ಮಂಗಳೂರು: ಐಎಎಸ್‌ ಹುದ್ದೆ ತ್ಯಜಿಸಿದ ಕುರಿತು ಕೊನೆಗೂ ರಹಸ್ಯ ಬಿಚ್ಚಿಟ್ಟ ಸಸಿಕಾಂತ್ ಸೆಂಥಿಲ್!

•   Tue, Sep 03 2024 09:22:54 PM



• ಮಂಗಳೂರು, ಸೆ.03 (DaijiworldNews/AK):ಕೇಂದ್ರ ಸರ್ಕಾರದ ಆರ್ಟಿಕಲ್ 370 ರದ್ದತಿ ನಡೆ ಖಂಡಿಸಿ ರಾಜೀನಾಮೆ ನೀಡಿದೆ ಎಂದು ಮಾಜಿ ಐಎಎಸ್ ಅಧಿಕಾರಿ ಹಾಗೂ ಹಾಲಿ ಸಂಸದ ಸಸಿಕಾಂತ್ ಸೆಂಥಿಲ್ ಐಎಎಸ್‌ ಹುದ್ದೆ ತ್ಯಜಿಸಿದ ಕುರಿತು ಸ್ಪಷ್ಟ ಕಾರಣ ಬಿಚ್ಚಿಟ್ಟರು.

  
  2019ರ ಸೆಪ್ಟೆಂಬರ್ 6 ರಂದು ದ.ಕ ಜಿಲ್ಲಾಧಿಕಾರಿಯಾಗಿದ್ದಾಗಲೇ ಹುದ್ದೆಗೆ ಸೆಂಥಿಲ್‌ ರಾಜೀನಾಮೆ ನೀಡಿದ್ದರು. 2009ರ ಬ್ಯಾಚ್ ನ ಐಎಎಸ್ ಅಧಿಕಾರಿಯಾಗಿದ್ದ ಸಸಿಕಾಂತ್ ಸೆಂಥಿಲ್ 2017ರ ಅಕ್ಟೋಬರ್ 10ರಿಂದ ದ‌.ಕ ಜಿಲ್ಲಾಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದರು.ಅವರು ಎಂಪಿಯಾದ ಬಳಿಕ ಇದೇ ಮೊದಲ ಬಾರಿಗೆ ಮಂಗಳೂರಿಗೆ ಭೇಟಿ ನೀಡಿದ್ದಾರೆ. ಪ್ರಸ್ತುತ ಸೆಂಥಿಲ್‌ ತಮಿಳುನಾಡಿನ ತಿರುವಳ್ಳೂರ್ ಕ್ಷೇತ್ರದ ಸಂಸದರಾಗಿದ್ದಾರೆ.

  ಇಂದು ಮಂಗಳೂರಿನಲ್ಲಿ ಕಾಂಗ್ರೆಸ್ ಕಾರ್ಯಕರ್ತರ ಜೊತೆ ಸೆಂಥಿಲ್ ಸಂವಾದ ಕಾರ್ಯಕ್ರಮ ಉದ್ದೇಶಿಸಿ ಮಾತನಾಡಿ, ಈ ವೇಳೆ ಐಎಎಸ್ ಹುದ್ದೆಗೆ ನೀಡಿದ ರಾಜೀನಾಮೆ ಕುರಿತು ರಹಸ್ಯ ಬಿಚ್ಚಿಟ್ಟರು. ಇದೇ ವೇಳೆ ಅವರು, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಈ ವೇದಿಕೆಯಲ್ಲಿ ಬಂದು ಮಾತನಾಡ್ತೀನಿ ಅಂತ ಊಹಿಸಿರಲಿಲ್ಲ ಎಂದರು.

