ಪಿಲಾರು : ಸುಲಿಗೆ ಆರೋಪಿ ಬಂಧನ - ಚಿನ್ನದ ಸರ, ಬೈಕ್‌‌ ವಶಕ್ಕೆ

•   Fri, Jan 31 2020 08:00:09 AM



• ಕಾಪು, ಜ.31 (Daijiworld News/PY) : ಶಿರ್ವ ಪೊಲೀಸ್‌ ಠಾಣಾ ವ್ಯಾಪ್ತಿಯ ಪಿಲಾರು ಹಲಸಿನಕಟ್ಟೆಯಲ್ಲಿ ಅಂಗಡಿ ಮಾಲಕರೋರ್ವರ ಸರ ಕಸಿದು ಪರಾರಿಯಾಗಿದ್ದ ಮತ್ತೋರ್ವ ಆರೋಪಿ, ಹಾಳೆಕಟ್ಟೆ ಕಲ್ಯಾ ನಿವಾಸಿ ಭೋಜರಾಜ ಯಾನೆ ಅನಿಲ್‌‌(35) ಎಂಬಾತನನ್ನು ಪೊಲೀಸರು ಜ.29ರಂದು ಬಂಧಿಸಿದ್ದಾರೆ. ಈ ಪ್ರಕರಣದ ಓರ್ವ ಆರೋಪಿ ರೊನಾಲ್ಡ್‌‌ ಬರ್ಬೊಜಾ ಈಗಾಗಲೇ ಪೊಲೀಸರ ವಶದಲ್ಲಿದ್ದಾನೆ.

  

  ಪಿಲಾರು ಹಲಸಿನಕಟ್ಟೆ ನಿವಾಸಿಜೆರೋಮ್‌ ಅಂದಾದ್ರೆ ಎಂಬುವವರು ತನ್ನ ಅಂಗಡಿಯನ್ನು ಮುಚ್ಚುತ್ತಿರುವ ಸಂದರ್ಭ ಅಪರಿಚಿತ ವ್ಯಕ್ತಿಯೋರ್ವ ಬಂದು ಅವರ ಕುತ್ತಿಗೆಯಿಲ್ಲಿದ್ದ 17 ಗ್ರಾಂ ತೂಕದ ಚಿನ್ನದ ರೇಡಿಯಂ ಸರ ಹಾಗೂ ಲಾಕೆಟ್‌ ಅನ್ನು ಸೆಳೆದು ಮತ್ತೋರ್ವನ ಜೊತೆಯಲ್ಲಿ ಬೈಕಿನಲ್ಲಿ ಪರಾರಿಯಾಗಿದ್ದ. ಈ ಸಂಬಂಧ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

  ಆರೋಪಿಗಳ ಪತ್ತೆಗಾಗಿ ಬಲೆ ಬೀಸಿದ್ದ ಪೊಲೀಸರು, ಕಾರ್ಕಳ ಗ್ರಾಮಾಂತರ ಠಾಣೆಯ ವ್ಯಾಪ್ತಿಯಲ್ಲಿ ಕೊಲೆ ಪ್ರಕರಣವೊಂದರಲ್ಲಿ ಬಂಧಿತನಾಗಿದ್ದ ರೊನಾಲ್ಡ್‌ ಬರ್ಬೋಜ ಎಂಬಾತನನ್ನು ಸಂಶಯದ ಮೇಲೆ ವಶಕ್ಕೆ ಪಡೆದುಕೊಂಡು ವಿಚಾರಣೆಗೆ ಒಳಪಡಿಸಿದ್ದರು. ವಿಚಾರಣೆಯ ವೇಳೆ ಆತ ಭೋಜರಾಜ್‌ ಜೊತೆಗೂಡಿ ಪಿಲಾರಿನಲ್ಲಿ ಸರ ಕಳವು ಮಾಡಿರುವುದಾಗಿ ಹೇಳಿದ್ದಾನೆ.