ಕಾರ್ಕಳ : ಅರ್ಬಿ ಫಾಲ್ಸ್ ನಲ್ಲಿ ಸೆಲ್ಫಿ ತೆಗೆಯಲು ಹೋಗಿ ನೀರುಪಾಲಾದ ಯುವಕ

•   Fri, Aug 16 2019 10:01:53 AM



• ಕಾರ್ಕಳ, ಆ 16 (Daijiworld News/MSP): ನಿಟ್ಟೆ ಗ್ರಾಮದ ಪರಪ್ಪಾಡಿ ಅರ್ಬಿ ಪಾಲ್ಸ್‌ನಲ್ಲಿ  ಸೆಲ್ಫಿ ತೆಗೆಯುವ ಭರದಲ್ಲಿ ಯುವಕ ನೀರು ಪಾಲಾದ ಘಟನೆ ಆ. 16 ರ ಗುರುವಾರ ಸಂಜೆ ನಡೆದಿದೆ.

  

  

  

  
  ಮೃತ ಯುವಕನನ್ನು ಕಾರ್ಕಳ ತಾಲೂಕಿನ ಮಂಜರಪಲ್ಕೆ ಗ್ರಾಮದ ಸುದೇಶ್ ಕುಲಾಲ್ (26) ಎಂದು ಗುರುತಿಸಲಾಗಿದೆ. ಸುದೇಶ್ ತನ್ನ ನಾಲ್ವರು ಸ್ನೇಹಿತರೊಂದಿಗೆ ಗುರುವಾರ ಮಧ್ಯಾಹ್ನ 2.30ರ ವೇಳೆಗೆ ಅರ್ಬಿ ಪಾಲ್ಸ್ ಗೆ ತೆರಳಿದ್ದು ಈ ವೇಳೆ ಅವಘಡ ಸಂಭವಿಸಿದೆ.

  ಅರ್ಬಿ ಫಾಲ್ಸ್ ತೀವ್ರ ಮಳೆಯಿಂದ ರುದ್ರ ರಮಣೀಯ ರೂಪ ತಾಳಿ ಬೋರ್ಗರೆಯುತ್ತಿದೆ. ಆದರೂ ಈ ನಾಲ್ವರು ಯುವಕರು ಹೊಳೆಯ ಸಮೀಪದ ಬಂಡೆಯಲ್ಲಿ ನಿಂತು ಸೆಲ್ಫಿ ತೆಗೆಯುತ್ತಿದ್ದರು. ಈ ಸಂದರ್ಭ ಕಾಲು ಜಾರಿ ಸುದೇಶ್ ಹಾಗೂ ಅವರ ಇನ್ನೊಬ್ಬ ಸ್ನೇಹಿತ ಭರತ್ ಹರಿಯುವ ಹೊಳೆಗೆ ಬಿದ್ದಿದ್ದಾರೆ. ಈ ಸಂದರ್ಭ ಹೇಗೋ ಹರಸಾಹಸ ಪಟ್ಟು ಭರತ್ ಈಜಿಕೊಂಡು ದಡ ಸೇರಿದರೆ, ಸುದೇಶ್ ನೀರಿನಲ್ಲಿ ಕೊಚ್ಚಿಕೊಂಡು ಹೋಗಿದ್ದಾರೆ,

  ಸ್ಥಳಕ್ಕೆ ಅಗ್ನಿಶಾಮಕ ದಳ , ಮುಳುಗುತಜ್ಞರು ಆಗಮಿಸಿ ಹುಡುಕಾಡಿದರೂ ಇದುವರೆಗೆ ಸುದೇಶ್‌ನ ಬಗ್ಗೆ ಬಗ್ಗೆ ಮಾಹಿತಿ ಲಭಿಸಿಲ್ಲ. ನೀರಿನ ಹರಿವು ಹೆಚ್ಚಾಗಿರುವುದರಿಂದ ಕಾರ್ಯಾಚರಣೆಗೆ ಅಡ್ಡಿಯಾಗಿದೆ. ಘಟನಾ ಸ್ಥಳಕ್ಕೆ ತಹಶೀಲ್ದಾರ್ ಪುರಂದರ ಹೆಗ್ಡೆ, ಕಾರ್ಕಳ ತಾಲೂಕು ಪಂಚಾಯತ್ ಕಾರ್ಯನಿರ್ವಹಣಾಧಿಕಾರಿ ಮೇಜರ್ ಡಾ.ಹರ್ಷ, ಕಾರ್ಕಳ ಗ್ರಾಮಾಂತರ ಠಾಣಾಧಿಕಾರಿ ನಜೀರ್ ಹುಸೈನ್ ಭೇಟಿ ನೀಡಿದ್ದಾರೆ. ಈ ಬಗ್ಗೆ ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಕೇಸುದಾಖಲಾಗಿದೆ.