ಉಪನ್ಯಾಸಕಿಯಾಗುವ ಕನಸು ಹೊತ್ತ ಎಸ್‌ಎಸ್‌ಎಲ್‌ಸಿಯಲ್ಲಿ ರಾಜ್ಯಕ್ಕೆ ಮೂರನೇ ರ್‍ಯಾಂಕ್‌ ಪಡೆದ ಬಂಟ್ವಾಳದ ಅವ್ರಿಲ್‌

•   Sun, Aug 16 2020 08:56:48 PM



• ಬಂಟ್ವಾಳ, ಆ. 16 (DaijiworldNews/MB) : ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ರಾಜ್ಯಕ್ಕೆ ಮೂರನೇ ರ್‍ಯಾಂಕ್‌ ಪಡೆಯುವ ಮೂಲಕ ಕೀರ್ತಿ ಗಳಿಸಿರುವ ಬಂಟ್ವಾಳದ ಅವ್ರಿಲ್‌ ಲೀವಾ ಲೂವಿಸ್‌ ಅವರು ಉಪನ್ಯಾಸಕಿಯಾಗುವ ಕನಸು ಹೊತ್ತಿದ್ದಾರೆ.

  

  ಮೊಡಂಕಾಪು ಗಾಂಧೋಡಿ ನಿವಾಸಿ ಅವಿಲ್‌ ಲೂವಿಸ್‌ ಹಾಗೂ ಲವೀನಾ ಡಿ ಸೋಜಾ ದಂಪತಿಯ ಪುತ್ರಿ, ಮೊಡಂಕಾಪು ಇನ್ಫೆಂಟ್‌ ಜೀಸಸ್ ಆಂಗ್ಲ ಮಾಧ್ಯಮ ಶಾಲೆಯ ಅವ್ರಿಲ್‌ ಲೀವಾ ಲೂವಿಸ್‌ ಅವರು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ 625 ಅಂಕಗಳಲ್ಲಿ 623 ಅಂಕವನ್ನು ಗಳಿಸುವ ಮೂಲಕ ರಾಜ್ಯದಲ್ಲಿ ಮೂರನೇ ರ್‍ಯಾಂಕ್‌ ಪಡೆದಿದ್ದಾರೆ.

  ಇನ್ನು ಈ ಬಗ್ಗೆ ಮಾತನಾಡಿರುವ ಅವ್ರಿಲ್‌ ಅವರು, ತಾನು ಉಪನ್ಯಾಸಕಿ ಆಗುವ ಗುರಿಯನ್ನು ಹೊಂದಿದ್ದೇನೆ ಎಂದು ತಿಳಿಸಿದ್ದಾರೆ.

  ''ಕೊರೊನಾ ಸೋಂಕು ಲಾಕ್‌ಡೌನ್‌ ಸಂದರ್ಭದಲ್ಲಿ ಹಳೆಯ ಪ್ರಶ್ನಾ ಪತ್ರಿಕೆಗಳಿಗೆ ನಿಗದಿತ ಸಮಯದಲ್ಲಿ ಉತ್ತರಿಸುವ ಅಭ್ಯಾಸವನ್ನು ಮಾಡಿಕೊಂಡೆ. ಇದು ನನಗೆ ಉತ್ತಮ ಅಂಕ ಪಡೆಯಲು ಸಹಾಯವಾಯಿತು'' ಎಂದು ಹೇಳಿದ್ದಾರೆ.

  ಇನ್ನು ''ನಾನು ನಿರೀಕ್ಷೆ ಮಾಡಿದ್ದ ಅಂಕಕ್ಕಿಂತ ಒಂದು ಅಂಕ ಅಧಿಕವೇ ಬಂದಿದೆ. ಪೋಷಕರು, ಶಿಕ್ಷಕರು ಉತ್ತಮ ಸಹಕಾರ ನೀಡಿದ್ದಾರೆ. ಮುಂದೆ ವಿಜ್ಞಾನದಲ್ಲಿ ಉನ್ನತ ವ್ಯಾಸಂಗ ಮಾಡಬೇಕೆಂದು ಬಯಸಿದ್ದೇನೆ. ಹಾಗೆಯೇ ಪಿಎಚ್‌ಡಿ ಮಾಡಿ ಉಪನ್ಯಾಸಕಿ ಆಗುವ ಗುರಿಯನ್ನು ಹೊಂದಿದ್ದೇನೆ'' ಎಂದು ತಿಳಿಸಿದ್ದಾರೆ.