  ಎರಡು ವರ್ಷ ಈ ಪಕ್ಷ ಸೇರಿದ ಮೇಲೆ ಸಂಘಟನೆ ಮೇಲೆ ಪ್ರೀತಿ ಆಗಿದೆ. ನಾನು ಇಲ್ಲಿ ರಾಜೀನಾಮೆ ಕೊಟ್ಟು ಕಾರ್ಯದರ್ಶಿಗೆ ಕಳುಹಿಸಿ ಹೋಗಿ ಬಿಟ್ಟೆ. ರಾಜೀನಾಮೆ ನನ್ನ ಸಿಬ್ಬಂದಿ ಹಾಗೂ ಹಲವರು ಬೇರೆ ಬೇರೆ ಕಾರಣ ಕೊಟ್ಟರು. ಆದರೆ ಈವರೆಗೆ ನಾನು ರಾಜೀನಾಮೆಗೆ ಸ್ಪಷ್ಟ ಕಾರಣ ಕೊಟ್ಟಿಲ್ಲ. ಆದರೆ ಈ ವೇದಿಕೆಯಲ್ಲಿ ಅದಕ್ಕೆ ಸ್ಪಷ್ಟ ಕಾರಣ ಕೊಡಬೇಕು ಎಂದಿದ್ದೇನೆ.

  ನನ್ನದು ದಲಿತ ಕುಟುಂಬ, ನಾವು ತುಂಬಾ ಬಡವರು. ವ್ಯವಸ್ಥೆಯ ಎಲ್ಲಾ ಕಷ್ಟವನ್ನು ನನ್ನ ತಂದೆ ಅನುಭವಿಸಿದರು.ಐಎಎಸ್ ಆದ ಬಳಿಕವೂ ನನಗೆ ಜನರ ಬಗ್ಗೆಯೇ ಹೆಚ್ಚು ಚಿಂತೆ.ಡಿಸಿಯಾಗಿದ್ದಾಗ ನಾನು ರಾತ್ರಿ ಮಲಗಿ ಮಕ್ಕಳ ಬಗ್ಗೆ ಯೋಚಿಸ್ತಾ ಇದ್ದೆ.ಆಗೆಲ್ಲಾ ಮಳೆಗೆ ಡಿಡಿಪಿಐಗೆ ಕರೆ ಮಾಡಿ ರಜೆ ಕೊಡಿ ಅಂತಿದ್ದೆ. ಒಮ್ಮೆ ನಿರಂತರವಾಗಿ 17 ದಿನ ದ‌.ಕ ಜಿಲ್ಲೆಯ ಶಾಲೆಗಳಿಗೆ ರಜೆ ಕೊಟ್ಡಿದ್ದೆ.ನಾನು ಜನರ ಎಮೋಷನ್ಸ್ ವಿಚಾರದಲ್ಲಿ ತುಂಬಾ ಭಾಗಿಯಾಗ್ತಿದ್ದೆ.ಆದರೆ‌ ಜನರನ್ನ ಜನರ ಮಧ್ಯೆ ಎತ್ತಿ ಕಟ್ಟುವ ರಾಜಕೀಯ ನನಗೆ ನೋಡಲು ಆಗಿಲ್ಲ ಎಂದು ಹಳೆಯ ನೆನಪುಗಳನ್ನು ಈ ವೇಳೆ ಮೆಲುಕು ಹಾಕಿದರು.

  
  2002ರ ಗೋದ್ರಾ ಗಲಾಟೆಯನ್ನು ನಾನು ಸೂಕ್ಷ್ಮವಾಗಿ ವೀಕ್ಷಿಸ್ತಾ ಇದ್ದೆ.ಮಂಗಳೂರು ಮಾತ್ರವಲ್ಲದೇ ಇಡೀ ದೇಶದಲ್ಲಿ ಗಮನಹರಿಸಿದ್ದೆ.2014ರಲ್ಲಿ ಗೋದ್ರಾ ಗಲಭೆ ಮಾಡಿದವರೇ ಭಾರತದ ಪ್ರಧಾನಿ ಆದರು. ಆಗ ನಾನು ರಾಯಚೂರಿನಲ್ಲಿ ಡಿಸಿ ಆಗಿದ್ದೆ, 2019ರ ಚುನಾವಣೆಯಲ್ಲಿ ನಾನು ದ.ಕ ಡಿಸಿಯಾಗಿದ್ದೆ.ಆಗ ಲೋಕಸಭಾ ಚುನಾವಣೆ ನಡೆದು ಮತ್ತೆ ಬಿಜೆಪಿಗೆ ಓಟ್ ಹೆಚ್ವು ಬಂತು.

  ಆದರೆ ನಾನು ಡಿಸಿಯಾದಾಗ ಯಾವುದೇ ಬೇದಭಾವ ಮಾಡಿಲ್ಲ. ಬಳಿಕ ಅವರು ಬಂದ ತಕ್ಷಣ ಆರ್ಟಿಕಲ್ 370 ತೆಗೆದು ಹಾಕಿದರು. ಅದರ ಜೊತೆಗೆ ಇಡೀ ಕಾಶ್ಮೀರದಲ್ಲಿ ಆರ್ಮಿ ಹಾಕಿ ಗೃಹಬಂಧನ ಮಾಡಿದರು.ಆಗ ನಾನು‌ ಅಂದುಕೊಂಡೆ ಇದು ಇವತ್ತು ಕಾಶ್ಮೀರಗೆ ಆಗೋದಾದ್ರೆ ನಾಳೆ ಮಂಗಳೂರಿಗೂ ಆಗಬಹುದು ಅಂದುಕೊಂಡೆ

  ಇದೇ ಹೊತ್ತಲ್ಲಿ ನನ್ನ ಪತ್ನಿ ಮಂಗಳೂರಿಗೆ ಬಂದಳು.ಇದೇ ಹೊತ್ತಲ್ಲಿ ನಾವು ಮಂಗಳೂರಲ್ಲಿ ಟಿವಿ ನೋಡ್ತಾ ಇದ್ದೆವು.ಆಗ ಕಾಶ್ಮೀರದ ಮಿಲಿಟರಿ ದೃಶ್ಯ ಟಿವಿಯಲ್ಲಿ ನೋಡ್ತಾ ಇದ್ದೆವು.ಆಗ ಪತ್ನಿ ನನಗೆ ಕಾಲೇಜು ದಿನದ ಸೆಂಥಿಲ್ ಹೇಗಿದ್ದ ಅಂದಳು. ನೀನು ಕಾಲೇಜ್ನಲ್ಲಿ ರೆಬಲ್ ಆಗಿದ್ದೆ, ಈಗ ಡಿಸಿಯಾಗಿ ಬಂಗ್ಲೆಯಲ್ಲಿ ಜಾಲಿಯಾಗಿದ್ದೀಯಾ ಅಂದಳು ಪತ್ನಿ.ಮಾತು ನನಗೆ ಇಡೀ ರಾತ್ರಿ ತುಂಬಾ ನೋವು ಕೊಟ್ಟಿತು.ಮರು ದಿನ ಬೆಳಿಗ್ಗೆ ಎದ್ದು ಪತ್ನಿ ಬಳಿ ರಾಜೀನಾಮೆ ಕೊಡ್ತೇನೆ ಎಂದು ಹೇಳಿದರು.

  ಮೂರು ದಿನ ಕಳೆದು ನಾನು ರಾಜೀನಾಮೆ ಸಲ್ಲಿಸಿದೆ.ಬಳಿಕ ನೇರವಾಗಿ ನನ್ನ ಹುಟ್ಟೂರಿಗೆ ಬಂದು ಬಿಟ್ಟೆ. ಆಗ ಎನ್‌ಆರ್ ಸಿ ತಂದಾಗ ಮತ್ತಷ್ಟು ಆಕ್ರೋಶ ಹೆಚ್ಚಾಯ್ತು. ಕೊನೆಗೆ ನನಗೆ ಕಾಂಗ್ರೆಸ್ ಪಕ್ಷವೇ ಸೂಕ್ತ ಅಂತ ಅನಿಸಿ ಬಿಡ್ತು.ಆಗ ನಾನೇ ಸ್ವತಃ ಕಾಂಗ್ರೆಸ್ ಗೆ ಹೋಗಿ ನಾನು ಪಕ್ಷ ಸೇರುತ್ತೇನೆಯೆಂದೆ.ಅವರು ನನ್ನ ಕರೆದಿಲ್ಲ. ನಾನೇ ಹೋಗಿ ಕಾಂಗ್ರೆಸ್ ಸೇರಿದ್ದು ಎಂದು ಸ್ಪಷ್ಟನೆ ನೀಡಿದರು.