ಮಂಗಳೂರು: ಮಳೆಯಿಂದಾಗಿ ಕರಾವಳಿಯಲ್ಲಿ 336 ಶಾಲೆಗಳಿಗೆ ಹಾನಿ

•   Mon, Aug 26 2019 11:29:57 AM



• ಮಂಗಳೂರು,ಆ 26 (Daijiworld News/RD): ಕರಾವಳಿಯಲ್ಲಿ ಭಾರೀ ಮಳೆಯಿಂದಾಗಿ ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಯ ಹಲವು ಕಡೆ ನೆರೆ ಉಂಟಾಗಿ ಮನೆ, ಜಮೀನು ನಾಶವಾದರೆ, ಇನ್ನೊಂದೆಡೆ ಜಿಲ್ಲೆಯ ಹಲವು ಶಾಲೆಗಳ ಗೋಡೆ ಕುಸಿದು ಬಿದ್ದು, ಹಲವೆಡೆ ಹಾನಿಯಾಗಿದೆ.

  

  ಜಿಲ್ಲೆಯಲ್ಲಿ ಒಟ್ಟು 1,816 ಶಾಲೆಗಳಿದ್ದು, ಈವರೆಗೆ ಒಟ್ಟು 336 ಶಾಲೆಗಳಿಗೆ ಹಾನಿಯಾಗಿದೆ ಎಂದು ವರದಿಗಳು ತಿಳಿಸಿವೆ. ವಲಯ ಶಿಕ್ಷಣಾಧಿಕಾರಿಗಳು ಮಳೆ ಹಾನಿಯ ಬಗ್ಗೆ ಆಯಾ ಶಾಲಾ ಮುಖ್ಯಸ್ಥರಿಂದ ವರದಿ ಪಡೆದು ಜಿಲ್ಲಾ ಶಿಕ್ಷಣಾಧಿಕಾರಿಗಳಿಗೆ ನೀಡಿದ್ದಾರೆ. ಜಿಲ್ಲಾಧಿಕಾರಿಗಳು ರಾಜ್ಯ ಸರಕಾರಕ್ಕೆ ಸಲ್ಲಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಹಾನಿಯಾಗಿದ್ದರೂ ಪಾಠ ಪ್ರವಚನ ನಡೆಸಲು ಅಡ್ಡಿಯಾಗಿಲ್ಲ. ಹೀಗಾಗಿ ತರಗತಿಗಳು ಎಂದಿನಂತೆ ಪಾಠಗಳು ನಡೆಯುತ್ತಿವೆ. ಕೊಠಡಿಗೆ ಹಾನಿಯಾಗಿರುವ ಕೆಲವೆಡೆ ಮಾತ್ರ ಅದೇ ಶಾಲೆಯ ಇನ್ನೊಂದು ಕೊಠಡಿಯಲ್ಲಿ ತರಗತಿ ನಡೆಸಲಾಗುತ್ತಿದೆ ಎಂದರು.

  ಉಡುಪಿ ಜಿಲ್ಲೆಗೆ ಹೋಲಿಸಿದರೆ, ದ.ಕ. ಜಿಲ್ಲೆಯಲ್ಲಿ ಅತೀ ಹೆಚ್ಚು ಶಾಲೆಗಳಿಗೆ ಹಾನಿಯಾಗಿದ್ದು, ಜಿಲ್ಲೆಯಲ್ಲಿ ಒಟ್ಟು 7 ವಲಯಗಳಲ್ಲಿ 221 ಶಾಲೆಗಳಿಗೆ ಹಾನಿಯಾಗಿದೆ. ವಲಯ ಕ್ಷೇತ್ರ ಶಿಕ್ಷಣಾಧಿಕಾರಿಗಳು ನೀಡಿರುವ ಅಂಕಿ ಅಂಶದ ಪ್ರಕಾರ ಬಂಟ್ವಾಳ ವಲಯದಲ್ಲಿ ಆಗಿರುವ ಹಾನಿ ಹೆಚ್ಚು. ಮಂಗಳೂರು ದಕ್ಷಿಣ ವಲಯದಲ್ಲಿ 19 ಪ್ರಾಥಮಿಕ, 6 ಪ್ರೌಢ ಸೇರಿ ಒಟ್ಟು 25 ಶಾಲೆ, ಮಂಗಳೂರು ಉತ್ತರದಲ್ಲಿ 16 ಪ್ರಾಥಮಿಕ ಮತ್ತು 3 ಪ್ರೌಢ ಸೇರಿ 19 ಶಾಲೆ, ಬೆಳ್ತಂಗಡಿ ವಲಯದಲ್ಲಿ ಒಟ್ಟು 31 ಶಾಲೆ, ಬಂಟ್ವಾಳದಲ್ಲಿ 68 ಪ್ರಾಥಮಿಕ, 13 ಪ್ರೌಢ ಸೇರಿ 81 ಶಾಲೆ, ಪುತ್ತೂರು ಮತ್ತು ಕಡಬಗಳಲ್ಲಿ 38 ಪ್ರಾಥಮಿಕ ಮತ್ತು 2 ಪ್ರೌಢ ಸೇರಿ 40 ಶಾಲೆ, ಸುಳ್ಯದಲ್ಲಿ 23 ಪ್ರಾಥಮಿಕ ಮತ್ತು 2 ಪ್ರೌಢ ಸೇರಿ 25 ಶಾಲೆಗಳಿಗೆ ಹಾನಿಯಾಗಿದೆ.

