ಕುಂದಾಪುರ: ಕಿಚ್ಚ ಸುದೀಪ್ ಅಭಿಮಾನಿಯ ಕೊಲೆಗೆ ಯತ್ನಿಸಿದ್ರೆ ವಿನಯ್​ ಗುರೂಜಿ ಭಕ್ತರು?

•   Tue, Oct 15 2019 09:59:15 AM



• ಕುಂದಾಪುರ,ಅ 15 (Daijiworld News/MSP): ನಟ ಕಿಚ್ಚ ಸುದೀಪ್​​ ಅವರ ಅಭಿಮಾನಿಯ ಮೇಲೆ ವಿನಯ್​ ಗುರೂಜಿ ಭಕ್ತರು ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ ಎನ್ನುವ ಆರೋಪ ಕೇಳಿ ಬಂದಿದೆ.

   

  ಈ ಘಟನೆ ಭಾನುವಾರ ಸಂಜೆ ಸಂಗಮ್ ಶಾಲೆ ಬಳಿ ನಡೆದಿದ್ದು, ಕಿಚ್ಚ ಸುದೀಪ್ ಅವರ ಅಭಿಮಾನಿಯಾಗಿರುವ ರತ್ನಾಕರ್​ ಪೂಜಾರಿ ಮೇಲೆ ನಾಲ್ವರು ದಾಳಿ ಮಾಡಿ ಕೊಲೆಗೆ ಯತ್ನಿಸಿದ್ದಾರೆ ಎನ್ನಲಾಗಿದೆ. ಈ ಸಂಬಂಧ ಸೋಮವಾರ ನಾಲ್ವರನ್ನು ಬಂಧಿಸಲಾಗಿದೆ. ಬಂಧಿತರನ್ನು ಗುರುರಾಜ್, ಸಂತೋಷ್ , ರವಿರಾಜ್, ಪ್ರದೀಪ್ ಅವರನ್ನು ಎಂದು ಗುರುತಿಸಲಾಗಿದೆ.

  ಹಲ್ಲೆಗೆ ಒಳಗಾದ ರತ್ನಾಕರ್​ ಪೂಜಾರಿ ನಟ ಸುದೀಪ್ ಅಭಿಮಾನಿಯಾಗಿದ್ದು, ಸುದೀಪ್ ರನ್ನು ಟೀಕಿಸಿದ್ದ ವಿನಯ್ ಗುರೂಜಿ ವಿರುದ್ದ ಇವರು ಫೇಸ್ ಬುಕ್ ಪೇಜ್ ನಲ್ಲಿ ಕಮೆಂಟ್ ಹಾಕಿದ್ದರು. ಇದೇ ಕಾರಣಕ್ಕೆ ವಿನಯ್ ಗುರೂಜಿಯನ್ನು ಟೀಕಿಸುತ್ತಿಯಾ ಎಂದು ಪ್ರಶ್ನಿಸಿ ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ.

  ಘಟನೆಯ ವಿವರ:
  ರತ್ನಾಕರ್​ ಪೂಜಾರಿ ಕಾರು ಚಾಲಕರಾಗಿದ್ದು, ಬಾಡಿಗೆ ನೆಲೆಯಲ್ಲಿ ಕುಂದಾಪುರ ಸಂಗಮ್ ಬಳಿ ಬಂದಿದ್ದರು. ಈ ಸಂದರ್ಭ ಅವರ ಪರಿಚಯ ಗುರುರಾಜ್ ಪುತ್ರನ್ ಎಂಬವರು ಕರೆ ಮಾಡಿ ಮಾತನಾಡಲು ಇದೆ ಬಾ ಎಂದಿದ್ದರು. ಕಾರನ್ನು ಬಾಡಿಗೆ ನೆಲೆಯಲ್ಲಿ ತೆಗೆದುಕೊಂಡು ಬಂದಿರುವ ಕಾರಣ ಈಗ ಬರಲು ಸಾಧ್ಯವಿಲ್ಲ ಎಂದು ರತ್ನಾಕರ್ ತಿಳಿಸಿದ್ದರು. ಈ ವೇಳೆ ಸಂಗಮ್ ಶಾಲೆ ಬಳಿ ಹೊಂಚು ಹಾಕಿ ಕುಳಿತ ಗುರುರಾಜ್, ಸಂತೋಷ್, ಹಾಗೂ ಇನ್ನು ೮-೧೦ ಮಂದಿಯ ತಂಡ ಹಲ್ಲೆ ನಡೆಸಿ ಕೊಲೆಗೆ ಯತ್ನಿಸಿದ್ದಾರೆ ಎಂದು ರತ್ನಕಾರ್ ಕುಂದಾಪುರ ಠಾಣೆಗೆ ದೂರು ನೀಡಿದ್ದಾರೆ.

  ಈ ಹಿನ್ನಲೆಯಲ್ಲಿ ನಾಲ್ವರು ಆರೋಪಿಗಳನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಅ.28 ರವರೆಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. ಇತರರ ಬಂಧನಕ್ಕೆ ಶೋಧ ಕಾರ್ಯ ಮುಂದುವರಿದಿದೆ.