗೆ, ವಿವಿಧ ಇಲಾಖೆಗಳ ಸೇವೆಗೆ ಹಾಗೂ ಕೊರೊನಾ ವಿರುದ್ದ ಸರ್ಕಾರ ಘೋಷಿಸಿದ ಯುದ್ದವನ್ನು ನಿರ್ವಹಿಸುವ ಸಮಗ್ರ ಕೇಂದ್ರವಾಗಿಯೂ ಕಾರ್ಯನಿರ್ವಹಿಸುತ್ತದೆ. ಈ ವಿಚಾರವನ್ನು ನಗರ ಪಾಲಿಕೆ ಆಯುಕ್ತ ಅಕ್ಷಿ ಶ್ರೀಧರ್ ಸ್ಪಷ್ಟಪಡಿಸಿದ್ದಾರೆ.

  ವಿವಿಧ ಇಲಾಖೆಗಳ ನಡುವಿನ ಸಂವಹನ ಮತ್ತು ಮಾಹಿತಿ ಸಮನ್ವಯದ ಜೊತೆಗೆ, ದತ್ತಾಂಶ ಸಂಗ್ರಹಣೆ ಹಾಗೂ ಪರಿಶೀಲನೆಯ ಕೇಂದ್ರವಾಗಿಯೂ ಕೋವಿಡ್‌ ವಾರ್‌ ರೂಮ್‌ ಕಾರ್ಯನಿರ್ವಹಿಸಲಿದೆ. ಈ ಕೋವಿಡ್‌ ರೂಮ್‌ನ ವಿಪತ್ತು ನಿರ್ವಹಣೆ ಮತ್ತು ತುರ್ತು ಪರಿಹಾರ ವಿಭಾಗವೂ ಕೊರೊನಾ ಸೋಂಕಿಗೆ ಸಂಬಂಧಿಸಿದ ಕಾರ್ಯಗಳನ್ನು ನಿರ್ವಹಿಸಲಿದೆ. ಅಂಕಿಅಂಶಗಳು ಮತ್ತು ಇತರ ಮಾಹಿತಿಗಳನ್ನು ಸಂಗ್ರಹಿಸುವುದು ಮತ್ತು ವರದಿಗಳನ್ನು ಸಿದ್ಧಪಡಿಸುವುದನ್ನೂ ಐಸಿಸಿ ಕೇಂದ್ರ ಮಾಡಲಿದೆ.

  ವೈದ್ಯರು ಮತ್ತು ಆರೋಗ್ಯ ಇಲಾಖೆಯ ತಜ್ಞರು, ಕೋವಿಡ್ ರೂಮ್‌ ಬಳಸುವ ಮೂಲಕ, ಟೆಲಿಮೆಡಿಸಿನ್‌ (ಆನ್‌ಲೈನ್‌) ಮುಖೇನ ಚಿಕಿತ್ಸೆ ನೀಡಲು ಮತ್ತು ಔಷಧಿ ನೀಡಲು ಸಾಧ್ಯವಾಗಲಿದೆ. ಟೆಲಿಮೆಡಿಸಿನ್ ವಿಭಾಗವು ನಗರದ ಬೇರೆಡೆ ನಿರ್ಬಂಧಿತ ಪ್ರದೇಶಕ್ಕೆ, ಕ್ವಾರಂಟೈನ್‌ಗೆ ಒಳಗಾಗಿರುವವರಿಗೆ ಮತ್ತು ಮನೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಕೋವಿಡ್ ರೋಗಿಗಳಿಗೆ ಚಿಕಿತ್ಸೆ ನೀಡಲು, ಪರೀಕ್ಷಿಸಲು ಹಾಗೂ ಔಷಧಿ ನೀಡಲು ಸಹಕಾರಿಯಾಗಲಿದೆ.

  ಕೋವಿಡ್ ವಾರ್ ರೂಮ್ ಆ್ಯಪ್ ಡೌನ್‌ಲೋಡ್ ಮಾಡಿದರೆ, ಲಭ್ಯವಿರುವ ಆಸ್ಪತ್ರೆಗಳು, ವೆಂಟಿಲೇಟರ್, ಆಮ್ಲಜನಕ ಹಾಸಿಗೆಗಳು ಮತ್ತು ಅವುಗಳ ಚಿಕಿತ್ಸೆಗಳು, ಔಷಧಿಗಳು, ಇತರ ಮಾಹಿತಿಗಳು ಸ್ಮಾರ್ಟ್ ಫೋನ್‌ಗಳಲ್ಲಿ ಲಭ್ಯವಾಗಲಿದೆ. ಅಪ್ಲಿಕೇಶನ್ ಬಳಸುವ ಮೂಲಕ ಜನರು ಪ್ರತಿಕ್ರಿಯೆಯನ್ನು ನೀಡಬಹುದಾಗಿದೆ. ಸ್ಮಾರ್ಟ್ ಸಿಟಿ ಐಸಿಸಿ ಕೇಂದ್ರದಿಂದ ಕೋವಿಡ್ ಸೋಂಕಿತ ಜನರಿಗೆ ಮತ್ತು ಕೋವಿಡ್ ಸಂಬಂಧಿತ ಸಮಸ್ಯೆಗಳಿಗೆ ಬೇಕಾದ ಪರಿಹಾರ ಕಲ್ಪಿಸುವ ಹೊಸ ಅಪ್ಲಿಕೇಶನ್ ಅಭಿವೃದ್ದಿ ಪ್ರಕ್ರಿಯೆಯಲ್ಲಿದೆ ಎಂದು ಅಕ್ಷಿ ಶ್ರೀಧರ್ ಹೇಳಿದ್ದಾರೆ.