ಬ್ರಹ್ಮಾವರ: ಕೊಡ ಮೇಲಕ್ಕೆತ್ತಲು ಬಾವಿಗಿಳಿದ ವ್ಯಕ್ತಿ ಉಸಿರುಗಟ್ಟಿ ಮೃತ್ಯು

•   Wed, Jun 19 2019 10:31:36 PM



• ಬ್ರಹ್ಮಾವರ, ಜೂ 19 (Daijiworld News/SM): ಬಾವಿಗೆ ಬಿದ್ದ ಕೊಡ ಮೇಲೆತ್ತಲೆಂದು ಇಳಿದ ವ್ಯಕ್ತಿಯೊಬ್ಬ ನೀರಿನಲ್ಲಿ ಮುಳುಗಿ ಮೃತಪಟ್ಟಿರುವ ಘಟನೆ ಬ್ರಹ್ಮಾವರ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ. ಕೊಪ್ಪಳ ಜಿಲ್ಲೆಯ ಕುಷ್ಟಗಿ ತಾಲೂಕಿನ ಮಂಜುನಾಥ ಗುರಿಕಾರ್(26) ಎಂಬವರು ಮೃತ ವ್ಯಕ್ತಿ.

  

  ಸಾಂದರ್ಭಿಕ ಚಿತ್ರ

  ಮಂಜುನಾಥ್ ಇಲ್ಲಿನ ಅಬ್ದುಲ್ ಖಾದರ್ ಎಂಬವರ ಮನೆಯಲ್ಲಿ ಬಾವಿಗೆ ಬಿದ್ದ ನೀರಿನ ಕೊಡವನ್ನು ಮೇಲಕ್ಕೆತ್ತಲೆಂದು ರಾಮನಾಯ್ಕ್ ಎಂಬವರ ಸೂಚನೆ ಮೇರೆಗೆ ಬಾವಿಗೆ ಇಳಿದಿದ್ದಾರೆ. ಆದರೆ ಆಳವಿದ್ದ ಬಾವಿಯಲ್ಲಿ ಕೆಳಗಡೆ ತಲುಪುತ್ತಿದ್ದಂತೆ ಮಂಜುನಾಥ್ ಗೆ ಉಸಿರುಗಟ್ಟಿದೆ. ಆದರೆ, ಅಲ್ಲಿಂದ ಮೇಲಕ್ಕೆ ಬರಲು ಯತ್ನಿಸಿದರೂ ಯಾವುದೇ ಪ್ರಯೋಜನವಾಗಿರಲಿಲ್ಲ. ಬಳಿಕ ಮಂಜುನಾಥ್ ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ ಎಂದು ತಿಳಿದು ಬಂದಿದೆ.

  ಬ್ರಹ್ಮಾವರ ಠಾಣೆಗೆ ದೂರು:
  ಇನ್ನು ಮಂಜುನಾಥ್ ಮೃತ ಪಟ್ಟ ಸುದ್ದಿ ತಿಳಿದ ಬಳಿಕ ಬ್ರಹ್ಮಾವರಕ್ಕೆ ಬಂದ ಸಹೋದರ ಶಿವಾನಂದ ಅವರು ಬಾವಿಯ ಮಾಲಿಕ ಅಬ್ದುಲ್ ಖಾದರ್ ಯಾನೆ ಬಾಬ ಸಾಹೇಬ್ ಹಾಗೂ ರಾಮನಾಯ್ಕ್ ರವರ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಾರೆ. ಬಾವಿಗೆ ಇಳಿಸುವ ಸಂದರ್ಭದಲ್ಲಿ ಮಾಲಿಕರು ಯಾವುದೇ ಸುರಕ್ಷಿತ ಕ್ರಮ ಕೈಗೊಳ್ಳದ ಕಾರಣ ಅವಘಡ ಸಂಭವಿಸಿದ್ದು, ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.

  ಪ್ರಕರಣ ದಾಖಲಿಸಿಕೊಂಡಿರುವ ಬ್ರಹ್ಮಾವರ ಠಾಣಾ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.