ಕುಂದಾಪುರ: ಹಾಡಹಗಲೇ ಹಂಚು ತೆಗೆದು ಕಳ್ಳತನ - ಲಕ್ಷಾಂತರ ಮೌಲ್ಯದ ಚಿನ್ನ ,ನಗದು ಕಳವು

•   Tue, Jun 18 2019 09:35:38 AM



• ಕುಂದಾಪುರ, ಜೂ 18 (Daijiworld News/MSP): ಯಾರೂ ಇಲ್ಲದ ವೇಳೆ ಹಾಡಹಗಲೇ ಮನೆಯ ಹಂಚು ತೆಗೆದು ಒಳ ನುಗ್ಗಿದ ಕಳ್ಳರು 1.20 ಲಕ್ಷ ರೂ. ನಗದು ಹಾಗೂ 3 ಪವನ್ ಚಿನ್ನ ಕಳವುಗೈದ ಘಟನೆ ಬಸ್ರೂರಿನಲ್ಲಿ ಜೂ. 18 ರ ಸೋಮವಾರ ಬೆಳಗ್ಗಿನಿಂದ ಮಧ್ಯಾಹ್ನದೊಳಗಿನ ಮಧ್ಯದ ಅವಧಿಯಲ್ಲಿ ಸಂಭವಿಸಿದೆ.

  

  

  

  

  

  

  ಬಸ್ರೂರಿನ ಕೊಲ್ಕೆರೆ ನಿವಾಸಿ ಮಹಾಲಿಂಗ ಎನ್ನುವವರ ಮನೆಗೆ ಕಳ್ಳರು ನುಗ್ಗಿ ಲಕ್ಷಾಂತರ ರೂ. ನಗದು ಹಾಗೂ ಚಿನ್ನ ಕಳವು ಮಾಡಿರುವುದಾಗಿದೆ. ಮಹಾಲಿಂಗ ಅವರು ರಿಕ್ಷಾ ಚಾಲಕರಾಗಿದ್ದು, ಬಾಡಿಗೆ ಮಾಡುತ್ತಿದ್ದರು, ಪತ್ನಿ ಅಂಗನವಾಡಿ ಶಿಕ್ಷಕಿಯಾಗಿದ್ದು, ಪುತ್ರಿಯೂ ಶಿಕ್ಷಕಿಯಾಗಿದ್ದು, ಅವರೆಲ್ಲ ಕೆಲಸಕ್ಕೆ ಹೋಗಿದ್ದಾಗ ಈ ಕೃತ್ಯ ಸಂಭವಿಸಿದೆ.

  ಮನೆಯಲ್ಲಿ ಯಾರೂ ಇಲ್ಲದ ವೇಳೆ ಈ ಘಟನೆ ನಡೆದಿರುವುದಿಂದ ಮೇಲ್ನೋಟಕ್ಕೆ ಇದು ತಿಳಿದಿರುವವರ ಕೃತ್ಯವಾಗಿರಬಹುದು ಎನ್ನುವ ಶಂಕೆ ವ್ಯಕ್ತವಾಗಿದೆ. ಘಟನಾ ಸ್ಥಳಕ್ಕೆ ಕುಂದಾಪುರ ಸರ್ಕಲ್ ಇನ್ಸ್‌ಪೆಕ್ಟರ್ ಮಂಜಪ್ಪ, ಕಂಡ್ಲೂರು ಎಸ್‌ಐ ಶ್ರೀಧರ್ ನಾಯಕ್ ಹಾಗೂ ಪೊಲೀಸ್ ಸಿಬಂದಿ, ಶ್ವಾನದಳ, ಬೆರಳಚ್ಚು ತಜ್ಞರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಕಳ್ಳರ ಕುರಿತಂತೆ ಈವರೆಗೆ ಯಾವುದೇ ಸುಳಿವು ಲಭ್ಯವಾಗಿಲ್ಲ.

  ಕುಂದಾಪುರ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.