ಮಾಡೆಲ್ ದುರಂತ ಅಂತ್ಯ-ಫ್ರಿಡ್ಜ್‌ನಲ್ಲಿ ಕಾಲು ಪತ್ತೆ, ಮುಂಡಕ್ಕಾಗಿ ಹುಡುಕಾಟ

•   Sat, Feb 25 2023 06:58:00 PM



• ಹಾಂಗ್ ಕಾಂಗ್, ಫೆ 25 (DaijiworldNews/DB): ಇತ್ತೀಚೆಗೆ ನಾಪತ್ತೆಯಾಗಿದ್ದ ಸೋಶಿಯಲ್ ಮೀಡಿಯಾ ಸ್ಟಾರ್ ಹಾಗೂ ರೂಪದರ್ಶಿ ಅಬ್ಬಿ ಚೋಯ್ (28) ಅವರು ದುರಂತ ಅಂತ್ಯ ಕಂಡಿದ್ದು, ಫ್ರಿಡ್ಜ್‌ನಲ್ಲಿ ಅವರ ಕಾಲುಗಳು ಪತ್ತೆಯಾಗಿವೆ. ಆದರೆ ಮುಂಡದ ಭಾಗ ನಾಪತ್ತೆಯಾಗಿದೆ.

  ಹಾಂಗ್‌ ಕಾಂಗ್‌ ನ ತೈಪೊದಲ್ಲಿರುವ ಲುಂಗ್ ಮೆಯಿ ಟ್ಸುಯೆನ್ ಗ್ರಾಮದ ಬಾಡಿಗೆ ಮನೆಯೊಂದರ ಫ್ರಿಡ್ಜ್‌ನಲ್ಲಿ ಅಬ್ಬಿ ಚೋಯ್ ಅವರ ಕಾಲುಗಳು ಪತ್ತೆಯಾಗಿವೆ. ಆದರೆ ಕೈ ಮತ್ತು ಮುಂಡ ನಾಪತ್ತೆಯಾಗಿದ್ದು, ಇದಕ್ಕಾಗಿ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ.

  ಕಳೆದ ಕೆಲ ದಿನಗಳ ಹಿಂದೆ ಅಬ್ಬಿ ನಿಗೂಢವಾಗಿ ನಾಪತ್ತೆಯಾಗಿದ್ದರು. ಪತಿಯಿಂದ ವಿಚ್ಚೇದನ ಪಡೆದುಕೊಂಡಿದ್ದ ಅಬ್ಬಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು. ಅಲ್ಲದೆ ಆಸ್ತಿ ವಿಚಾರವಾಗಿ ಮಾಜಿ ಪತಿ ಹಾಗೂ ಆತನ ಮನೆಯವರೊಂದಿಗೆ ಅಬ್ಬಿ ಚೋಯ್ ಅವರಿಗೆ ಭಿನ್ನಾಭಿಪ್ರಾಯ ಇತ್ತು ಎನ್ನಲಾಗಿದೆ. ಇದೇ ವಿಚಾರವಾಗಿ ಅವರ ನಡುವೆ ಗಲಾಟೆಯೂ ನಡೆಯುತ್ತಿತ್ತು. ಈ ಹಿನ್ನೆಲೆಯಲ್ಲಿ ಮಾಜಿ ಪತಿ ಮತ್ತು ಆತನ ಮನೆಯವರ ಮೇಲೆ ಪೊಲೀಸರು ಸಂಶಯ ವ್ಯಕ್ತಪಡಿಸಿದ್ದಾರೆ. ಆಕೆಯ ಮಾಜಿ ಪತಿ, ಮಾವ ಸೇರಿ ಮೂವರನ್ನು ಶಂಕೆ ಮೇರೆಗೆ ಪೊಲೀಸರು ಬಂಧಿಸಿ ವಿಚಾರಣೆ ನಡೆಸುತ್ತಿದ್ದಾರೆ. ಮಾಜಿ ಪತಿ ದೇಶದಿಂದ ಪರಾರಿಯಾಗಲು ಬೋಟ್‌ಗಾಗಿ ಕಾಯುತ್ತಿದ್ದ ವೇಳೆ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದಾನೆ. ಇನ್ನು ಬಾಡಿಗೆ ಮನೆಯಲ್ಲಿ ಮಾಂಸ ಕತ್ತರಿಸುವ ಯಂತ್ರ, ಮರ ಕತ್ತರಿಸುವ ಯಂತ್ರ, ರೈನ್‌ ಕೋಟ್, ಗ್ಲೌಸ್, ಮಾಸ್ಕ್ ಪತ್ತೆಯಾಗಿದೆ.