ಬ್ರಹ್ಮಾವರ: ಉಪ್ಪು ನೀರಿನ ಪ್ರವಾಹದಿಂದ ಗ್ರಾಮಗಳಲ್ಲಿ ಮನೆಗಳು, ಕೃಷಿ ಭೂಮಿ ನಾಶ

•   Tue, Mar 04 2025 07:09:45 PM



• ಬ್ರಹ್ಮಾವರ, ,ಮಾ.04(DaijiworldNews/AK): ಉಪ್ಪು ನೀರಿನಿಂದ ಉಂಟಾದ ದಿಡೀರ್‌ ಕೃತಕ ಪ್ರವಾಹವು ಸೋಮವಾರ ಬೆಳಿಗ್ಗೆ ಸಾಲಿಗ್ರಾಮ ಪಟ್ಟಣ ಪಂಚಾಯತ್ ವ್ಯಾಪ್ತಿಯ ಯಕ್ಷಿಮಠದಲ್ಲಿ ಹಾಗೂ ಪಾಂಡೇಶ್ವರ ಗ್ರಾಮ ಪಂಚಾಯತ್ ಮತ್ತು ಕೋಡಿ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಸುಲ್ಕುಡು ಪ್ರದೇಶದಲ್ಲಿ ಅಪಾರ ಹಾನಿಯನ್ನುಂಟುಮಾಡಿತು. ಹಲವಾರು ಮನೆಗಳು ಮತ್ತು ವಿಶಾಲವಾದ ಕೃಷಿ ಭೂಮಿ ಮುಳುಗಡೆಯಾಗಿದ್ದು, ಸ್ಥಳೀಯ ಕೃಷಿ ಚಟುವಟಿಕೆಗಳಿಗೆ ತೀವ್ರ ಹಾನಿಯಾಗಿದೆ.

  ಮುಖ್ಯವಾಗಿ ಉದ್ದು, ಹೆಸರುಕಾಳು ಮತ್ತು ವಿವಿಧ ತರಕಾರಿಗಳನ್ನು ಬೆಳೆಯುವ ನಲವತ್ತಕ್ಕೂ ಹೆಚ್ಚು ಕೃಷಿ ಭೂಮಿಗಳು ವ್ಯಾಪಕ ಹಾನಿಯನ್ನು ಅನುಭವಿಸಿವೆ. ಉಪ್ಪು ನೀರಿನ ಕೃತಕ ಪ್ರವಾಹವು ತಮ್ಮ ಭೂಮಿಯನ್ನು ಬಂಜರು ಮಾಡುವ ಆತಂಕ ಇದ್ದು, ಜೀವನೋಪಾಯಕ್ಕೆ ಅಪಾಯವನ್ನುಂಟು ಮಾಡುವುದರಿಂದ ರೈತರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ವಿಶೇಷವಾಗಿ ತರಕಾರಿ ರೈತರು ಉಪ್ಪು ನೀರಿನ ಒಳಹರಿವಿನಿಂದ ತಮ್ಮ ಬೆಳೆಗಳನ್ನು ಸಂಪೂರ್ಣವಾಗಿ ಕಳೆದುಕೊಳ್ಳುವ ಭಯದಲ್ಲಿದ್ದಾರೆ.

  ಬ್ರಹ್ಮಾವರ ತಾಲ್ಲೂಕಿನ ಬಾರ್ಕೂರು-ಬೆಣ್ಣೆಕುದ್ರುವಿನಲ್ಲಿ ಸೀತಾ ನದಿಗೆ ಅಡ್ಡಲಾಗಿ ಕಿಂಡಿ ಅಣೆಕಟ್ಟು ನಿರ್ಮಾಣ ಪೂರ್ಣಗೊಳ್ಳುವ ಮೊದಲೇ, ಸುಲ್ಕುಡು ಪ್ರದೇಶದ ತೆಂಗಿನ ತೋಟಗಳಿಗೆ ಉಪ್ಪು ನೀರು ನುಗ್ಗಿ ಸುಮಾರು 20-25 ಎಕರೆ ತೆಂಗಿನ ಬೆಳೆಗಳಿಗೆ ಹಾನಿಯಾಗಿತ್ತು. ಪ್ರಸ್ತುತ ಪ್ರವಾಹವು ಪರಿಸ್ಥಿತಿಯನ್ನು ಉಲ್ಬಣಗೊಳಿಸಿದ್ದು, ಕೃಷಿ ಭೂಮಿಗೆ ದೀರ್ಘಕಾಲೀನ ಹಾನಿಯಾಗುವ ಭೀತಿಯನ್ನು ಹೆಚ್ಚಿಸಿದೆ.

  ಕಿಂಡಿ ಅಣೆಕಟ್ಟು ಪೂರ್ಣಗೊಂಡ ನಂತರ ಸಂಭವಿಸಬಹುದಾದ ವಿಪತ್ತು ಇನ್ನಷ್ಟು ಹದಗೆಡುವ ಬಗ್ಗೆ ಸ್ಥಳೀಯ ರೈತರು ಚಿಂತಿತರಾಗಿದ್ದಾರೆ. ಹೆಚ್ಚಿನ ಹಾನಿಯನ್ನು ತಡೆಗಟ್ಟಲು ಮತ್ತು ಪೀಡಿತ ಕುಟುಂಬಗಳಿಗೆ ಪರಿಹಾರವನ್ನು ಒದಗಿಸಲು ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಳ್ಳಬೇಕೆಂದು ಹಲವರು ಒತ್ತಾಯಿಸಿದ್ದಾರೆ.