ಉಡುಪಿ, ಸೆ 18 (DaijiworldNews/PY): ನಗರದ ಹೃದಯ ಭಾಗದಲ್ಲಿರುವ ಹಳೆಯ ಕಟ್ಟಡ ರಾಯಲ್ ಮಹಲ್ನ ಒಂದು ಪಾರ್ಶ್ವ ಶುಕ್ರವಾರ ಕುಸಿದಿದ್ದು, ಪರಿಣಾಮ ಹತ್ತಿರದ ಎರಡು ಅಂಗಡಿಗಳಿಗೆ ಹಾನಿಯಾಗಿದೆ.
ಚಿತ್ತರಂಜನ್ ಸರ್ಕಲ್ ಬಳಿ ಇರುವ ರಾಯಲ್ ಮಹಲ್ ಮೂರು ಅಂತಸ್ತಿನ ಕಟ್ಟಡವಾಗಿದ್ದು, ಇದರ ಮೊದಲ ಹಾಗೂ ಎರಡನೇ ಸಂಕೀರ್ಣದಲ್ಲಿ ವಸತಿ ಸೌಕರ್ಯವಿದ್ದು, ಇದು ನಗರದ ಮೊದಲ ಕಟ್ಟಡಗಳಲ್ಲಿ ಒಂದಾಗಿದೆ.
ಕಟ್ಟಡ ಕುಸಿದ ಪರಿಣಾಮ, ತಳಹದಿಯಲ್ಲಿದ್ದ ಬೇಕರಿ, ಔಷಧಿ ಅಂಗಡಿಗಳಲ್ಲಿದ್ದ ಸಿಬ್ಬಂದಿಗಳು ಹೊರಕ್ಕೆ ಓಡಿ ಬಂದಿದ್ದಾರೆ. ಆದರೆ ಕಟ್ಟಡದಲ್ಲಿದ್ದ ಹೊಟೇಲ್ ಹಾಗೂ ಲಾಂಡ್ರಿ ಅಂಗಡಿ ಸಂಪೂರ್ಣವಾಗಿ ಹಾನಿಗೊಳಗಾಗಿದೆ.
ಈ ಕಟ್ಟಡವು ಹಲವಾರು ವರ್ಷಗಳಿಂದ ಶಿಥಿಲಾವಸ್ಥೆಯಲ್ಲಿತ್ತು. ಅಲ್ಲದೇ ಇದು ಸುಮಾರು 50 ವರ್ಷಗಳ ಹಳೆಯ ಕಟ್ಟಡವಾಗಿದೆ ಎಂದು ವರದಿಯಾಗಿದೆ.
ಘಟನೆಯಲ್ಲಿ ಯಾವುದೇ ಗಾಯಗಳಾಗಿಲ್ಲ. ಅಲ್ಲದೇ, ಮೆಸ್ಕಾಂ ಸಿಬ್ಬಂದಿಗಳು ಕಟ್ಟಡದ ವಿದ್ಯುತ್ ಸಂಪರ್ಕವನ್ನು ಕಡಿತಗೊಳಿಸಿದ ಕಾರಣ ಹೆಚ್ಚು ಹಾನಿಯಾಗುವುದನ್ನು ತಡೆಗಟ್ಟಿದೆ ಎಂದು ಮೂಲಗಳು ತಿಳಿಸಿವೆ.