ಉಡುಪಿ: ಕಂಚಿನಡ್ಕ ಟೋಲ್ ಗೇಟ್‌ ವಿರುದ್ಧ ಲಾರಿ ಟೆಂಪೋ ಮಾಲೀಕರ ಸಂಘ ಪ್ರತಿಭಟನೆಗೆ ಬೆಂಬಲ

•   Wed, Aug 21 2024 05:41:25 PM



• ಉಡುಪಿ, ಆ.21(DaijiworldNews/AK):ಸುಹಾಸ್ ಹೆಗ್ಡೆ ನೇತೃತ್ವದಲ್ಲಿ ಕಂಚಿನಡ್ಕ ಟೋಲ್ ಗೇಟ್‌  ವಿರುದ್ಧ ಆಗಸ್ಟ್ 24ರಂದು ನಡೆಯಲಿರುವ ಪ್ರತಿಭಟನೆಗೆ ಲಾರಿ ಟೆಂಪೋ ಮಾಲೀಕರ ಸಂಘ, ಬೆಂಬಲ ನೀಡಿದೆ.

  ಲಾರಿ ಟೆಂಪೋ ಮಾಲಕರ ಸಂಘ ಉಡುಪಿಯ ಸಂಘಟಕ ರಾಘವೇಂದ್ರ ಶೆಟ್ಟಿ ಅವರು ಆ.21ರಂದು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಪಡುಬಿದ್ರಿಯ ಕಂಚಿನಡ್ಕದಲ್ಲಿ ಟೋಲ್ ನಿರ್ಮಾಣಕ್ಕೆ ವಿರೋಧ ವ್ಯಕ್ತಪಡಿಸಿ, ಈ ಟೋಲ್‌ಗಳಿಗಾಗಿ ಜನಸಾಮಾನ್ಯರು ದಿನನಿತ್ಯ ಪರದಾಡುತ್ತಿದ್ದಾರೆ. ಟೋಲ್ ಪ್ಲಾಜಾದಲ್ಲಿ ನಿಯಮಾನುಸಾರ ಸರಿಯಾದ ಸರ್ವೀಸ್ ರಸ್ತೆಗಳಿಲ್ಲದೇ ಸ್ಥಳೀಯ ಜನರಿಂದ ಬಲವಂತವಾಗಿ ಹಣ ವಸೂಲಿ ಮಾಡುತ್ತಿದ್ದಾರೆ. ರಾಜ್ಯ ಹೆದ್ದಾರಿ ಕಂಚಿನಡ್ಕದಲ್ಲಿ ಮತ್ತೊಂದು ಅವೈಜ್ಞಾನಿಕ ಮತ್ತು ಅಸಂಬದ್ಧ ಟೋಲ್ ನಿರ್ಮಿಸಲು ಮುಂದಾಗಿರುವ ಸರಕಾರಗಳ ಕ್ರಮವನ್ನು ನಾವು ವಿರೋಧಿಸುತ್ತೇವೆ ಎಂದರು.

  ಟೋಲ್ ಗೇಟ್ ಕುರಿತು ಮಾತನಾಡಿದ ರಾಘವೇಂದ್ರ, ಈ ಹೊಸ ಟೋಲ್ ಪ್ಲಾಜಾ ಈಗಾಗಲೇ ಪಡುಬಿದ್ರಿಯಲ್ಲಿರುವ ಟೋಲ್ ಗೇಟ್‌ನಿಂದ ಕೇವಲ ಆರು ಕಿಲೋಮೀಟರ್ ದೂರದಲ್ಲಿದೆ. ಲೂಟಿ ಮಾಡಲು ಅವರ ಬಳಿ ಹಣವಿಲ್ಲ, ಹೀಗಾಗಿ ಹಣ ಮಾಡಲು ಟೋಲ್ ಗೇಟ್ ನಿರ್ಮಿಸುತ್ತಿದ್ದಾರೆ. ಟೋಲ್ ಮತ್ತು ತೆರಿಗೆ ಹೆಸರಿನಲ್ಲಿ ಬಡವರ ರಕ್ತ ಹೀರುತ್ತಿದ್ದಾರೆ. ಸರ್ಕಾರಕ್ಕೆ ಅಗತ್ಯವಿದ್ದರೆ ಪ್ರತಿ ಮೂರು ತಿಂಗಳಿಗೊಮ್ಮೆ ರಕ್ತವನ್ನು ನೀಡಲು ನಾವು ಸಿದ್ಧರಿದ್ದೇವೆ ಆದರೆ ಟೋಲ್ ಪಾವತಿಸುವುದಿಲ್ಲ ಎಂದರು.

  ಟೋಲ್ ಗೇಟ್ ಅಳವಡಿಸಲು ಬಿಡುವುದಿಲ್ಲ, ಸುಹಾಸ್ ಹೆಗ್ಡೆ ನೇತೃತ್ವದಲ್ಲಿ ನಡೆಯಲಿರುವ ಬೃಹತ್ ಪ್ರತಿಭಟನೆಗೆ ಈ ಮೂಲಕ ಸಂಪೂರ್ಣ ಬೆಂಬಲ ನೀಡುತ್ತಿದ್ದೇವೆ ಎಂದು ರಾಘವೇಂದ್ರ ಶೆಟ್ಟಿ ಹೇಳಿದರು.

  ಪತ್ರಿಕಾಗೋಷ್ಠಿಯಲ್ಲಿ ಉಡುಪಿ ತಾಲೂಕು ಲಾರಿ ಟೆಂಪೋ ಮಾಲೀಕರ ಸಂಘದ ಅಧ್ಯಕ್ಷ ರಮೇಶ್ ಶೆಟ್ಟಿ, ಕುಂದಾಪುರದ ಸತೀಶ್ ಪೂಜಾರಿ, ಬ್ರಹ್ಮಾವರದ ವಿಜಯ್ ಕುಮಾರ್, ಉಡುಪಿಯ ಮನೋಹರ್ ಕುಂದರ್ ಮತ್ತಿತರರು ಉಪಸ್ಥಿತರಿದ್ದರು.