ಮಂಗಳೂರು: ಹಣ ಹಿಂದಿರುಗಿಸಿ ಪ್ರಾಮಾಣಿಕತೆ ಮೆರೆದ ರಿಕ್ಷಾ ಚಾಲಕನಿಗೆ ಸನ್ಮಾನ

•   Wed, Aug 29 2018 01:01:34 PM



• ಅನುಷ್ ಪಂಡಿತ್

  ಮಂಗಳೂರು, ಆ29(SS): ಕಳೆದ ಕೆಲ ದಿನಗಳ ಹಿಂದೆ ಪ್ರಯಾಣಿಕರೊಬ್ಬರು ಮರೆತು ಹೋಗಿದ್ದ ಒಂದು ಲಕ್ಷದ ಹತ್ತು ಸಾವಿರ ರೂ.ಹಣವಿದ್ದ ಬ್ಯಾಗನ್ನು ಆಟೊ ರಿಕ್ಷಾ ಚಾಲಕ ಹಿಂದಿರುಗಿಸುವ ಮೂಲಕ ಪ್ರಾಮಾಣಿಕತೆ ಮೆರೆದ ಘಟನೆ ಮಂಗಳೂರಿನಲ್ಲಿ ನಡೆದಿದ್ದು, ಈ ಮಾನವೀಯತೆಯ ಕಾರ್ಯಕ್ಕೆ ಚಾಲಕನನ್ನು ಸನ್ಮಾನಿಸಲಾಗಿದೆ. 

  

  

  

  ಬಜಾಲ್ ನಿವಾಸಿ ವಸಂತ ಶೆಟ್ಟಿ ರಿಕ್ಷಾದಲ್ಲಿ ಬಿಟ್ಟುಹೋಗಿದ್ದ ಹಣವನ್ನು ಹಿಂತಿರುಗಿಸಿ ಪ್ರಾಮಾಣಿಕತೆ ಮೆರೆದ ರಿಕ್ಷಾ ಚಾಲಕ. ಇವರು ತಮ್ಮ ರಿಕ್ಷಾದಲ್ಲಿ ಪ್ರಯಾಣಿಕರೊಬ್ಬರು ಬಿಟ್ಟು ಹೋಗಿದ್ದ ಹಣವನ್ನು ಉಳ್ಳಾಲ ಠಾಣಾಧಿಕಾರಿಗೆ ತಲುಪಿಸಿದ್ದರು. ಈಮೂಲಕ ಪ್ರಯಾಣಿಕರಿಗೆ ಹಣವನ್ನು ಹಿಂದುರಿಗಿಸಿ ಠಾಣಾಧಿಕಾರಿಯಿಂದ ವಸಂತ್ ಶೆಟ್ಟಿ ಮೆಚ್ಚುಗೆ ಪಡೆದುಕೊಂಡಿದ್ದರು.

  ಇದೀಗ ಪ್ರಾಮಾಣಿಕತೆ ಮೆರೆದ ರಿಕ್ಷಾ ಚಾಲಕ ವಸಂತ ಶೆಟ್ಟಿ ಅವರನ್ನು ಸೌತ್ ಬ್ಲಾಕ್ ಕಾಂಗ್ರೆಸ್ ಸಮಿತಿ ‌ಕಾರ್ಮಿಕ ಘಟಕದ ಅಧ್ಯಕ್ಷ ನವೀನ್ ಸ್ಟೀವನ್ ನೇತ್ರತ್ವದಲ್ಲಿ ಹಾಗೂ ರಿಕ್ಷಾ ಚಾಲಕ ಮಾಲಕರ ಸಹಯೋಗದಲ್ಲಿ ಸನ್ಮಾನಿಸಲಾಗಿದೆ.

  ಈ ವೇಳೆ ಹೋಂ ಗಾರ್ಡ್ ಆಗಿ ಸೇವೆ ಸಲ್ಲಿಸುತ್ತಿರುವ ಹಮೀದ್ ಪಾವಲ ಅವರನ್ನು ಕೂಡ ಸನ್ಮಾನಿಸಲಾಗಿದೆ. ಫಾ. ಜೆಮ್ಸ್ ಡಿಸೋಜ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ವೇದಿಕೆಯಲ್ಲಿ ಮಾಜಿ ಕಾರ್ಪೊರೇಟರ್ ನಾಗೇಂದ್ರ ಕುಮಾರ್, ಮೋಹನ್ ಮೆಂಡನ್, ಅಬೂಬಕ್ಕರ್ ಬಜಾಲ್, ಜ್ಞಾನೇಶ್ ಮೊದಲಾದವರು ಉಪಸ್ಥಿತರಿದ್ದರು.