ಕಾಸರಗೋಡು: ಸ್ನೇಹಿತನನ್ನೇ ಕೊಲೆಗೈದು ಬಾವಿಗೆಸೆದರು-ಇಬ್ಬರು ಆರೋಪಿಗಳು ಜೈಲು ಪಾಲಾದರು

•   Tue, Nov 05 2019 07:41:21 PM



• ಕಾಸರಗೋಡು, ನ.05 (DaijiworldNews/SM): ಯುವಕನನ್ನು ಕೊಲೆಗೈದು ಬಾವಿಗೆಸೆದ ಘಟನೆಗೆ ಸಂಬಂಧಪಟ್ಟಂತೆ ಇಬ್ಬರು ಆರೋಪಿಗಳನ್ನು ಕಾಸರಗೋಡು ನಗರ ಠಾಣಾ ಪೊಲೀಸರು ಬಂಧಿಸಿದ್ದಾರೆ.

  

  ಮಧೂರು ಪಟ್ಲದ ಶಾನ್ ವಾಜ್(27) ಎಂಬಾತನ ಕೊಲೆ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಮೊಗ್ರಾಲ್ ಕೆ.ಕೆ. ಪುರ ಚಲಿಯಾಂಗೋಡಿನ ಮುನವ್ವರ್ ಕಾಸಿಂ(25) ಮತ್ತು ನೆಲ್ಲಿಕುಂಜೆ ಶಾಂತಿನಗರದ ಕೆ. ಜಯಚಂದ್ರ(43)ನನ್ನು ಬಂಧಿಸಲಾಗಿದೆ. ಗಾಂಜಾ ವಹಿವಾಟಿನ ಕುರಿತ ದ್ವೇಷದಿಂದ ಆರೋಪಿಗಳು ಕೃತ್ಯ ನಡೆಸಲು ಕಾರಣ ಎಂದು ತನಿಖೆಯಿಂದ ತಿಳಿದು ಬಂದಿದೆ. ಪ್ರಕರಣದ ಇನ್ನೋರ್ವ ಆರೋಪಿಗಾಗಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

  ಅಕ್ಟೋಬರ್ 20ರಂದು ಕಾಸರಗೋಡು ನಗರದ ದಿನೇಶ್ ಬೀಡಿ ಕಂಪೆನಿ ಪರಿಸರದ ಪಾಲು ಬಾವಿಯಲ್ಲಿ ಕೊಳೆತ ಸ್ಥಿತಿಯಲ್ಲಿ ಶಾನ್ ವಾಜ್ ನ ಮೃತದೇಹ ಪತ್ತೆಯಾಗಿತ್ತು. ಬಾವಿ ಸಮೀಪ ಶಾನ್ ವಾಜ್ ನ ಕೂಲಿಂಗ್ ಗ್ಲಾಸ್, ಚೈನ್ ತುಂಡಾದ ಸ್ಥಿತಿಯಲ್ಲಿ ಪತ್ತೆಯಾದ ಹಿನ್ನಲೆಯಲ್ಲಿ ಕೊಲೆಗೈದು ಬಾವಿಗೆಸೆದ ಬಗ್ಗೆ ಪೊಲೀಸರು ಆರಂಭದಲ್ಲಿ ಸಂಶಯ ವ್ಯಕ್ತಪಡಿಸಿದ್ದರು.

  ಹೊಟ್ಟೆಯ ಕೆಳಗಡೆ ಆಳವಾದ ಗಾಯ ಪತ್ತೆಯಾಗಿತ್ತು. ಪೊಲೀಸರು ಶಾನ್ ವಾಜ್ ನ ಸ್ನೇಹಿತರನ್ನು ವಿಚಾರಣೆಗೊಳಪಡಿಸಿದ್ದರು. ಶಾನ್ ವಾಜ್ ನ ಮೊಬೈಲ್ ನ್ನು ಕೇಂದ್ರೀಕರಿಸಿ ತನಿಖೆ ನಡೆಸಿದ ಪೊಲೀಸರಿಗೆ ಆರೋಪಿಗಳ ಸುಳಿವು ಲಭಿಸಿದೆ.

  ಗಾಂಜಾ ವಹಿವಾಟಿನ ಕಮಿಷನ್ ಕುರಿತ ವಿವಾದವೇ ಕೊಲೆಗೆ ಕಾರಣ ಎಂದು ತನಿಖೆಯಿಂದ ತಿಳಿದುಬಂದಿದೆ.