ಮಂಗಳೂರು: ಬಾಗಿಲು ಮುರಿದು ಮನೆಯೊಳಗೆ ನುಗ್ಗಿ ಚಿನ್ನಾಭರಣ ಕಳವು

•   Fri, May 24 2019 06:38:43 PM



• ಮಂಗಳೂರು, ಮೇ24(Daijiworld News/SS): ನಗರದ ಹೊರವಲಯದ ಹೊಸಬೆಟ್ಟು ಗ್ರಾಮದ ಗ್ರೀನ್‌ಪಿಚ್‌ ಲೇಔಟ್‌ನಲ್ಲಿರುವ ಮನೆಯೊಂದಕ್ಕೆ ನುಗ್ಗಿದ ಕಳ್ಳರು 1.50 ಲಕ್ಷ ರೂ. ಮೌಲ್ಯದ ಸೊತ್ತು ಕಳವು ಮಾಡಿದ್ದಾರೆ ಎಂದು ತಿಳಿದುಬಂದಿದೆ.

  

  ಕಳೆದ ಏ.26ರಂದು ಮನೆಯವರು ಬೆಂಗಳೂರಿಗೆ ಹೋಗಿದ್ದು, ಮೇ 21ರಂದು ಮರಳಿ ಮನೆಗೆ ಬಂದಿದ್ದರು. ಈ ಸಂದರ್ಭ ಕಳ್ಳರು ಮನೆಯ ಬಾಗಿಲಿನ ಡೋರ್‌ ಲಾಕನ್ನು ಬಲವಂತವಾಗಿ ಒಡೆದು ಒಳಪ್ರವೇಶಿಸಿ ಮನೆಯ ಬೆಡ್‌ರೂಮಿನ ಕಪಾಟಿನಲ್ಲಿರಿಸಿದ 58ಗ್ರಾಂ ತೂಕದ ಚಿನ್ನಾಭರಣಗಳನ್ನು ಕಳವು ಮಾಡಿರುವುದು ಬೆಳಕಿಗೆ ಬಂದಿದೆ.

  ಕಳವಾದ ಸೊತ್ತಿನ ಅಂದಾಜು ಮೌಲ್ಯ ಸುಮಾರು 1.50 ಲಕ್ಷ ರೂ. ಎಂದು ತಿಳಿದು ಬಂದಿದೆ. ಸುರತ್ಕಲ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.