  ಉಡುಪಿ ಜಿಲ್ಲೆಯಲ್ಲಿ 5 ವಲಯಗಳಿದ್ದು, 115 ಶಾಲೆಗಳಿಗೆ ಹಾನಿಯಾಗಿದೆ. ವಲಯ ಕ್ಷೇತ್ರ ಶಿಕ್ಷಣಾಧಿಕಾರಿಗಳು ನೀಡಿರುವ ಅಂಕಿ ಅಂಶದ ಪ್ರಕಾರ ಉಡುಪಿ ವಲಯದಲ್ಲಿ 9 ಪ್ರಾಥಮಿಕ, 3 ಪ್ರೌಢ ಸೇರಿ 12 ಶಾಲೆ, ಕುಂದಾಪುರ ಮತ್ತು ಬೈಂದೂರು ವಲಯದ ಅರ್ಧಭಾಗ ಸೇರಿ ಒಟ್ಟು 20 ಶಾಲೆ, ಬ್ರಹ್ಮಾವರದ 7 ಪ್ರಾಥಮಿಕ ಮತ್ತು 1 ಪ್ರೌಢ ಸೇರಿ 8 ಶಾಲೆ, ಕಾರ್ಕಳದಲ್ಲಿ 20 ಪ್ರಾಥಮಿಕ ಮತ್ತು 1 ಪ್ರೌಢ ಸೇರಿ 21 ಶಾಲೆಗಳು, ಬೈಂದೂರು (ಕುಂದಾಪುರ ವಲಯದ ಅರ್ಧಭಾಗ ಸೇರಿ)ನ‌ಲ್ಲಿ ಒಟ್ಟು 51 ಪ್ರಾಥಮಿಕ ಮತ್ತು 3 ಪ್ರೌಢ ಸೇರಿ ಒಟ್ಟು 54 ಶಾಲೆಗಳಿಗೆ ಹಾನಿಯಾಗಿದೆ.

  ಮಳೆಯಿಂದಾಗಿ ದ.ಕ. ಜಿಲ್ಲೆಯಲ್ಲಿ 220ಕ್ಕೂ ಹೆಚ್ಚಿನ ಶಾಲೆಗಳಿಗೆ ಹಾನಿಯುಂಟಾಗಿದೆ. ಆದರೆ ಎಲ್ಲ ಕಡೆ ಎಂದಿನಂತೆ ಪಾಠ್ಯ ಕ್ರಮಗಳು ನಡೆಯುತ್ತಿದೆ. ಸದ್ಯ ಜಿಲ್ಲೆಯಲ್ಲಿ ಅಪಾಯದ ಸ್ಥಿತಿಯಲ್ಲಿ ಯಾವುದೇ ಶಾಲೆಗಳಿಲ್ಲ. ಹಾನಿಯಾದ ಬಗ್ಗೆ ಅಂದಾಜು ಲೆಕ್ಕಾಚಾರ ನಡೆಯುತ್ತಿದೆ. ಎಂದು ದ.ಕ. ಡಿಡಿಪಿಐ ವೈ. ಶಿವರಾಮಯ್ಯ ಹೇಳಿದರು. ದ.ಕ. ಜಿಲ್ಲೆಯಲ್ಲಿ ಹಾನಿಗೊಳಗಾದ ಶಾಲೆಗಳ ಬಗೆಗಿನ ವರದಿಯನ್ನು ಈಗಾಗಲೇ ಡಿಡಿಪಿಐ ನೀಡಿದ್ದಾರೆ. ಈ ವರದಿಯನ್ನು ರಾಜ್ಯ ಸರಕಾರಕ್ಕೆ ನೀಡಲಾಗಿದೆ ಎಂದು ಜಿಲ್ಲಾಧಿಕಾರಿ ಸಸಿಕಾಂತ್‌ ಸೆಂಥಿಲ್‌ ಹೇಳಿದರು.