ಪುತ್ತೂರು: ಸಿನಿಮಾ ಹೀರೋನಂತೆ ತನ್ನನ್ನು ತಾನು ಬಿಂಬಿಸಲು ಹೋಗಿ ಪೊಲೀಸರ ಅತಿಥಿಯಾದ ಪುಂಡ ವಿದ್ಯಾರ್ಥಿ

•   Mon, Jun 11 2018 01:27:09 PM



• ಮಂಗಳೂರು, ಜೂ 11 : ಪುತ್ತೂರಿನ ಖಾಸಗಿ ಕಾಲೇಜಿನ ವಿದ್ಯಾರ್ಥಿಯೋರ್ವ ಆರು ತಿಂಗಳ ಹಿಂದೆ ತನ್ನ ಸಹಪಾಠಿಗಳಿಗೆ ಹಲ್ಲೆ ನಡೆಸಿ ಕಿರುಕುಳ ನೀಡಿರುವ ಬೇರೆ ಬೇರೆ ಎರಡು ತುಣುಕು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಪುಂಡ ವಿದ್ಯಾರ್ಥಿಯನ್ನು ಕಾಲೇಜಿನ ಹಿರಿಯ ವಿದ್ಯಾರ್ಥಿ ಅಜಯನಾಥ ಶೆಟ್ಟಿ ಎಂದು ಗುರುತಿಸಲಾಗಿದೆ. ಕಾಲೇಜಿನ ಪರಿಸರದಲ್ಲಿ ಸಿನಿಮಾದಂತೆ ತನ್ನನ್ನು ತಾನು ಹೀರೋ ನಂತೆ ಬಿಂಬಿಸಲು ಹೋಗಿ ಇದೀಗ ಆತನೇ ಪೊಲೀಸರ ಅತಿಥಿಯಾಗಿದ್ದಾನೆ.

  

  ಈ ವೀಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಇದು ಜಿಲ್ಲಾ ಪೊಲೀಸ್ ಅಧೀಕ್ಷಕರ ಗಮನಕ್ಕೆ ಬಂದಾಗ ಸಂಬಂಧಪಟ್ಟವರಿಗೆ ಸೂಕ್ತವಾದ ತನಿಖೆ ನಡೆಸುವಂತೆ ಸೂಚಿದ್ದಾರೆ. ಅಲ್ಲದೆಇನ್ನೊಂದು ಮಾಹಿತಿ ಪ್ರಕಾರ ಈ ಬಗ್ಗೆ ನೊಂದ ವಿದ್ಯಾರ್ಥಿಯೋರ್ವ ಹಲ್ಲೆಯ ದೃಶ್ಯಗಳ ಸಹಿತ ಪತ್ರ ಬರೆದು ಮಾಹಿತಿ ನೀಡಿದ್ದಾನೆ ಎನ್ನಲಾಗಿದೆ.

  ಅಜಯನಾಥ ಶೆಟ್ಟಿ ಎಂಬಾತ ಕಾಲೇಜಿನ ಇತರ ವಿದ್ಯಾರ್ಥಿಗಳಿಗೆ ಹಲ್ಲೆ ನಡೆಸಿ ವೀಡಿಯೋ ಮಾಡಿ ಬಳಿಕ ಫೇಸ್ ಬುಕ್ ಹಾಗೂ ವಾಟ್ಸಾಪ್ ಮೂಲಕ ಹರಿಬಿಟ್ಟು ಶೋಕಿ ಮಾಡುವುದು ಈತನ ಹವ್ಯಾಸ ಅಂತ ಈಗ ಹಲ್ಲೆಗೊಳಗಾದ ಕೆಲ ವಿದ್ಯಾರ್ಥಿಗಳು ಹೇಳಿದ್ದಾರೆ. ಜೊತೆಗೆ ಈತ ಕರಾಟೆಯಲ್ಲಿ ಬ್ಲ್ಯಾಕ್ ಬೆಲ್ಟ್ ಆಗಿದ್ದು, ಈತ ಶೋ ಮಾಡಲು ಇತರೆ ವಿದ್ಯಾರ್ಥಿಗಳಿಗೆ ಹಲ್ಲೆ ಮಾಡುತ್ತಿರುತ್ತಾನೆ ಅಂತ ಕಿರುಕುಳಕ್ಕೆ ಒಳಗಾದವರು ಆರೋಪಿಸಿದ್ದರೆ. ಅಲ್ಲದೆ ತನ್ನ ಮಾವನ ಜೊತೆಗೆ ಸೇರಿಕೊಂಡು ರೌಡಿಯಂತೆ ವರ್ತಿಸುತ್ತಾನೆ. ಇದೀಗ ಈ ಪುಂಡ ಪೋಕಿರಿ ವಿದ್ಯಾರ್ಥಿಯನ್ನ ಪೊಲೀಸರು ಬಂಧಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.