ಮಂಗಳೂರು: ದಿನೇಶ್ ಮಟ್ಟು, ಸಾಮರಸ್ಯ ಕೆಡಿಸಲು ಪ್ರಯತ್ನಿಸಿದ್ದಾರೆ- ಜಿಲ್ಲಾ ಬಿಜೆಪಿ ಕಿಡಿ

•   Thu, Feb 01 2018 05:51:05 PM



• ಮಂಗಳೂರು ಫೆ. 01 : ನಗರದ ಕೇಂದ್ರ ಮೈದಾನದಲ್ಲಿ ಜ.30 ರ ಮಂಗಳವಾರ ನಡೆದ ಮಾನವ ಸರಪಳಿ ಕಾರ್ಯಕ್ರಮವನ್ನು ಮುಖ್ಯಮಂತ್ರಿಗಳ ಮಾಧ್ಯಮ ಸಲಹೆಗಾರ ದಿನೇಶ್ ಅಮೀನ್ ಮಟ್ಟು ತನ್ನ ರಾಜಕೀಯ ವಿರೋಧಿಗಳನ್ನು ಟೀಕಿಸಲು ಬಳಸಿಕೊಂಡಿರುವುದನ್ನು ಜಿಲ್ಲಾ ಬಿಜೆಪಿ ಖಂಡಿಸಿದೆ. ಈ ಬಗ್ಗೆ ಫೆ 1 ರಂದು ನಗರದ ಜಿಲ್ಲಾ ಬಿಜೆಪಿ ಕಚೇರಿಯಲ್ಲಿ ಪತ್ರಿಕಾಗೋಷ್ಟಿ ನಡೆಸಿ ಮಾತನಾಡಿದ ಬಿಜೆಪಿ ವಕ್ತಾರ ಸುಲೋಚನಾ ಭಟ್ , ಕೋಮು ಸೌಹಾರ್ದತೆಯ ಕಾರ್ಯಕ್ರಮವನ್ನು ದಿನೇಶ್ ಮಟ್ಟು ಇನ್ನೊಬ್ಬರ ಬಗ್ಗೆ ಟೀಕೆ ಕುಹಕ ಮಾತುಗಳಿಂದ ಸಾಮರಸ್ಯವನ್ನು ಕೆಡಿಸಲು ಬಳಸಿಕೊಂಡಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಬ್ರಹ್ಮಶ್ರೀ ನಾರಾಯಣ ಗುರುಗಳ ಏಕತೆಯ ಆಶಯಕ್ಕೆ ವಿರುದ್ದವಾಗಿ ರಾಜಕೀಯ ಲಾಭ ಪಡೆಯುವ ಉದ್ದೇಶದಿಂದ ಕಲ್ಲಡ್ಕದ ಡಾ. ಪ್ರಭಾಕರ ಭಟ್ ಮತ್ತು ಮಾಜಿ ಸಚಿವ ಜನಾರ್ಧನ ಪೂಜಾರಿಯವರನ್ನು ಟೀಕಿಸಿದ್ದಾರೆ. ಜಾತ್ಯತೀತ ಹೆಸರಿನಲ್ಲಿ ಜಾತೀಯ ಮತ್ತು ಮತೀಯ ಭಾವನೆಗಳನ್ನು ಕೆದಕಿ ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ರಾಜಕೀಯ ಲಾಭ ಮಾಡಿಕೊಳ್ಳಲು ಹುನ್ನಾರ ನಡೆಸಿರುವುದನ್ನು ಪ್ರಜ್ಞಾವಂತ ನಾಗರಿಕರು ಅರ್ಥ ಮಾಡಿಕೊಳ್ಳಬಲ್ಲರು ಎಂದರು .

  

  
  ಇದಲ್ಲದೆ ಗೌರಿ ಹತ್ಯೆಯನ್ನು ಓಟು ರಾಜಕಾರಣಕ್ಕೆ ಬೆಸಯಲು ಹೆಣೆದ ತಂತ್ರದ ಭಾಗವಾಗಿ ಗೌರಿ ಜನ್ಮದಿನ ಕಾರ್ಯಕ್ರಮವನ್ನು ಬಳಸಿಕೊಂಡದ್ದು ಈ ಕುತಂತ್ರಕ್ಕೆ ಹಿರಿಯರಾದ ದೊರೆಸ್ವಾಮಿಯಂತವರನ್ನು ಬಳಕೆ ಮಾಡಿಕೊಂಡಿರುವುದು ದುರದೃಷ್ಟಕರ ಎಂದರು. 
  ಪತ್ರಿಕಾಗೋಷ್ಟಿಯಲ್ಲಿ ಸಂಜಯ್ ಪ್ರಭು, ಸತೀಶ್ ಪ್ರಭು, ಮುಂತಾದವರು ಉಪಸ್ಥಿತರಿದ್ದರು.