ಕಡಬ: ಅಡಿಕೆ ಮರದಿಂದ ಆಯತಪ್ಪಿ ಬಿದ್ದು ಕಾರ್ಮಿಕ ಸಾವು

•   Wed, Dec 18 2019 09:57:50 PM



• ಕಡಬ, ಡಿ 18 (DaijiworldNews/SM): ಅಡಿಕೆ ತೆಗೆಯಲೆಂದು ಅಡಿಕೆ ಮರಕ್ಕೆ ಏರಿದ್ದ ವ್ಯಕ್ತಿಯೋರ್ವರು ಆಯತಪ್ಪಿ ಮರದಿಂದ ಬಿದ್ದು ಗಂಭೀರ ಗಾಯಗೊಂಡು ಬಳಿಕ ಮೃತಪಟ್ಟ ಘಟನೆ ಇಲ್ಲಿನ ಕೋಡಿಂಬಾಳ ಗ್ರಾಮದ ದೊಡ್ಡಕೊಪ್ಪ ಎಂಬಲ್ಲಿ ನಡೆದಿದೆ.

  

  ದೊಡ್ಡಕೊಪ್ಪ ನಿವಾಸಿ ರುಕ್ಮಯ್ಯ ಕುಂಬಾರ(54) ಮೃತಪಟ್ಟ ದುರ್ದೈವಿ. ಇವರು ಸ್ಥಳೀಯವಾಗಿ ಅಡಿಕೆ ಕೀಳುವ ವೃತ್ತಿಯನ್ನು ಮಾಡಿಕೊಂಡಿದ್ದರು. ಎಂದಿನಂತೆ ಡಿಸೆಂಬರ್ ೧೮ರ ಬುಧವಾರ ಸ್ಥಳೀಯವಾಗಿ ಅಡಿಕೆ ಕೀಳಲು ತೆರಳಿದ್ದರು. ಅಡಿಕೆ ಕೀಳಲು ಮರವೇರಿದ್ದ ರುಕ್ಮಯ್ಯ ಆಯತಪ್ಪಿ ಮರದಿಂದ ಬಿದ್ದಿದ್ದಾರೆ. ಮರದಿಂದ ಬಿದ್ದ ರುಕ್ಮಯ ಗಂಭೀರ ಗಾಯಗೊಂಡಿದ್ದರು. ತಕ್ಷಣ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ರವಾನಿಸಲಾಯಿತು. ಆದರೆ, ಆಸ್ಪತ್ರೆಗೆ ಸಾಗಿಸುವ ದಾರಿ ಮಧ್ಯೆ ಅವರು ಮೃತಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ.

  ಮೃತದೇಹದ ಮರಣೋತ್ತರ ಪರೀಕ್ಷೆಯನ್ನು ಕಡಬ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ನಡೆಸಲಾಗಿದೆ. ಮೃತರು ಪತ್ನಿ, ಇಬ್ಬರು ಪುತ್ರಿಯರು ಹಾಗೂ ಒಬ್ಬ ಪುತ್ರನನ್ನು ಅಗಲಿದ್ದಾರೆ.

  ಈ ಕುರಿತಂತೆ ಕಡಬ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.