ಇಂದ್ರಾಳಿ: ದ್ವಿಚಕ್ರ ವಾಹನ ಮಳಿಗೆಯಲ್ಲಿ ಅಗ್ನಿ ಅವಘಡ - 80 ದ್ವಿಚಕ್ರ ವಾಹನ ಸುಟ್ಟು ಕರಕಲು

•   Mon, Jun 24 2019 12:45:20 PM



• ಉಡುಪಿ, ಜೂ 24 (Daijiworld News/MSP): ಇಂದ್ರಾಳಿ ಪೆಟ್ರೋಲ್ ಬಂಕ್ ಪಕ್ಕದ ಕಟ್ಟಡಕ್ಕೆ ಆಕಸ್ಮಿಕವಾಗಿ ಬೆಂಕಿ ಅವಘಡ ಸಂಭವಿಸಿ, ಲಕ್ಷಾಂತರ ರೂ. ನಷ್ಟ ಸಂಭವಿಸಿರುವ ಘಟನೆ ಭಾನುವಾರ ರಾತ್ರಿ 9.30 ರ ಸುಮಾರಿಗೆ ನಡೆದಿದೆ.

  

  ಜಯರಾಮ್ ಎಂಬವರಿಗೆ ಸೇರಿದ ಎಲ್ ಎಮ್ ಎಲ್ ವೆಸ್ಪಾ ದ್ವಿಚಕ್ರವಾಹನದ ಶೋ ರೂಂರಲ್ಲಿ ಬೆಂಕಿ ಅವಘಡ ಸಂಭವಿಸಿದೆ. ಘಟನೆಯಿಂದಾಗಿ ಬೈಕ್ ಶೋರೂಮ್ ಕೆಳ ಮಹಡಿಯಲ್ಲಿದ್ದ ಸುಮಾರು 80 ದ್ವಿಚಕ್ರ ಸಂಪೂರ್ಣ ಸುಟ್ಟು ಕರಕಲಾಗಿದ್ದು, ಅಪಾರ ನಷ್ಟ ಸಂಭವಿಸಿದೆ.

  ಮೂರು ಮಹಡಿಗಳ ಕಟ್ಟಡ ಇದಾಗಿದ್ದು ಇದೇ ಕಟ್ಟಡದಲ್ಲಿ ಜೈದೇವ್ ಮೋಟಾರ್ ಝೋನ್, ವಿನ್ಯಾಸ್ ಅಕಾಡೆಮಿ, ಜಿಮ್ ಕ್ಲಾಸ್ ಹಾಗೂ ಒಂದು ಕ್ಲಿನಿಕ್‌ ಇದೆ. ಇದಲ್ಲದೆ ಅವಘಡ ಸಂಭವಿಸಿದ ಅಣತಿ ದೂರದಲ್ಲೇ ಪೆಟ್ರೋಲ್ ಬಂಕ್‌ ಇದ್ದು, ಅಗತ್ಯ ಕ್ರಮ ಕೈಗೊಂಡ ಹಿನ್ನೆಲೆ ಯಾವುದೇ ಹಾನಿಯಾಗಿಲ್ಲ. ಉಡುಪಿ ಅಗ್ನಿಶಾಮಕ ದಳದ ಮೂರು ವಾಹನಗಳು ಬೆಂಕಿ ನಂದಿಸುವ ಕಾರ್ಯಾಚರಣೆಯನ್ನು ತಡರಾತ್ರಿಯವರೆಗೂ ಮುಂದುವರಿಸಿದ್ದರು. ಬೆಂಕಿ ಹತೋಟಿ ಬರುವವರೆಗೆ ಹೆಚ್ಚಿನ ಅನಾಹುತ ಸಂಭವಿಸದಂತೆ ವಿದ್ಯುತ್ ವ್ಯತ್ಯಯ ಮಾಡಲಾಗಿತ್ತು.

  ಈ ಆಕಸ್ಮಿಕ ಬೆಂಕಿ ಅವಘಡಕ್ಕೆ ಕಾರಣ ತಿಳಿದುಬಂದಿಲ್ಲ. ಬೆಂಕಿಯಿಂದಾಗಿ ದಟ್ಟ ಹೊಗೆ ಪರಿಸರದಲ್ಲಿ ಆವರಿಸಿತ್ತು. ಯಾವುದೇ ಪ್ರಾಣ ಅಪಾಯವಾಗಿರುವ ಬಗ್ಗೆ ವರದಿಯಾಗಿಲ್ಲ.