ಮಂಗಳೂರು: 'ಸಿದ್ದು ಸಿಎಂ ಹುದ್ದೆಯ ಹಗಲುಗನಸು ಕಾಣುತ್ತಿದ್ದಾರೆ' - ನಳಿನ್ ಕುಮಾರ್‌ ಕಟೀಲ್‌

•   Sat, Nov 30 2019 03:16:28 PM



• ಮಂಗಳೂರು, ನ 30 (Daijiworld News/MB) : "ಮಾಜಿ ಮುಖ್ಯ ಮಂತ್ರಿ ಸಿದ್ದರಾಮಯ್ಯನವರು ಹಲವು ಬಾರಿ ಹಗಲುಗನಸು ಕಂಡಿದ್ದಾರೆ. ಕಳೆದ ಚುನಾವಣೆ ಸಂದರ್ಭದಲ್ಲಿ ನಾನೇ ಮುಂದಿನ ಮುಖ್ಯಮಂತ್ರಿ ಎಂದು ಹೇಳುತ್ತಿದ್ದರು, ಆದರೆ ಕುಮಾರಸ್ವಾಮಿ ಮುಖ್ಯಮಂತ್ರಿ ಆದರು. ಆ ಬಳಿಕ ಈಗ ಮುಂದಿನ ಮುಖ್ಯಮಂತ್ರಿ ನಾನು ಎಂದು ಹೇಳಿದರು. ಆದರೆ ಯಡಿಯೂರಪ್ಪ ಮುಖ್ಯಮಂತ್ರಿಯಾದರು. ಅವರ ಗ್ರಹಚಾರ ಸರಿ ಇಲ್ಲ" ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್‌ ವ್ಯಂಗ್ಯ ಮಾಡಿದರು.

  

  

  ಇಂದು ನಗರದಲ್ಲಿ ಸಂಸದರ ಕಚೇರಿ ಉದ್ಘಾಟನೆ ಸಮಾರಂಭ ನಡೆದಿದ್ದು ಬಿ.ಎಲ್‌. ಸಂತೋಷ್‌ ಉದ್ಘಾಟನೆ ಮಾಡಿದರು.

  ಈ ಸಂದರ್ಭದಲ್ಲಿ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ನಳಿನ್ ಅವರು, "ಕಾಂಗ್ರೆಸ್‌ನವರು ಬುಗುರಿ ಆಡಿಸುತ್ತಾರೆ. ನಾವು ಚಕ್ರ ತಿರುಗಿಸುತ್ತೇವೆ. ಜೆಡಿಎಸ್‌ ಕಾಂಗ್ರೆಸ್‌ ಒಂದಾಗಿಯೇ ಇದ್ದಾರೆ. ಅವರು ಡಿವೋರ್ಸ್ ತೆಗೆದುಕೊಳ್ಳಲು ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದಾರೆ. ಅದು ಆಗಿಲ್ಲ ಇನ್ನೂ ದೇವೆಗೌಡರ ನ್ಯಾಯಾಲಯದಲ್ಲಿ ಆಗಬೇಕು" ಎಂದು ಹೇಳಿದರು.

  "ಉಪಚುನಾವಣೆಯಲ್ಲಿ 15 ಕ್ಷೇತ್ರಗಳಲ್ಲಿ ನಾವೇ ಜಯಗಳಿಸುತ್ತೇವೆ. ನಮ್ಮ ಸರಕಾರ ಭದ್ರವಾಗುತ್ತದೆ. ಯಡಿಯೂರಪ್ಪನವರು 3 ವರ್ಷ ಸುಭದ್ರವಾಗಿ ಸರಕಾರವನ್ನು ನಡೆಸುತ್ತಾರೆ" ಎಂದು ಅವರು ತಿಳಿಸಿದರು.

  ಇನ್ನೂ ನಳಿನ್ ಅವರು ರಾಜ್ಯಾಧ್ಯಕ್ಷರಾದ ಬಳಿಕ ಯಡಿಯೂರಪ್ಪನವರಿಗೆ ನಿರುದ್ಯೋಗಿ ಆಗಿದ್ದಾರೆ ಎಂದು ಸಿದ್ಧರಾಮಯ್ಯ ಅವರು ಹೇಳಿದ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿದ ಅವರು "ಈ ಕುರಿತು ಡಿಸೆಂಬರ್ 9ರ ಬಳಿಕ ಉತ್ತರ ನೀಡುತ್ತೇನೆ" ಎಂದು ಹೇಳಿದ್ದಾರೆ.