ಕುಂದಾಪುರ, ಮಾ.27 (DaijiworldNews/PY): ಅಮೇರಿಕಾದ ಕೊಲಂಬಿಯಾ ಮೇಸೋರಿಯನ್ ನಗರದಲ್ಲಿ ನಡೆದ ರೀಜನಲ್ ಸ್ಪೆಲ್ಲಿಂಗ್ ಬಿ ಸ್ಪರ್ಧೆಯಲ್ಲಿ ಕುಂದಾಪುರ ತಾಲೂಕಿನ ಅಂಪಾರು ಗ್ರಾಮದ ಬಾಳೆಬೇರು ಮನೆ ಮೂಲದ ಜೀಯಾ ಶೆಟ್ಟಿ ಪ್ರಥಮ ಸ್ಥಾನ ಪಡೆದಿದ್ದಾರೆ. ವಿಶೇಷವೆಂದರೆ, ಜೀಯಾಳ ಸಹೋದರಿ ಅನ್ಯಾ ಶೆಟ್ಟಿ ಪ್ರಾದೇಶಿಕ ಹಂತದ ಸ್ಪರ್ಧೆಯಲ್ಲಿ ಆಕೆಯ ಎದುರಾಳಿಯಾಗಿದ್ದರು.
ಜಿಯಾ ಶೆಟ್ಟಿ ಹಾಗೂ ಅನ್ಯಾ ಶೆಟ್ಟಿ ಇಬ್ಬರೂ ಬಾಳೆಬೇರು ಮನೆಯ ಡಾ.ಪವನ್ ಕುಮಾರ್ ಶೆಟ್ಟಿ ಹಾಗೂ ಚೈತ್ರಾ.ಪಿ ಶೆಟ್ಟಿ ದಂಪತಿಯ ಪುತ್ರಿಯರು. ಅವರು ಅಮೇರಿಕಾದಲ್ಲಿ ನೆಲೆಸಿದ್ದಾರೆ. ಜೀಯಾ (14) ಕಳೆದ ವರ್ಷವೂ ಪ್ರಾದೇಶಿಕ ಸ್ಪರ್ಧೆಯಲ್ಲಿ ಚಾಂಪಿಯನ್ ಆಗಿದ್ದರು. ಆದರೆ, ಕಳೆದ ವರ್ಷ ಕೊರೊನಾ ಸಾಂಕ್ರಾಮಿಕದ ಕಾರಣದಿಂದ ಈ ಸ್ಪರ್ಧೆ ಮುಂದುವರಿದಿರಲಿಲ್ಲ. ಈ ಬಾರಿ ಜೀಯಾಳ ಸಹೋದರಿ 10 ವರ್ಷದ ಅನ್ಯಾ ಶೆಟ್ಟಿ ಕೊನೆಯ ಸುತ್ತಿನಲ್ಲಿ ಅಕ್ಕನಿಗೆ ಎದುರಾಳಿಯಾಗಿದ್ದರು. ಕಳೆದ ಬಾರಿ ಅನ್ಯಾ ಕೂಡಾ ಸ್ಪರ್ಧಿಸಿದ್ದು, ಅಂತಿಮ ಹಂತದಲ್ಲಿ ವಿಫಲರಾಗಿದ್ದರು.
"ನಮಗಿಬ್ಬರಿಗೆ ವಯಸ್ಸಿನಲ್ಲಿ ಹೆಚ್ಚು ಅಂತರವಿಲ್ಲ. ಇಬ್ಬರೂ ಅನೇಕ ಸಮಾನ ಆಸಕ್ತಿಗಳನ್ನು ಹೊಂದಿದ್ದೇವೆ. ಯಾರು ಉತ್ತಮ ಎನ್ನುವುದೇ ನಮ್ಮೊಳಗಿನ ಸ್ಪರ್ಧೆಯಾಗಿದೆ" ಎಂದು ಅನ್ಯಾ ಶೆಟ್ಟಿ ಹೇಳಿದ್ದಾರೆ.
"ಓದುವ ವೇಳೆ ನಾನು ಅನೇಕ ಪದಗಳ ಸ್ಪೆಲ್ಲಿಂಗ್ ಅನ್ನು ಪರಿಚಯಿಸಿಕೊಳ್ಳುತ್ತೇನೆ. ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲಾ ನಾನು ಹೊಸ ಪದಗಳನ್ನು ಪರಿಚಯ ಮಾಡಿಕೊಳ್ಳುತ್ತೇನೆ" ಎನ್ನುತ್ತಾರೆ ಜೀಯಾ ಶೆಟ್ಟಿ.
ಈ ಬಗ್ಗೆ ಅನ್ಯಾ ಹಾಗೂ ಜೀಯಾ ಅವರ ತಾಯಿ ಚೈತ್ರಾ ಶೆಟ್ಟಿ ಪ್ರತಿಕ್ರಿಯೆ ನೀಡಿದ್ದು, "ಸ್ಪರ್ಧೆ ಅಕ್ಕ-ತಂಗಿಯರ ನಡುವೆ ಅಲ್ಲ. ಇಬ್ಬರೂ ಕೂಡಾ ತಮ್ಮ ಎದುರಾಗಿ ತಾವೇ ಸ್ಪರ್ಧಿಸಿಕೊಳ್ಳುತ್ತಾರೆ" ಎಂದಿದ್ದಾರೆ.