ಶ್ರೀಲಂಕಾದಲ್ಲಿ ಭಾರತೀಯ ಮೂಲದ ಪತ್ರಕರ್ತನ ಬಂಧನ

•   Fri, May 03 2019 12:59:34 PM



• ಕೊಲಂಬೋ, ಮೇ 03 (Daijiworld News/MSP): ಶ್ರೀಲಂಕಾದಲ್ಲಿ ರಾಯಿಟರ್ಸ್‌ ಸುದ್ದಿ ಸಂಸ್ಥೆಯ ಭಾರತೀಯ ಮೂಲದ ಪತ್ರಕರ್ತನನ್ನು ಬಂಧಿಸಿದ್ದಾರೆ. ದ್ವೀಪರಾಷ್ಟ್ರದಲ್ಲಿ ಸರಣಿ ಬಾಂಬ್ ದಾಳಿಯ ಬಳಿಕ ವರದಿಗಾರಿಕೆಗೆಂದು ಹೋಗಿದ್ದ ರಾಯಿಟರ್ಸ್‌ನ ಪತ್ರಕರ್ತ ಸಿದ್ದಿಕಿ ಅಹಮ್ಮದ್ ಡ್ಯಾನಿಶ್‌, ನಿರಾಶ್ರಿತರು ತಂಗಿದ್ದ ಶಾಲೆಗೆ ಅಕ್ರಮವಾಗಿ ನುಗ್ಗಲು ಯತ್ನಿಸಿದ ಹಿನ್ನಲೆಯಲ್ಲಿ ಬಂಧಿಸಿದ್ದಾರೆ. ಬಂಧಿತ ಸಿದ್ದಿಕಿ ಅಹಮ್ಮದ್ ಡ್ಯಾನಿಶ್‌ನನ್ನು ಪೊಲೀಸರು ಸ್ಥಳೀಯ ನ್ಯಾಯಾಧೀಶರ ಮುಂದೆ ಹಾಜರು ಪಡಿಸಿದ್ದು, ಅವರನ್ನು ಮೇ 15ರವರೆಗೂ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

  

  ಲಂಕಾದ ನೆಗೊಂಬೊ ಪಟ್ಟಣದಲ್ಲಿ ನಿರಾಶ್ರಿತರು ಆಶ್ರಯ ಪಡೆದಿದ್ದ ಶಾಲೆಯಲ್ಲಿ ಸೆಂಟ್ ಸಬಾಸ್ಟಿಯನ್‌ ಚರ್ಚ್‌ನಲ್ಲಿ ನಡೆದ ಬಾಂಬ್ ದಾಳಿಯಲ್ಲಿ ಮೃತಪಟ್ಟ ವಿದ್ಯಾರ್ಥಿಯೊಬ್ಬನ ಪೋಷಕರು ಆಶ್ರಯ ಪಡೆದಿದ್ದರು . ಅವರನ್ನು ಮಾತನಾಡಿಸಲೆಂದು ಅನುಮತಿ ಪಡೆಯದೆ ಅಕ್ರಮವಾಗಿ ಹೋಗಲು ಯತ್ನಿಸಿದ್ದರಿಂದ ಪೊಲೀಸರು ಬಂಧಿಸಿದ್ದಾರೆ ಎಂದು ಅಲ್ಲಿನ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

  ಇನ್ನು ವರದಿಗಾರ ಸಿದ್ದಿಕಿ ಅಹಮ್ಮದ್ ಡ್ಯಾನಿಶ್‌ ದೆಹಲಿ ಮೂಲದವರು ಎಂದು ತಿಳಿದು ಬಂದಿದೆ. ಈಸ್ಟರ್ ಭಾನುವಾರದಂದು ಸೆಂಟ್ ಸಬಾಸ್ಟಿಯನ್‌ ಚರ್ಚ್‌ನಲ್ಲಿ ನಡೆದ ಬಾಂಬ್ ದಾಳಿಯಲ್ಲಿ 250 ಜನರು ಮೃತಪಟ್ಟು 500ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದರು.